ഇസ്ലാമബാദ്: അസിം മുനീറിന്റെ സര്‍വ്വാധിപത്യത്തിന് ഏറ്റവും വലിയ ഭീഷണിയായി മാറുകയാണ് ഇമ്രാന്‍ ഖാന്‍. ജയിലില്‍ കഴിയുന്ന ഇമ്രാന്‍ഖാന്‍ പാകിസ്ഥാനിലെ പുറത്തു നടക്കുന്ന നേതാക്കളേക്കാള്‍ ഭീഷണിയായി മാറിയിരിക്കുകയാണ്. ഒരു നേതാവിനെ ജയിലിലടക്കാം, പക്ഷെ ഒരു ആശയത്തെ ജയിലിലടക്കാനാവില്ല എന്നതിന് ദൃഷ്ടാന്തമായിത്തീര്‍ന്നിരിക്കുന്നു ഇമ്രാന്‍ ഖാന്‍.
പാകിസ്ഥാനിലെ ജനങ്ങളുടെ വന്‍പിന്തുണയുള്ള നേതാവായ ഇമ്രാന്‍ ഖാന്‍ പാകിസ്ഥാനിലെ പട്ടാളമേധാവിയോടും അമേരിക്കയോടും പാകിസ്ഥാനിലെ ഷെഹ്ബാസ് ഷെരീഫ് ഭരണത്തോടും വിട്ടുവീഴ്ചയില്ലാത്ത സമരമാണ് നടത്തിയത്.
മുന്‍കാലങ്ങളിലെല്ലാം പാക് സൈന്യവുമായി നേരിട്ട് ഏറ്റുമുട്ടാന്‍ ഒരു രാഷ്‌ട്രീയനേതാവും പാകിസ്ഥാനില്‍ ഇതുവരെയും ഒരുമ്പെട്ടിട്ടില്ല. അതാണ് ഇപ്പോള്‍ ഇമ്രാന്‍ ഖാന്‍ തിരുത്തിയത്. പണ്ട് നവാസ് ഷെരീഫ് പാകിസ്ഥാനിലെ പട്ടാളമേധാവികളുമായി ഇടയുമ്പോള്‍ പാകിസ്ഥാന്‍ വിട്ട് അമേരിക്കയിലേക്കോ ബ്രിട്ടനിലേക്കോ പലായനം ചെയ്യാന്‍ അദ്ദേഹം ഒരുക്കമായിരുന്നു. അതായത് സൈന്യവുമായി ഒരു രഹസ്യഒത്തുതീര്‍പ്പിന് നവാസ് ഷെരീഫ് തയ്യാറായിരുന്നു എന്നര്‍ത്ഥം. ബേനസീര്‍ ഭൂട്ടോയും ഇതേ രീതിയാണ് അനുവര്‍ത്തിച്ചത്. പട്ടാളമേധാവികളുമായി ഇടയേണ്ടിവരുമ്പോള്‍ അവരുടെ ഇംഗിതത്തിന് വഴങ്ങി, ഒരു രഹസ്യ ഒത്തുതീര്‍പ്പ് ഫോര്‍മുലയുടെ ഭാഗമായി രാജ്യം വിട്ടുപോകാന്‍ ബേനസീര്‍ ഭൂട്ടോയും തയ്യാറായിരുന്നു. ജീവനില്‍ കൊതിയുള്ളതുകൊണ്ടാണ് അവര്‍ അങ്ങിനെ ചെയ്തുപോന്നിരുന്നത്. എന്നാല്‍ രാഷ്‌ട്രീയപാരമ്പര്യമില്ലാത്തിനാല്‍ ആയിരിക്കണം, ഇമ്രാന്‍ ഖാന്‍ അത്തരം രഹസ്യതീര്‍പ്പുകള്‍ക്കൊന്നും വഴങ്ങാന്‍ തയ്യാറല്ല.
ഇമ്രാന്‍ ഖാനോട് രാജ്യം വിട്ടുപോകാന്‍ പലതവണ അസിം മുനീറിന്റെ നേതൃത്വത്തില്‍ ആവശ്യപ്പെട്ടിട്ടും അദ്ദേഹം അതിന് വഴങ്ങിയിട്ടില്ല. അമേരിക്കയെപ്പോലും വെല്ലുവിളിച്ച ഭരണാധികാരിയായിരുന്നു ഇമ്രാന്‍ ഖാന്‍. അതിന്റെ ഭാഗമായി അമേരിക്ക തന്നെയാണ് ഇമ്രാന്‍ഖാന്റെ പതനത്തിന് കരുക്കള്‍ നീക്കിയത്. അവിശ്വാസപ്രമേയത്തിലൂടെയാണ് ഇമ്രാന്‍ഖാനെ അധികാരത്തില്‍ നിന്നും പുറത്താക്കിയത്. പകരം ഷെഹ്ബാസ് ഷെരീഫ് പാക് പ്രധാനമന്ത്രിയായി അധികാരത്തില്‍ എത്തി. ഇതിന് പിന്നിലും അമേരിക്കയുടെ കൈകള്‍ ഉണ്ട്. ഇപ്പോള്‍ അമേരിക്ക തന്നെ അസിം മുനീറിനെ ഷെഹ്ബാസ് ഷെരീഫിനും മുകളില്‍ പ്രതിഷ്ടിച്ച് അവരുടെ കാര്യങ്ങള്‍ നേടിയെടുക്കുകയാണ്.
