ആലപ്പുഴ: അംബേദ്ക്കര്‍ ഗ്രാമവികസന പദ്ധതി നടത്തിപ്പില്‍ ആര്യാട് ബ്ലോക്ക് പഞ്ചായത്തിന്റെയും, നിര്‍വഹണ ഏജന്‍സിയുടെയും ഒത്താശയോടെ ക്രമക്കേട് നടത്തിയതായി ആക്ഷേപം. തെരഞ്ഞെടുപ്പ് ബഹിഷ്‌ക്കരിക്കുമെന്ന് കോളനി നിവാസികള്‍. വിഷയത്തില്‍ ഇടപെട്ട് ബിജെപി.
മണ്ണഞ്ചേരി ഗ്രാമപഞ്ചായത്തിലെ പതിനഞ്ചാം വാര്‍ഡിലെ ആര്യാട് നോര്‍ത്ത് കോളനി നിവാസികളാണ് അംബേദ്ക്കറുടെ പേരില്‍ നടപ്പാക്കിയ പദ്ധതിയിലെ ക്രമക്കേടുകള്‍ക്ക് ഇരയായി മാറിയത്. ബ്ലോക്ക് പഞ്ചായത്തിലും, ജില്ലാകളക്ടര്‍ക്കും അടക്കം പരാതി നല്‍കിയെങ്കിലും നടപടിയില്ല. ഈ സാഹചര്യത്തിലാണ് അവര്‍ തെരഞ്ഞെടുപ്പ് ബഹിഷ്‌ക്കരിക്കുമെന്ന് പ്രഖ്യാപിച്ചത്.
വീടുകളുടെ നവീകരണം എസ്റ്റിമേറ്റ് പ്രകാരമല്ല നടന്നിരിക്കുന്നതെന്നാണ് പ്രധാന ആക്ഷേപം. പല വീടുകളും പഴയതിനേക്കാള്‍ ശോച്യാവസ്ഥയിലായി കഴിഞ്ഞു. ഈ പദ്ധതി പ്രകാരം സഹായം ലഭിച്ചതിനാല്‍ മറ്റു സഹായങ്ങള്‍ ലഭിക്കാനുള്ള മാര്‍ഗങ്ങളും അടഞ്ഞു. കോളനിയിലെ നിര്‍ദ്ധന കുടുംബങ്ങള്‍ പ്രതിസന്ധിയിലായി. കടുത്ത മനുഷ്യാവകാശ ലംഘനമാണ് അവര്‍ അനുഭവിക്കുന്നത്. തെരഞ്ഞെടുപ്പ് പ്രചാരണത്തിന്റെ ഭാഗമായി കോളനിയിലെത്തിയ ബിജെപി പ്രവര്‍ത്തകര്‍ വിഷയം നേതൃത്വത്തിന്റെ ശ്രദ്ധയില്‍പ്പെടുത്തുകയും ഇടപെടുകയുമായിരുന്നു.
കുറ്റക്കാര്‍ക്കെതിരെ ശക്തമായ നടപടി വേണമെന്നും അതിനായി ബിജെപി നിയമപരമായും അല്ലാതെയും പോരാടുമെന്നും മാരാരിക്കുളം മണ്ഡലം പ്രസിഡന്റ് അശ്വതി അറുമുഖം പത്രസമ്മേളനത്തില്‍ അറിയിച്ചു. പദ്ധതി പ്രകാരം എഎന്‍ കോളനിയിലെ 32 വീടുകളുടെ അറ്റകുറ്റപ്പണികള്‍, കുളം നവീകരണം, ഹൈമാസ്റ്റ് ലൈറ്റ് സ്ഥാപിക്കല്‍, ഫുട്പാത്ത് നിര്‍മ്മാണം, കാന, കമ്മ്യുണിറ്റി ഹാള്‍ എന്നിവയാണ് നടപ്പാക്കുന്നത്. ഒരു കോടി രൂപയാണ് ആലപ്പുഴ എംഎല്‍എയുടെ ശുപാര്‍ശ പ്രകാരം 2021-22 വര്‍ഷം അനുവദിച്ചത്. ഇതില്‍ 22 വീടുകളുടെ അറ്റകുറ്റപണിയും കുളം നവീകരണവും പൂര്‍ത്തിയാക്കി. മുപ്പത് ലക്ഷത്തോളം രൂപ ബില്‍ മാറി കരാറുകാരന് നല്‍കുകയും ചെയ്തു. സര്‍ക്കാര്‍ ഏജന്‍സിയായ നിര്‍മ്മിതിയാണ് കരാര്‍ ഏറ്റെടുത്തത്. അവര്‍ അത് ഉപകരാര്‍ നല്‍കി.
ഉദ്യോഗസ്ഥരും, സിപിഎം ജനപ്രതിനിധികളും കോണ്‍ഗ്രസ് നേതാവ് ഉള്‍പ്പെടെയുള്ളവരും പദ്ധതി കൃത്യമായി പൂര്‍ത്തിയാക്കിയെന്ന സാക്ഷ്യപത്രം നല്‍കിയതിന്റെ അടിസ്ഥാനത്തിലാണ് ബില്‍മാറി പണം അനുവദിച്ചത്. ഇവര്‍ക്കെതിരെ നടപടി ആവശ്യപ്പെട്ട് ഓംബുഡ്‌സ്മാനും കേന്ദ്രസര്‍ക്കാരിനും പരാതി നല്‍കും. കോളനി നിവാസികള്‍ക്ക് നീതി ലഭ്യമാകും വരെ ബിജെപി അവര്‍ക്കൊപ്പം ഉണ്ടാകുമെന്നും അശ്വതി വ്യക്തമാക്കി. ആര്യാട് ബ്ലോക്ക് പഞ്ചായത്ത് കലവൂര്‍ ഡിവിഷന്‍ സ്ഥാനാര്‍ത്ഥി കെ.റ്റി. നിശാന്ത്, ജില്ലാ പഞ്ചായത്ത് ആര്യാട് ഡിവിഷന്‍ സ്ഥാനാര്‍ത്ഥി അനിത കുമാരി, ഗ്രാമപഞ്ചായത്ത് സ്ഥാനാര്‍ത്ഥികളായ എസ്. സുചിത്ര, അനിത, ആനി തോമസ്, ബിജെപി ഏരിയ സെക്രട്ടറി അരുണ്‍ എന്നിവര്‍ പത്രസമ്മേളനത്തില്‍ പങ്കെടുത്തു.
