ശബരിമല: വെര്‍ച്വല്‍ ക്യു വഴി ശബരിമലയിലേക്ക് വരുന്ന ഭക്തര്‍ ബുക്ക് ചെയ്ത ദിവസം തന്നെ എത്തണമെന്ന് സന്നിധാനം സ്പെഷ്യല് പൊലീസ് ഓഫീസര്‍ (എസ്.ഒ) ആര്‍ ശ്രീകുമാര്‍. ബുക്ക് ചെയ്ത ദിവസമല്ലാതെ ആ ടോക്കണുമായി മറ്റൊരു ദിവസം എത്തുന്നത് തിരക്ക് നിയന്ത്രിക്കുന്നതില്‍ പ്രയാസം സൃഷ്ടിക്കുന്നുണ്ടെന്ന് അദ്ദേഹം പറഞ്ഞു.
സന്നിധാനത്തെ തിരക്ക് പരിഗണിച്ചാണ് നിലയ്‌ക്കലില്‍ നിന്ന് സ്‌പോട്ട് ബുക്കിംഗ് നല്‍കുന്നത്. സ്പെഷ്യല് കമ്മീഷണര്‍ എസ്.ഒയുമായി ആലോചിച്ചാണ് 5000 ത്തില്‍ കൂടുതലായുള്ള സ്‌പോട്ട് ബുക്കിംഗ് അനുവദിക്കുന്നത്. 8500 വരെ ഇത്തരത്തില്‍ ദിവസവും ശരാശരി നല്‍കാറുണ്ട്.ഡിസംബര്‍ 2ന് ഉച്ചയ്‌ക്ക് മൂന്ന് വരെ 8800 സ്‌പോട്ട് ബുക്കിംഗ് നല്‍കി. പുലര്‍ച്ചെ 12 ന് തുടങ്ങുന്ന ബുക്കിംഗ് 5000 കവിഞ്ഞാലും സന്നിധാനത്തെ തിരക്ക് കണക്കിലെടുത്ത ശേഷം അധികമായി നല്‍കും.
നിലവില്‍ സന്നിധാനത്ത് 1590 പൊലീസുകാരാണ് ഉള്ളതെന്ന് എസ്.ഒ പറഞ്ഞു. സ്വാമിമാര്‍ക്ക് സുഖദര്‍ശന സൗകര്യം ഒരുക്കാനാണ് കൂടുതല്‍ പൊലീസിനെ വിന്യസിച്ചത്.
തിരക്ക് കൈകാര്യം ചെയ്യുന്നതില്‍ സുപ്രധാനം പതിനട്ടാം പടിയിലെ നിയന്ത്രണമാണ് . മറ്റുള്ളിടത്ത് പൊലീസ് മൂന്ന് ടേണുകകളായി ജോലി ചെയ്യുമ്പോള്‍ പതിനട്ടാം പടിയില്‍ അത് എ, ബി, സി, ഡി എന്നിങ്ങനെ നാല് ടേണുകളാണുളളത്. ഒരേ സമയം 15 പൊലീസുകാരാണ് പതിനട്ടാം പടിയുടെ ഇരുവശത്തുമായി ഡ്യൂട്ടിയില്‍ ഉണ്ടാവുക. 15 വീതം മിനിറ്റ് വെച്ച് എ, ബി, സി, ഡി ക്കാര്‍ (ആകെ 60 പേര്‍) മാറി വരും. ഒരു മണിക്കൂര്‍ കഴിയുന്നതോടെ 60 പൊലീസുകാരും മാറി അടുത്ത 60 പേര്‍ വരും.
ഒരു മിനിറ്റില്‍ ശരാശരി 80 പേരെ പടി കടത്താന്‍ കഴിയുന്നുണ്ട്. എന്നാല്‍ ഭിന്നശേഷിക്കാര്‍, പ്രായമുള്ളവര്‍, കുഞ്ഞു മാളികപ്പുറങ്ങള്‍, മണികണ്ഠന്‍മാര്‍, ശരീരഭാരം കൂടിയവര്‍ എന്നിവരെ പതിനെട്ടാം പടി കയറാന്‍ സഹായിക്കുമ്പോള്‍ ഈ സമയക്രമം മാറും.
പുല്‍മേട് വഴി ദിനവും ശരാശരി 2500 പേര്‍ വരുന്നുണ്ട്. പതിനെട്ടാം പടി കയറാതെ സിവില്‍ ദര്‍ശനത്തിന് നിരവധി പേര്‍ എത്തുന്നുണ്ട്. സന്നിധാനത്തെ ആയിരക്കണക്കിന് വരുന്ന ജീവനക്കാരും കടകളിലെ തൊഴിലാളികളും ദര്‍ശനം നടത്തുന്നു. രാത്രി ഇരുമുടിയുമായി വന്നു അയ്യപ്പനെ തൊഴുന്ന സ്വാമിമാര്‍ പിറ്റേന്ന് രാവിലെ നെയ്യഭിഷേകം നടത്താന്‍ ഒരിക്കല്‍ കൂടി ദര്‍ശനത്തിന് വരുന്നുണ്ട്.
