ന്യൂദല്‍ഹി: രാഹുല്‍ ഗാന്ധിയെ പുടിന് കാണണമെന്ന് തോന്നാത്തതുകൊണ്ടാണ് ക്ഷണിക്കാതിരുന്നതെന്ന് കേന്ദ്രം. റഷ്യയില്‍ നിന്നെത്തിയ സംഘം ഇന്ത്യയിലെ പ്രതിപക്ഷ നേതാവിനെ കാണണമെന്ന് ആഗ്രഹം പ്രകടിപ്പിക്കാതിരുന്നതിനാലാണ് ക്ഷണിക്കാതിരുന്നതെന്നും കേന്ദ്രസര്‍ക്കാര്‍.
ഏത് ദേശീയ, അന്തര്‍ദ്ദേശീയ പരിപാടിയിലും പ്രതിപക്ഷ നേതാവിനെ പങ്കെടുപ്പിക്കണം എന്ന ഒരു ഔപചാരിക പ്രൊട്ടോക്കോള്‍ ഇന്ത്യയില്‍ ഇല്ല. അതിനാല്‍ പുടിന് വരുമ്പോള്‍ ക്ഷണിക്കാതിരുന്നതില്‍ രാഹുല്‍ഗാന്ധി പരാതിപ്പെടുന്നതില്‍ അര്‍ത്ഥവുമില്ല.
പൊതുവേ രാഹുല്‍ ഗാന്ധിയും കേന്ദ്രവും തമ്മിലുള്ള ബന്ധം കഴിഞ്ഞ കുറെ വര്‍ഷങ്ങളായി സംഘര്‍ഷത്തിന്‍റേതാണ്. പല രീതിയില്‍ കേന്ദ്രത്തെ താറടിക്കാനാണ് രാഹുല്‍ ഗാന്ധി തുടര്‍ച്ചയായി ശ്രമിക്കുന്നത്. ഏതെങ്കിലും ഒരു കാരണത്തിന്റെ പേരില്‍ രാഹുല്‍ ഗാന്ധി കേന്ദ്രസര്‍ക്കാരിനെ ഇതുവരെയും അഭിനന്ദിച്ചിട്ടില്ല.
ഈയിടെ ഇന്ത്യയുടെ സമ്പദ് ഘടന ചത്ത സമ്പദ്ഘടനയാണെന്ന് ട്രംപ് പറഞ്ഞപ്പോള്‍ അതിന് അനുകൂലിച്ച് സംസാരിച്ചയാളാണ് രാഹുല്‍ ഗാന്ധി. പാകിസ്ഥാനെതിരെ ഇന്ത്യ നിര്‍ണ്ണായകമായ സൈനിക നീക്കം നടത്തിയപ്പോള്‍ ഓരോഘട്ടത്തിലും ഇന്ത്യയെ വിമര്‍ശിക്കാനാണ് ഗാന്ധി കുടുംബം ഒന്നടങ്കം ശ്രമിച്ചത്. പാകിസ്ഥാന്റെ യുദ്ധവിമാനങ്ങള്‍ അടിച്ചിട്ടതും അവിടുത്തെ ഭീകരകേന്ദ്രങ്ങള്‍ നശിപ്പിച്ചതിലുമല്ല, ഇന്ത്യയുടെ വിമാനങ്ങള്‍ എത്രയെണ്ണം തകര്‍ന്നു എന്നതായിരുന്നു രാഹുല്‍ ഗാന്ധിക്ക് അറിയേണ്ടിയിരുന്നത്.
സര്‍ക്കാര്‍ ക്ഷണിക്കുന്ന പരിപാടികളില്‍ പോലും പങ്കെടുക്കുന്ന ശീലം രാഹുല്‍ ഗാന്ധിക്കില്ല. ഇക്കഴിഞ്ഞ ആഗസ്ത് 15ന് സ്വാതന്ത്ര്യ സമരവുമായി ബന്ധപ്പെട്ട പരിപാടികളില്‍ രാഹുല്‍ പങ്കെടുത്തിരുന്നില്ല. ഏറ്റവുമധികം പൊതുജനശ്രദ്ധ നേടിയെടുക്കാന്‍ കഴിയുന്ന പരിപാടിയായിട്ടും രാഹുല്‍ അതില്‍ പങ്കെടുത്തിരുന്നില്ല. പൊതുവേ രാഷ്‌ട്രീയത്തില്‍ ഗൗരവം പുലര്‍ത്തുന്ന ആളല്ല രാഹുല്‍ ഗാന്ധി എന്ന സൂചനയാണ് ഈ സംഭവം തെളിയിക്കുന്നത്.
പുടിന് പങ്കെടുത്ത രാഷ്‌ട്രപതി ഭവനിലെ വിരുന്നില്‍ തരൂരിനെ പങ്കെടുപ്പിച്ചതില്‍ തെറ്റുപറയാനാവില്ല. കാരണം മുന്‍പ് ഐക്യരാഷ്‌ട്രസഭയില്‍ സെക്രട്ടറി ജനറലിന് തൊട്ട് താഴെ പ്രവര്‍ത്തിച്ച ശശി തരൂര്‍ പരിചയസമ്പന്നനായ നയതന്ത്രോദ്യോഗസ്ഥനാണ്. അദ്ദേഹത്തിന് വിപുലമായ വിദേശ സേവന അനുഭവപരിചയമുണ്ട്. അന്താരാഷ്‌ട്രപ്രശ്നങ്ങള്‍ മികവോടെ കൈകാര്യം ചെയ്തതിന്റെ പേരിലും മികച്ച നയജ്ഞാനത്തിന്റെ പേരിലും ശശി തരൂര്‍ ഏറെ പ്രകീര്‍ത്തിക്കപ്പെട്ടയാളുമാണ്. എല്ലാറ്റിനും പുറമെ, പാര്‍ലമെന്‍റിലെ വിദേശകാര്യ സമിതിയിലെ അധ്യക്ഷനും കൂടിയാണ് ശശി തരൂര്‍. അതിനാല്‍ അദ്ദേഹത്തെ ക്ഷണിക്കുന്നതില്ഡ തെറ്റില്ല. വിദേശ കാര്യങ്ങളിലോ നയതന്ത്രപ്രശ്നങ്ങളിലോ രാഹുല്‍ ഗാന്ധി സജീവമായി ഇടപെടല്‍ നടത്താറില്ല. ഇന്ത്യയുടെ ആഭ്യന്തരമായ പ്രശ്നങ്ങളില്‍ മാത്രമേ രാഹുല്‍ ഗാന്ധി ഇടപെടാറുള്ളൂ. അങ്ങിനെ ഒരാളെ നയതന്ത്രവും അതാരാഷ്‌ട്ര പ്രശ്നങ്ങളും കൈകാര്യം ചെയ്യുന്ന വേദിയില്‍ ക്ഷണിക്കാതിരുന്നത് അനുചിതമെന്ന് പറയാനാവില്ല.
