തിരുവനന്തപുരം: ശബരിമല തീര്‍ത്ഥാടനത്തിന് വളരെ നേരത്തെ തന്നെ തയാറെടുപ്പുകള്‍ ആരംഭിക്കാന്‍ മന്ത്രി കെ. മുരളീധരന്റെ നേതൃത്വത്തില്‍ ചേര്‍ന്ന അവലോകന യോഗത്തില്‍ തീരുമാനിച്ചു. കഴിഞ്ഞ തീര്‍ത്ഥാടന കാലത്തിന്റെ ആദ്യ ആഴ്ചയിലുണ്ടായത് പോലുളള അമിത തിരക്ക് നിയന്ത്രിക്കാനും പോലീസ് പ്രത്യേക ശ്രദ്ധ പുലര്‍ത്തണം. ചില തീര്‍ത്ഥാടകര്‍ക്ക് പന്തളത്ത് യാത്ര അവസാനിപ്പിക്കേണ്ടി വന്ന സാഹചര്യം ഒഴിവാക്കണം.
ശബരിമല തീര്‍ത്ഥാടനത്തിന്റെ പൂര്‍ണ ചുമതല ദേവസ്വം ബോര്‍ഡിനാണെങ്കിലും ഇതില്‍ സംസ്ഥാന സര്‍ക്കാരിന് വലിയ ഉത്തരവാദിത്തമുണ്ട്. കഴിഞ്ഞ വര്‍ഷത്തേക്കാള്‍ കൂടുതല്‍ ഭക്തര്‍ ഇത്തവണ എത്താന്‍ സാധ്യതയുള്ളതിനാല്‍ അതീവ ജാഗ്രതയോടെയുള്ള മുന്നൊരുക്കങ്ങളാണ് നടത്തേണ്ടതെന്ന് മന്ത്രി പറഞ്ഞു.
വലിയ വാഹനങ്ങളില്‍ ബുക്ക് ചെയ്ത് വരുന്ന തീര്‍ത്ഥാടകരെ നിലയ്‌ക്കലില്‍ ഇറക്കിവിടുന്നത് മൂലം അവര്‍ക്കുണ്ടാകുന്ന അധിക സാമ്പത്തിക ബാധ്യതയും ബുദ്ധിമുട്ടുകളും ഒഴിവാക്കാന്‍ ആവശ്യമായ നടപടികള്‍ സ്വീകരിക്കണം. ഇത്തരം വാഹനങ്ങളെ പമ്പയിലേക്ക് നേരിട്ട് വിടുന്ന കാര്യത്തില്‍ പോലീസും ദേവസ്വം ബോര്‍ഡും ആലോചിച്ച് അന്തിമ തീരുമാനമെടുക്കണമെന്നും നിര്‍ദേശം ഉയര്‍ന്നു.
ദേവസ്വം സെക്രട്ടറി എം.ജി. രാജമാണിക്യം, തിരുവിതാംകൂര്‍ ദേവസ്വം ബോര്‍ഡ് പ്രസിഡന്റ് കെ. ജയകുമാര്‍, അംഗം കെ. രാജു, പന്തളം കൊട്ടാരം പ്രതിനിധി പ്രദീപ്കുമാര്‍ വര്‍മ്മ, ദേവസ്വം കമ്മിഷണര്‍ ബി. സുനില്‍കുമാര്‍ എംപിമാര്‍, എംഎല്‍എമാര്‍, തദ്ദേശ സ്വയംഭരണ സഥാപനങ്ങളിലെ പ്രതിനിധികള്‍ തുടങ്ങിയവര്‍ സംബന്ധിച്ചു.
