കൊച്ചി: തദ്ദേശ സ്വയംഭരണ സ്ഥാപനങ്ങളിലേക്കുള്ള തെരഞ്ഞെടുപ്പില്‍ സമ്മതിദാനാവകാശം വിനിയോഗിക്കുമ്പോള്‍ ഹിന്ദുസമൂഹം പരമാവധി ജാഗ്രത പുലര്‍ത്തണമെന്ന് വിഎച്ച്പി സംസ്ഥാന പ്രസിഡന്റ് വിജി തമ്പിയും ജനറല്‍ സെക്രട്ടറി അനില്‍ വിളയിലും പ്രസ്താവനയില്‍ അറിയിച്ചു.
തീവ്രവാദ ശക്തികളുടെയും മതപരിവര്‍ത്തന ലോബികളുടെയും പ്രധാന കേന്ദ്രമായി കേരളം മാറിക്കഴിഞ്ഞു. ഇക്കാര്യങ്ങളോ കേരളത്തിന്റെ വികസനമോ മയക്കുമരുന്ന് വ്യാപനമോ തൊഴിലില്ലായ്‌മയോ ചര്‍ച്ച ചെയ്യാന്‍ മിക്ക രാഷ്‌ട്രീയ കക്ഷികളും തയ്യാറാകുന്നില്ല. പാദപൂജ വിവാദം, ഭാരതാംബ വിവാദം, ശബരിമലക്കൊള്ള തുടങ്ങിയ ഹൈന്ദവ വിഷയങ്ങളില്‍ വിശ്വാസികള്‍ക്കെതിരായ രാഷ്‌ട്രീയ നിലപാടുകള്‍ ഉണ്ടാക്കാനാണ് ഇക്കൂട്ടര്‍ ശ്രമിക്കുന്നത്.
ശബരിമല സ്വര്‍ണക്കൊള്ളയുടെ അന്വേഷണം ഏതാണ്ട് നിലച്ച മട്ടാണ്. കൃത്യമായ അന്വേഷണം നടത്തിയാല്‍ മന്ത്രിമാരുള്‍പ്പെടെയുള്ളവര്‍ പ്രതികള്‍ ആകുമെന്ന് മനസിലാക്കിയതിന്റെ അടിസ്ഥാനത്തില്‍ പ്രത്യേക അന്വേഷണ സംഘത്തിനെ മൂക്കു കയറിട്ടു നിര്‍ത്തിയിരിക്കുകയാണ് ആഭ്യന്തര വകുപ്പ്. ഹൈന്ദവ സമൂഹത്തെ അവഹേളിക്കുകയും അപകീര്‍ത്തിപ്പെടുത്തുകയും ചെയ്യുന്ന വ്യക്തികള്‍ക്കും സ്ഥാപനങ്ങള്‍ക്കും വേണ്ട ഒത്താശയും സഹായവും പ്രോത്സാഹനവും നല്‍കുന്ന ഭരണ നേതൃത്വം ചില തീവ്രവാദ ശക്തികള്‍ക്ക് കീഴ്‌പ്പെട്ട് ഭരണം നടത്തുന്ന കാഴ്ചയാണുള്ളത്. ക്ഷേത്രങ്ങളുടെ സ്വത്തുക്കളും ഭൂമിയും കൊള്ളയടിച്ചവരെയും ശബരിമലയുടെ പവിത്രത ഇല്ലാതാക്കാന്‍ രാത്രിയുടെ മറവില്‍ യുവതികളെ പ്രവേശിപ്പിക്കാന്‍ ശ്രമിച്ചവരെയും ഹൈന്ദവ സമൂഹം തിരിച്ചറിഞ്ഞു കഴിഞ്ഞു.
രാജ്യത്തെ ഇസ്ലാമികവല്‍ക്കരിക്കാന്‍ ശ്രമിക്കുന്ന ജമാഅത്തെ ഇസ്ലാമിയുടെ വെല്‍ഫെയര്‍ പാര്‍ട്ടി, നിരോധിത തീവ്രവാദ പ്രസ്ഥാനമായ പോപ്പുലര്‍ ഫ്രണ്ടിന്റെ രാഷ്‌ട്രീയ പ്രസ്ഥാനമായ എസ്ഡിപിഐ തുടങ്ങിയ കക്ഷികളെ കൂട്ടുപിടിക്കാന്‍ കേരളത്തിലെ ഭരണ, പ്രതിപക്ഷ നേതൃത്വം നടത്തുന്ന നാണംകെട്ട പ്രവര്‍ത്തനങ്ങളും ചര്‍ച്ചകളും അന്തര്‍ധാരയും ഹിന്ദുക്കള്‍ തിരിച്ചറിഞ്ഞു കഴിഞ്ഞു. ഇത്തരം മാരീചന്മാരെ തള്ളി സനാതന സംസ്‌കാരത്തിന് വേണ്ടി നിലകൊള്ളുന്ന ദേശീയ കാഴ്ചപ്പാടുള്ള പ്രത്യയശാസ്ത്രങ്ങള്‍ക്ക് വേണ്ട പിന്തുണ നല്‍കി സനാതന വിശ്വാസത്തെ സംരക്ഷിക്കുമെന്ന് ഉറപ്പു നല്‍കുന്നവര്‍ക്ക് അനുകൂലമായി വോട്ടവകാശം വിനിയോഗിക്കാന്‍ എല്ലാ സനാതന ധര്‍മ വിശ്വാസികളും തയ്യാറാകണമെന്നും ഇരുവരും അറിയിച്ചു.
