ക്ഷേത്രവും ‘പുറമ്പോക്ക്’ എന്ന് റവന്യൂരേഖ; സര്‍ക്കാര്‍ കൊള്ളയടിക്കുന്നതിന്റെ കൂടുതല്‍ വിവരങ്ങള്‍ പുറത്ത്

തിരുവനന്തപുരം: പുറമ്പോക്ക് എന്നു രേഖപ്പെടുത്തി ക്ഷേത്രങ്ങളുടെ ഭൂമി സംസ്ഥാന സര്‍ക്കാര്‍ കൊള്ളയടിക്കുന്നതിന്റെ കൂടുതല്‍ വിവരങ്ങള്‍ പുറത്ത്. കൊല്ലം ജില്ലയില്‍ 2.04 ഏക്കര്‍ സ്വന്തമായുള്ള ദേവസ്വം ക്ഷേത്രവും പിണറായി സര്‍ക്കാര്‍ പുറമ്പോക്കാക്കി. തിരുവിതാംകൂര്‍ ദേവസ്വം ബോര്‍ഡിന്റെ കൊല്ലം ചവറ മായായക്ഷിക്കാവ് ക്ഷേത്രമാണ് ‘സര്‍ക്കാര്‍ പുറമ്പോക്കി’ലെന്നു റവന്യൂവകുപ്പ് ഉത്തരവിറക്കിയത്. ലാന്‍ഡ് റവന്യൂ കമ്മിഷണറുടെ നേതൃത്വത്തിലായിരുന്നു നടപടി.

മായായക്ഷിക്കാവ് ക്ഷേത്രത്തിനുണ്ടായിരുന്നത് 2.04 ഏക്കറാണ്. റീ സര്‍വേയില്‍ ഇത് 79 സെന്റായി കുറഞ്ഞു. 1.25 ഏക്കര്‍ കാണാതായി. ഇതില്‍ 63 സെന്റ് ഭൂമിയില്‍ സ്വകാര്യകൈയേറ്റം കണ്ടെത്തി. ഭൂമി സംരക്ഷണ നിയമ പ്രകാരം ഭൂമി തിരിച്ചുപിടിക്കാന്‍ ദേവസ്വം ബോര്‍ഡ് സ്‌പെഷല്‍ തഹസില്‍ദാര്‍ നടപടികള്‍ ആരംഭിച്ചു. 2013 ജൂണ്‍ ഒന്നിന് കൈയേറ്റക്കാര്‍ ഭൂമി ഒഴിഞ്ഞുപോകാന്‍ ഉത്തരവിറക്കി. കൈയേറ്റക്കാര്‍ റവന്യൂ
ഡിവിഷന്‍ ഓഫീസറെ സമീപിച്ചെങ്കിലും ദേവസ്വം ബോര്‍ഡിന് അനുകൂല നിലപാടെടുത്തു. തുടര്‍ന്ന് കൈയേറ്റക്കാര്‍ കൊല്ലം കളക്ടറെ സമീപിച്ചു. 2023 നവംബര്‍ 16ന് ദേവസ്വത്തിന് അനുകൂലമായ ആര്‍ഡിഒ ഉത്തരവ് കളക്ടര്‍ റദ്ദാക്കി. അതിനുശേഷമാണ് ദേവസ്വം അധികൃതര്‍ ലാന്‍ഡ് റവന്യൂ കമ്മിഷണറെ സമീപിക്കുന്നത്. ഇതോടെ ക്ഷേത്രം ഉള്‍പ്പെടെ മുഴുവന്‍ ഭൂമിയും സര്‍ക്കാര്‍ പുറമ്പോക്കാണെന്ന് ഉത്തരവിറക്കി. ‘തോട്, പാറ, ക്ഷേത്രം ഉള്‍പ്പെടെ ആകെ 62.1 ആര്‍ ഭൂമി ഇപ്പോഴും സര്‍ക്കാര്‍ പുറമ്പോക്കാണ്’ എന്നാണ് ലാന്‍ഡ് റവന്യൂ കമ്മിഷണര്‍ ഉത്തരവില്‍ രേഖപ്പെടുത്തിയത്.

കാണാതായ 1.25 ഏക്കറില്‍ 63 സെന്റ് കൈയേറ്റമെന്ന് കണ്ടെത്തിയെങ്കിലും ശേഷിച്ച 61.82 സെന്റ് ഭൂമിയുടെ വിവരങ്ങള്‍ ദേവസ്വം ബോര്‍ഡിലുമില്ല. ഭൂമി സംബന്ധമായ കേസുകള്‍ രേഖപ്പെടുത്തേണ്ട കോര്‍ട്ട് രജിസ്റ്റര്‍ കൊല്ലം അസിസ്റ്റന്റ് ദേവസ്വം കമ്മിഷണര്‍ ഓഫീസിലുമില്ല. ഇതോടെ 61.82 സെന്റ് സംബന്ധിച്ച രേഖകള്‍ ഇപ്പോഴും ഇരുട്ടിലാണ്. ഈ ഭൂമി കണ്ടെത്താനുള്ള നടപടികള്‍ ദേവസ്വം ബോര്‍ഡോ സര്‍ക്കാരോ ആരംഭിച്ചിട്ടില്ല. റീസര്‍വേയിലൂടെയും ലാന്‍ഡ് റവന്യൂ കമ്മിഷണറേറ്റിനെയും ഉപയോഗിച്ച് പുറമ്പോക്കെന്ന് രേഖപ്പെടുത്തി ആയിരക്കണക്കിന് ഏക്കര്‍ ക്ഷേത്ര ഭൂമിയാണ് സര്‍ക്കാര്‍ കൈവശപ്പെടുത്തുന്നത്.