കോഴിക്കോട്: നടിയെ ആക്രമിച്ച കേസിലെ കോടതിവിധിയിൽ വ്യത്യസ്ത അഭിപ്രായങ്ങളുമായി കോൺഗ്രസ്. വിധി ആശ്വാസകരമെന്ന് പറഞ്ഞ പ്രതിപക്ഷ നേതാവ് വി. ഡി സതീശൻ നടന് ദിലീപ് അടക്കമുള്ളവരെ വെറുതേ വിട്ടതിലും പ്രോസിക്യൂഷന് വീഴ്ച സംബന്ധിച്ചും പ്രതികരിച്ചില്ല. അതേ സമയം വിധി തൃപ്തികരമല്ലെന്ന് കെപിസിസി പ്രസിഡന്റ് സണ്ണി ജോസഫ് എംഎല്എ പറഞ്ഞു.
ഒരു സ്ത്രീക്കും സംഭവിക്കാന് പാടില്ലാത്ത ദുരന്തമാണ് അതിജീവിതയ്ക്ക് ഉണ്ടായതെന്നും, കുറ്റവാളികൾ ശിക്ഷിക്കപ്പെട്ടു എന്നതിൽ വളരെയധികം സന്തോഷമുണ്ടെന്നും പ്രതിപക്ഷ നേതാവ് പറഞ്ഞു. അത്തരം സംഭവങ്ങള് ആവര്ത്തിക്കപ്പെടാതിരിക്കാന് ഇത്തരം വിധി സഹായകമാകും. തൃക്കാക്കര എംഎല്എ ആയിരുന്ന പിടി തോമസിന്റെ ഇടപെടലിലാണ് ഇങ്ങനെ ഒരു പരിസമാപ്തിയിലേക്ക് കേസ് വന്നത്. അദ്ദേഹത്തെ ഈ അവസരത്തില് പ്രത്യേകം ഓര്ക്കുന്നു. ഒരുതരത്തിലും പ്രതികള് രക്ഷപ്പെടരുത് എന്ന വാശി അദ്ദേഹത്തിന് ഉണ്ടായിരുന്നെന്നും വിഡി സതീശന് പറഞ്ഞു.
കേരളത്തില് സ്ത്രീ സുരക്ഷ കുറേക്കൂടി ഉറപ്പുവരുത്തേണ്ടതുണ്ട്. പരാതിയുമായി വരുന്ന സ്ത്രീക്ക് അത് കിട്ടുമെന്ന് ഉറപ്പുവരുത്താനുള്ള സംവിധാനം മെച്ചപ്പെടുത്തണം. ഇന്ന് ആ സംവിധാനം പോരായെന്നും വിഡി സതീശന് പറഞ്ഞു.
കേസ് വാദിച്ച് തെളിയിക്കുന്നതില് പ്രോസിക്യൂഷന് പരാജയപ്പെട്ടുവെന്ന് കെപിസിസി പ്രസിഡന്റ് സണ്ണി ജോസഫ് പറഞ്ഞു. ഗൂഢാലോചന ഭാഗം തെളിയിക്കാന് കഴിയാതെ പോയത് കേസ് അന്വേഷിച്ച പോലീസിന്റെയും കോടതിയില് അവതരിപ്പിച്ച പ്രോസിക്യൂഷന്റെയും പരാജയമാണെന്നും അദ്ദേഹം കുട്ടിച്ചേർത്തു.
