കൊച്ചി : കോടതി പറഞ്ഞിരിക്കുന്നു ദിലീപ് കുറ്റവിമുക്തനാണെന്ന്. നമ്മള്‍ അത് ആദരിച്ചേ മതിയാകൂയെന്ന് സംവിധായകന്‍ വിനയന്‍. നമ്മള്‍ നീതിന്യായ സംവിധാനത്തില്‍ വിശ്വസിക്കുന്ന സമൂഹമാണ്. അതല്ല, ഇക്കാര്യത്തില്‍ വിയോജിപ്പുണ്ടെങ്കില്‍ മേല്‍ക്കോടതികളുണ്ടല്ലോയെന്നും വിനയന്‍ പറഞ്ഞു. ദിലീപിനെ അറസ്റ്റു ചെയ്തപ്പോള്‍ ഞെട്ടിയവരാണ് ഞങ്ങളെല്ലാം. അന്ന് ദിലീപ് എന്നോട് പറഞ്ഞത് ഞാന്‍ തെറ്റൊന്നും ചെയ്തിട്ടില്ലെന്നാണ്. എങ്കില്‍ നീ സത്യം തെളിയിക്കൂ എന്ന് ഞാന്‍ പറഞ്ഞു. ഇപ്പോള്‍ ദിലീപ് സത്യം തെളിയിച്ചിരിക്കുന്നു. എന്നാല്‍ ഇത് ക്വട്ടേഷനാണെന്ന് അതിജീവിത പറയുന്നു. അങ്ങിനെയെങ്കില്‍ അതു തെളിയണം. അതിജീവിതയ്‌ക്ക് നീതി ലഭ്യമാക്കേണ്ടത് സര്‍ക്കാരും നീതിന്യായ വ്യവസ്ഥയുമാണ്. താന്‍ അതിജീവിതയ്‌ക്കൊപ്പമാണെന്നും വിനയന്‍ പറഞ്ഞു.
രണ്ടോ മൂന്നോ ഡ്രൈവര്‍മാര്‍ ചേര്‍ന്ന് ഒരു നടിയെ വളഞ്ഞിട്ട് ആക്രമിച്ച് നഗ്‌ന വീഡിയോ ഒക്കെ എടുക്കുന്നതൊക്കെ കേട്ടുകേള്‍വിയില്ലാത്ത സംഭവമാണ്. അതില്‍ ഗൂഢാലോചന ഉണ്ടെങ്കില്‍ പുറത്തു വരണം.
വിധി പകര്‍പ്പ് കിട്ടും മുന്‍പ് ദിലീപിനെ സ്വാഗതം ചെയ്യുന്ന നടപടികളിലേക്ക് സിനിമാ സംഘടനകള്‍ കടന്നാല്‍ സംഘടനകളുടെ മനസിലിരിപ്പ് എന്തെന്ന് ജനം തിരിച്ചറിയുമെന്നും വിനയന്‍ പറഞ്ഞു.
