ഫ്രാന്‍സില്‍ നടന്ന പ്രതിഷേധങ്ങളും അക്രമസംഭവങ്ങളും ചര്‍ച്ചയാകുന്നതിനിടെ ഫ്രഞ്ച് സര്‍ക്കാരിനെതിരെ രൂക്ഷവിമര്‍ശനവുമായി ഇസ്രയേല്‍ പ്രധാനമന്ത്രി ബെഞ്ചമിന്‍ നെതന്യാഹു. ഫ്രാന്‍സ് തീവ്ര ഇസ്ലാമിക ശക്തികളുടെ കടന്നുകയറ്റത്തിന് ഇരയായെന്ന് അദ്ദേഹം ചൂണ്ടിക്കാട്ടി. രാജ്യത്തെ അക്രമസംഭവങ്ങള്‍ നേരിടുന്നതില്‍ ഫ്രഞ്ച് നേതൃത്വം പരാജയപ്പെട്ടെന്നും അദ്ദേഹം കുറ്റപ്പെടുത്തി. നെതന്യാഹുവിന്റെ പ്രസ്താവന അന്താരാഷ്‌ട്ര തലത്തില്‍ പുതിയ രാഷ്‌ട്രീയ ചര്‍ച്ചകള്‍ക്ക് വഴിയൊരുക്കിയിരിക്കുകയാണ്.
ഫ്രാന്‍സിലെ വിവിധ നഗരങ്ങളില്‍ നടന്ന പ്രതിഷേധങ്ങള്‍ക്കിടെ കടകള്‍ കൊള്ളയടിക്കുകയും പൊതുമുതല്‍ നശിപ്പിക്കുകയും ചെയ്ത സംഭവങ്ങള്‍ റിപ്പോര്‍ട്ട് ചെയ്തിരുന്നു. ഇതിന് പിന്നാലെയാണ് ഫ്രഞ്ച് നേതൃത്വത്തിന്റെ നടപടികളെ വിമര്‍ശിച്ച് നെതന്യാഹു രംഗത്തെത്തിയത്. അക്രമങ്ങളെ നേരിടാന്‍ ഫ്രഞ്ച് നേതൃത്വം സമയബന്ധിതമായി തയാറായില്ലെന്നും തീവ്ര ഇസ്ലാമിക ശക്തികള്‍ക്ക് മുന്നില്‍ രാജ്യം ദുര്‍ബലമായ നിലപാടാണ് സ്വീകരിച്ചതെന്നും അദ്ദേഹം പറഞ്ഞു.
ഇസ്രയേലില്‍ 2023 ഒക്ടോബര്‍ ഏഴിന് ഹമാസ് നടത്തിയ ആക്രമണത്തിന് പിന്നാലെ ഫ്രഞ്ച് പ്രസിഡന്റ് ഇമ്മാനുവല്‍ മാക്രോണിന് മുന്നറിയിപ്പ് നല്‍കിയിരുന്നുവെന്നും നെതന്യാഹു പറഞ്ഞു. തീവ്രവാദത്തെ തടയാന്‍ നടപടിയെടുത്തില്ലെങ്കില്‍ സമാനമായ ഭീഷണി ഫ്രാന്‍സിനും നേരിടേണ്ടിവരുമെന്ന് അന്ന് മുന്നറിയിപ്പ് നല്‍കിയിരുന്നുവെന്നാണ് അദ്ദേഹം പറഞ്ഞത്.
