പനജി:ഗോവയിലെ നാവികവ്യോമകേന്ദ്രമായ ഐഎന്‍എസ് ഹന്‍സയില്‍ അമേരിക്കയില്‍ നിര്‍മ്മിച്ച ഒരു കൂട്ടം എംഎച്ച്-60ആര്‍ ഹെലികോപ്റ്റര്‍ വ്യൂഹം പ്രവര്‍ത്തനസജ്ജമായി. ഡിസംബര്‍ 17 ബുധനാഴ്ചയാണ് കടല്‍ക്കഴുകന്‍ എന്ന് വിളിക്കപ്പെടുന്ന എംഎച്ച്-60ആര്‍ എന്ന വിഭാഗത്തില്‍പ്പെടുന്ന ഒരു സംഘം ഹെലികോപ്റ്ററുകള്‍ പ്രവര്‍ത്തനസജ്ജമായത്.
ഇതോടെ ചൈനയുടെയും പാകിസ്ഥാന്റെയും ബംഗ്ലാദേശിന്റെയും കടലിലൂടെയുള്ള ഏത് ആക്രമണവും കാലേക്കൂടി മണത്തറിഞ്ഞ് അതിനെ അടപടലം തകര്‍ക്കാന്‍ ഇന്ത്യയ്‌ക്കാവും. കാരണം കടലുമായി ബന്ധപ്പെട്ടുള്ള ഏത് ദൗത്യവും കടല്‍ക്കഴുകനായി അറിയപ്പെടുന്ന എംഎച്ച്-60 ആറിന് നിര്‍വ്വഹിക്കാന്‍ സാധിക്കും. സാമുദ്രിക നിരീക്ഷണത്തിനും ശത്രുവിന്റെ മുങ്ങിക്കപ്പലുകളെ തകര്‍ക്കാനും വിദഗ്ധനാണ് എംഎച്ച്-60 ആര്‍ ഹെലികോപ്റ്റര്‍. എജിഎം-114 വിഭാഗത്തില്‍പ്പെടുന്ന ആപല്‍ക്കാരിയായ ഹെല്‍ഫയര്‍ മിസൈലുകളാണ് ഇതില്‍ ഘടിപ്പിച്ചിരിക്കുന്നത്. ഭാരം കുറഞ്ഞ ടോര്‍പിഡോകളും യന്ത്രത്തോക്കുകളും ഇതില്‍ ഉണ്ടായിരിക്കും. വിവിധ മോഡുകളില്‍ പ്രവര്‍ത്തിക്കുന്ന റഡാറുകളും ഇലക്ട്രോ-ഓപ്റ്റിക് സംവിധാനവും ഇതില്‍ ഉണ്ട്. ശത്രുവിന്റെ മുങ്ങിക്കപ്പലുകളെ വരെ നിരീക്ഷിച്ച് കണ്ടെത്തല്‍, അതിന്റെ സഞ്ചാരപഥം നിശ്ചയിക്കല്‍, ഉയര്‍ന്ന വ്യക്തതയാര്‍ന്ന ചിത്രങ്ങള്‍ പകര്‍ത്തല്‍ എന്നീ വിവിധ ദൗത്യങ്ങള്‍ നിര്‍വ്വഹിക്കാന്‍ ഇതിലെ റഡാറിന് സാധിക്കും. ശത്രുവിന്റെ യുദ്ധവിമാനങ്ങള്‍, ഡ്രോണുകള്‍, മുങ്ങിക്കപ്പലുകള്‍ എന്നിവ രാത്രിയും പകലും കണ്ടെത്താന്‍ ഇതിലെ റഡാറുകള്‍ക്ക് സാധിക്കും. ഇതിലെ ഒരു ശക്തമായ സെന്‍സറിന് ഏത് കാലാവസ്ഥയിലും (മഴയിലും മഞ്ഞിലും രാത്രിയും പകലും) അന്തരീക്ഷം വിലയിരുത്താന്‍ സാധിക്കും.
ഗോവയിലെ ദബോലിമിലുള്ള ഐഎന്‍എസ് ഹന്‍സ എന്നത് ഇന്ത്യന്‍ നാവികസേനയുടെ ഏറ്റവും വലിയ വ്യോമബേസാണ്. ഇവിടെ യുദ്ധവിമാനവ്യൂഹത്തിന് ഒരുമിച്ച് പറന്നിറങ്ങാനും പറന്നുയരാനും ഉള്ള സൗകര്യമുണ്ട്. ഗോവയില്‍ പ്രവര്‍ത്തനസജ്ജമായ 24 ഹെലികോപ്റ്ററുകള്‍ അടങ്ങിയ ഹെലികോപ്റ്റര്‍വ്യൂഹം ഇന്ത്യന്‍ നാവികസേനയുടെ രണ്ടാമത്തെ എംഎച്ച്-60 ആര്‍ വ്യൂഹമാണ്. ഗോവയിലെ ഐഎന്‍എസ് ഹന്‍സയിലെ ഈ എംഎച്ച്-60 ആര്‍ വ്യോമസംഘത്തെ ഐഎന്‍എഎസ് 335 എന്നാണ് വിളിക്കുന്നത്. ഇരപിടിയന്‍ എന്ന അര്‍ത്ഥം വരുന്ന ഫ്രഞ്ച് വാക്കായ ഒസ്പ്രെയ്സ് എന്നും ഈ ഹെലികോപ്റ്റര്‍ വ്യൂഹത്തെ വിളിക്കുന്നു.
ഗോവയിലെ നാവികസേനാആസ്ഥാനത്ത് 24ഓളം എംഎച്ച് -60 ഹെലികോപ്റ്ററുകളാണ് എത്തിച്ചേര്‍ന്നത്. നാവിക മേധാവി അഡ്മിറല്‍ ദിനേഷ് കുമാര്‍ ത്രിപാഠിയാണ് ഈ വിമാനവ്യൂഹം കമ്മീഷന്‍ ചെയ്തതായി പ്രഖ്യാപിച്ചത്. 2025 ഡിസംബര്‍ തുടക്കത്തിലാണ് 24 ഹെലികോപ്റ്ററുകള്‍ വാങ്ങാന്‍ കേന്ദ്ര പ്രതിരോധമന്ത്രാലയും യുഎസുമായി കരാറിലെത്തിയത്. 96.4 കോടി ഡോളറിന്റെതാണ് (8714 കോടി രൂപ) അഞ്ച് വര്‍ഷത്തെ ഈ കരാര്‍. ഇതനുസരിച്ച് അഞ്ച് വര്‍ഷത്തോളം ഇവയുടെ സ്പെയര്‍പാര്‍ട്സുകളും അറ്റകുറ്റപ്പണിയും ലോക് ഹീഡ് മാര്‍ട്ടിന്‍ എന്ന അമേരിക്കയുടെ ആയുധക്കമ്പനി നല്‍കും. സാങ്കേതിക സഹായവും പരിശീലനവും നല്‍കും.
ഇന്ത്യയുടെ സമുദ്രപാതയുടെ കണ്ണും കാതുമായി ഈ ഹെലികോപ്റ്റര്‍ കൂട്ടം പ്രവര്‍ത്തിക്കുമെന്ന് ഐഎന്‍എഎസ് 335ന്റെ ക്യാപ്റ്റന്‍ ധീരേന്ദര്‍ ബിഷ്ട് പറയുന്നു.
