ന്യൂദല്‍ഹി: രാജ്യത്തെ ഒരു വിദ്യാര്‍ത്ഥിക്ക് പോലും ഗുണനിലവാരമുള്ള വിദ്യാഭ്യാസം നിഷേധിക്കപ്പെടുന്നില്ലെന്ന് ഉറപ്പാക്കണമെന്ന് രാഷ്ട്രപതി ദ്രൗപദി മുര്‍മു. വിദ്യാഭ്യാസ സമ്പ്രദായത്തിന്റെ ജീവനാഡി അദ്ധ്യാപകരാണ്. സ്‌നേഹത്തിലൂടെയും സമര്‍പ്പണത്തിലൂടെയും വിദ്യാര്‍ത്ഥികളില്‍ അറിവും ധാര്‍മികതയും സഹാനുഭൂതിയും വളര്‍ത്തിയെടുക്കണം. ഏതെങ്കിലും കാരണത്താല്‍ അപകര്‍ഷതാബോധം അനുഭവിക്കുന്ന വിദ്യാര്‍ത്ഥികളുണ്ടെങ്കില്‍ അവരില്‍ ആത്മവിശ്വാസം വളര്‍ത്താനും അവരെ ഉയര്‍ത്തിക്കൊണ്ടുവരാനും അദ്ധ്യാപകര്‍ക്ക് പ്രത്യേക ഉത്തരവാദിത്തമുണ്ടെന്നും രാഷ്ട്രപതി പറഞ്ഞു. 2026ലെ ദേശീയ അദ്ധ്യാപക അവാര്‍ഡുകള്‍ക്ക് അഹര്‍ഹരായ 48 അദ്ധ്യാപകര്‍ക്ക് പുരസ്‌കാരങ്ങള്‍ സമ്മാനിക്കുകയായിരുന്നു രാഷ്ട്രപതി.
വിദ്യാഭ്യാസ സമ്പ്രദായത്തിന്റെ അടിത്തറ സ്‌കൂള്‍ വിദ്യാഭ്യാസമാണെന്നും അറിവും നൈപുണ്യവും ഏത് പ്രായത്തിലും ആര്‍ജ്ജിക്കാന്‍ കഴിയുമെങ്കിലും കുട്ടിക്കാലത്ത് നല്‍കുന്ന സദ്സ്വഭാവ പാഠങ്ങള്‍ കൂടുതല്‍ ഫലപ്രദമാണെന്നും രാഷ്ട്രപതി കൂട്ടിച്ചേര്‍ത്തു. ഭരണഘടന വിഭാവനം ചെയ്യുന്ന അവസരസമത്വം സാക്ഷാത്കരിക്കാനുള്ള ഏറ്റവും ഫലപ്രദമായ മാര്‍ഗം വിദ്യാഭ്യാസമാണ്. സാമ്പത്തികമായി പിന്നാക്കം നില്‍ക്കുന്നവര്‍, ഗ്രാമങ്ങളില്‍ നിന്ന് നഗരങ്ങളിലെ വലിയ സ്‌കൂളുകളിലേക്ക് എത്തുന്നവര്‍, ലജ്ജാശീലമുള്ളവര്‍, മികച്ച പ്രതിഭയുണ്ടെങ്കിലും ആത്മവിശ്വാസമില്ലാത്തവര്‍, ഭിന്നശേഷിക്കാര്‍ തുടങ്ങി ധാരാളം കുട്ടികളുണ്ട്. അവരിലെ അപകര്‍ഷതാബോധത്തെ മാറ്റി ആത്മവിശ്വാമുള്ളവരാക്കാനുള്ള ഉത്തരവാദിത്തം അദ്ധ്യാപകര്‍ക്ക് ഉണ്ട്.
ഭാരതത്തെ ലോകത്തിന്റെ നൈപുണ്യ തലസ്ഥാനവും വിജ്ഞാന മേഖലയിലെ ലോകശക്തിയും ആക്കുകയെന്നത് ദേശീയ മുന്‍ഗണനകളില്‍ ഒന്നാണ്. അതിനൊപ്പം വികസിത ഭാരതം എന്ന ലക്ഷ്യത്തിലേക്ക് മുന്നേറാനും ലോകോത്തര വിദ്യാഭ്യാസ സമ്പ്രദായത്തിലൂടെ മാത്രമേ സാധിക്കൂ. രാജ്യത്തിന്റെ വികസനത്തില്‍ അക്കാദമിക മികവിനും നൈപുണ്യ വികസനത്തിനും സംരംഭകത്വത്തിനും വലിയ പ്രാധാന്യമുണ്ടെന്നും രാഷ്ട്രപതി പറഞ്ഞു. പ്രൈമറി സ്‌കൂളുകളിലെ കൊഴിഞ്ഞുപോക്ക് നിരക്ക് കുറച്ചു കൊണ്ടുവരാനായതിലെ അദ്ധ്യാപകരുടെ അശ്രാന്ത പരിശ്രമത്തെയും രാഷ്ട്രപതി അഭിനന്ദിച്ചു. കേന്ദ്ര വിദ്യാഭ്യാസ മന്ത്രി പ്രള്‍ഹാദ് ജോഷിയും ചടങ്ങില്‍ പങ്കെടുത്തു. മുന്‍ രാഷ്ട്രപതി ഡോ. സര്‍വേപ്പള്ളി രാധാകൃഷ്ണന്റെ ജന്മദിനത്തില്‍ രാഷ്ട്രപതി ആദരാഞ്ജലിയും അര്‍പ്പിച്ചു. കേരളത്തില്‍ നിന്ന് പുരസ്‌കാരത്തിന് അര്‍ഹനായത് കണ്ണൂര്‍ ഇരിക്കൂര്‍ ജിഎച്ച്എസ്എസിലെ കെ.പി. സുനില്‍കുമാറാണ്.
