ന്യൂദൽഹി : തെലങ്കാന മുഖ്യമന്ത്രി രേവന്ത് റെഡ്ഡിയുടെ ഹിന്ദു ദൈവങ്ങളെ അപമാനിച്ച് ഇറക്കിയ പ്രസ്താവനകളെ ശക്തമായി അപലപിച്ച് ബിജെപി നേതാവും കേന്ദ്രമന്ത്രിയുമായ ബണ്ടി സഞ്ജയ് കുമാർ. തന്റെ ഇൻസ്റ്റാഗ്രാമിലൂടെയാണ് അദ്ദേഹം എതിർപ്പ് പ്രകടിപ്പിച്ചത്. കോൺഗ്രസ് എല്ലായ്‌പ്പോഴും എഐഎംഐഎമ്മിന് മുന്നിൽ തലകുനിച്ച പാർട്ടിയാണെന്ന് അദ്ദേഹം പറഞ്ഞു.
കൂടാതെ കോൺഗ്രസ് ഒരു മുസ്ലീം പാർട്ടിയാണ് എന്ന മുഖ്യമന്ത്രി രേവന്ത് റെഡ്ഡിയുടെ പ്രസ്താവനയും അദ്ദേഹം പരാമർശിച്ചു. ഈ പ്രസ്താവന ആ മാനസികാവസ്ഥയെ വെളിപ്പെടുത്തുന്നുവെന്ന് ബണ്ടി സഞ്ജയ് എഴുതി. കോൺഗ്രസ് ഹിന്ദുക്കളോട് കടുത്ത വെറുപ്പ് പുലർത്തുന്നു. രേവന്തിന്റെ പ്രസ്താവനയെക്കുറിച്ച് ബിആർഎസും ശബ്ദമുയർത്തിയിട്ടുണ്ടെങ്കിലും ബിആർഎസ് ഹിന്ദു ദേവതകളെ നിരന്തരം അപമാനിച്ചിട്ടുണ്ടെന്ന് സഞ്ജയ് കുമാർ തുറന്നടിച്ചു.
ഹിന്ദു ദൈവങ്ങളെ അപമാനിക്കുന്നത് ഫാഷനായി മാറിയിരിക്കുന്നുവെന്ന് ബിആർഎസ് നേതാവ് രാകേഷ് റെഡ്ഡി അംഗുല കഴിഞ്ഞ ദിവസം പോസ്റ്റ് ചെയ്തിരുന്നു. മുഖ്യമന്ത്രിയായിരിക്കെ രേവന്ത് റെഡ്ഡി ദശലക്ഷക്കണക്കിന് ഹിന്ദുക്കളെ അപമാനിച്ചത് നിർഭാഗ്യകരമാണെന്നുമാണ് രാകേഷ് റെഡ്ഡി പറഞ്ഞത്.
കഴിഞ്ഞ ദിവസം ഹൈദരാബാദിൽ വച്ച് നടന്ന കോൺഗ്രസ് യോഗത്തിലാണ് മുഖമന്ത്രി രേവന്ത് റെഡ്ഡി ഹിന്ദു ദൈവങ്ങളെ പരിഹസിച്ച് കൊണ്ട് പ്രസ്താവനയിറക്കിയത്. പാർട്ടിക്കുള്ളിലെ സമവായമില്ലായ്‌മയെക്കുറിച്ച് സംസാരിച്ച മുഖ്യമന്ത്രി രേവന്ത് റെഡ്ഡി ദൈവങ്ങളുടെ കാര്യത്തിൽ നമുക്ക് ഒരു സമവായമില്ലെങ്കിൽ, പാർട്ടിയിലെ ഇത്രയധികം ആളുകൾക്ക് എങ്ങനെ യോജിക്കാൻ കഴിയുമെന്നാണ് ചോദിച്ചത്.
“ഹിന്ദുമതത്തിൽ എത്ര ദേവീദേവന്മാരുണ്ട്? മൂന്ന് കോടി പേരുണ്ട്, അല്ലേ? എന്തുകൊണ്ട്? അവിവാഹിതർക്ക് ഹനുമാൻ ഉണ്ട്. രണ്ടുതവണ വിവാഹം കഴിച്ചവർക്ക് മറ്റൊരു ദൈവം, മദ്യം കഴിക്കുന്നവർക്ക് ഒരു ദൈവം. എല്ലമ്മ, പോഷമ്മ, പരിപ്പ്-അരി കഴിക്കുന്നവർക്ക് ഒരു ദൈവം. അതുപോലെ ദൈവങ്ങളെക്കുറിച്ചും അഭിപ്രായ സമന്വയമില്ല. ചിലർ ഞാൻ ഭഗവാൻ ബാലാജിയെ ആരാധിക്കുമെന്ന് പറയുന്നു, ചിലർ ഞാൻ ഹനുമാനെ ആരാധിക്കുമെന്ന് പറയുന്നു, ചിലർ ഇല്ല എന്ന് പറയുന്നു, ഞാൻ അയ്യപ്പ സ്വാമിയിൽ നിന്ന് ദീക്ഷ സ്വീകരിക്കുമെന്ന് പറയുന്നു, ചിലർ ഞാൻ ശിവനെ ആരാധിക്കുമെന്ന് പറയുന്നു. ഇതെല്ലാം നമ്മൾ കാണുന്നുണ്ട്, അല്ലേ?” – രേവന്ത് റെഡ്ഡി പറഞ്ഞു.
അതേ സമയം രേവന്ത് റെഡ്ഡിയുടെ പ്രസ്താവന പുറത്തുവന്നയുടനെ ബിജെപി നേതാവ് ടി. രാജ സിംഗ് രൂക്ഷമായി പ്രതികരിച്ചു. ഇത് ഹിന്ദു ദേവതകളെ അപമാനിക്കുന്നതാണെന്ന് അദ്ദേഹം പറഞ്ഞു. കൂടാതെ റെഡ്ഡിയുടെ പ്രസ്താവനയ്‌ക്കെതിരെ സംസ്ഥാനത്തുടനീളം പ്രതിഷേധിക്കാൻ തെലങ്കാന ബിജെപിയും തീരുമാനിച്ചു. എന്നാൽ ഈ പ്രസ്താവനയെക്കുറിച്ച് കോൺഗ്രസ് ഇതുവരെ ഔദ്യോഗിക വിശദീകരണം നൽകിയിട്ടില്ല. നിലവിൽ രേവന്ത് റെഡ്ഡിയുടെ പ്രസ്താവന തെലങ്കാനയിൽ പുതിയ രാഷ്‌ട്രീയ കോളിളക്കത്തിന് കാരണമായിട്ടുണ്ട്.
