തിരുവനന്തപുരം: ശംഖുമുഖത്ത് നടക്കുന്ന നാവികസേന ദിനാഘോഷങ്ങളില് പങ്കെടുക്കാന് രാഷ്ട്രപതി ദ്രൗപദി മുര്മു നാളെ കേരളത്തിലെത്തും. രാവിലെ തിരുവനന്തപുരം വിമാനത്താവളത്തിലെത്തുന്ന രാഷ്ട്രപതിയെ ഗവര്ണര് രാജേന്ദ്ര വിശ്വനാഥ് ആര്ലേക്കറുടെ നേതൃത്വത്തില് സ്വീകരിക്കും.
വൈകിട്ട് നാലിനാണ് നാവികസേനയുടെ ശക്തിപ്രകടനം. ചടങ്ങില് നാവികസേനാ മേധാവി അഡ്മിറല് ദിനേശ് കെ. ത്രിപാഠിയും പങ്കെടുക്കുന്നുണ്ട്. തിരുവനന്തപുരത്ത് ആദ്യമായാണ് നാവികസേനാ ദിനാഘോഷം സംഘടിപ്പിക്കുന്നത്.
ഭാരതം തദ്ദേശീയമായി നിര്മിച്ച ഐഎന്എസ് വിക്രാന്ത് ഉള്പ്പെടെയുള്ള ആത്യന്താധുനിക യുദ്ധക്കപ്പലുകളും യുദ്ധവിമാനങ്ങളും ഹെലികോപ്ടറുകളും നാളെ നടക്കുന്ന അഭ്യാസപ്രകടനത്തില് അണിനിരക്കും. ഐഎന്എസ് ഇംഫാല്, ഐഎന്എസ് കൊല്ക്കത്ത, ഐഎന്എസ് ത്രിശൂല്, ഐഎന്എസ് തല്വാര് എന്നിവയുള്പ്പെട്ട പടക്കപ്പലുകളും തീരത്തെത്തിയിട്ടുണ്ട്. പായ്ക്കപ്പലുകളായ ഐഎന്എസ് തരംഗിണി, ഐഎന്എസ് സുദര്ശിനി എന്നിവയും ശക്തിപ്രകടനത്തിന്റെ ഭാഗമാകും.