900 ദിവസത്തോളമായി ഇമ്രാന്‍ഖാന്‍ ആദിയാല ജയിലില്‍ കഴിഞ്ഞുവരികയാണ്. ഇപ്പോള്‍ ഏകാന്തതടവില്‍ പാര്‍പ്പിച്ചിരിക്കുന്നു. രാജ്യംവിട്ടുപോകാനുള്ള അസിം മുനീറിന്റെ ഭീഷണിയ്‌ക്കും ആവശ്യത്തിനും ഇമ്രാന്‍ ഖാന്‍ ഇതുവരെ വഴങ്ങിയിട്ടില്ല. മരിച്ച നിലയില്‍ കിടക്കുന്ന ഇമ്രാന്‍ ഖാന്റെ ഒരു ഫോട്ടോ സമൂഹമാധ്യമങ്ങളില്‍ പ്രചരിക്കുകയും ഇമ്രാന്‍ ഖാനെ അസിം മുനീര്‍ വധിച്ചുവെന്ന ആരോപണം ഇമ്രാന്‍ഖാന്റെ സഹോദരിമാരും പാര്‍ട്ടി നേതാക്കളും ഉയര്‍ത്തിയതോടെ വലിയൊരു ആഭ്യന്തരകലാപത്തിലേക്ക് പാകിസ്ഥാന്‍ നീങ്ങുകയാണ്. ഇദ്ദേഹത്തിന്‍റ പാര്‍ട്ടിയായ പിടിഐയുടെ പ്രവര്‍ത്തകര്‍ പാകിസ്ഥാനിലെ പ്രധാന നഗരങ്ങളില്‍ കൂട്ടത്തോടെ തമ്പടിച്ചിരിക്കുകയാണ്. ഏത് നിമിഷവും ഇവര്‍ കലാപത്തിലേക്ക് നീങ്ങിയേക്കും.
സഹോദരിമാര്‍ക്കോ മക്കള്‍ക്കോ ഇതുവരെയും ഇമ്രാന്‍ ഖാനെ നേരിട്ട് കാണിച്ചുകൊടുക്കാന്‍ പാക് സര്‍ക്കാര്‍ തയ്യാറാവുന്നില്ല. ഇതോടെ പിടിഐ പ്രവര്‍ത്തകര്‍ക്കിടയില്‍ ഇമ്രാന്‍ഖാനെ വധിച്ചുവെന്ന ആരോപണം ശക്തിപ്പെടുകയാണ്. കലാപം തടയുന്നതിന്റെ ഭാഗമായി ഇമ്രാന്‍ ഖാന്റെ പാര്‍ട്ടിയായ പിടിഐ ഭരിയ്‌ക്കുന്ന ഖൈബര്‍ പക്തൂണ്‍ഖ്വാ പ്രവിശ്യയില്‍ അടിയന്തരാവസ്ഥപ്രഖ്യാപിക്കാനുള്ള നീക്കത്തിലാണ് അസിം മുനീര്‍. ഇവിടെ സൈന്യത്തെ വിന്യസിക്കാന്‍ പോവുകയാണ്. കാരണം ഈ പ്രവിശ്യയിലാണ് ഇമ്രാന്‍ ഖാന്‍ അനുയായികള്‍ ഏറ്റവും വലിയ അക്രമം ഉണ്ടാക്കാന്‍ സാധ്യത. പാക് പട്ടാളവുമായി ഏറ്റുമുട്ടാന്‍ തയ്യാറായി നില്‍ക്കുകയാണ് ഇമ്രാന്‍ ഖാന്‍ അനുയായികളായ ആയിരക്കണക്കായ സാധാരണക്കാര്‍. എന്തായാലും ജയിലിലെ ഇമ്രന്‍ഖാന്‍ പാകിസ്ഥാനിലെ സൈനിക മേധാവിത്വത്തിന് പോലും വലിയ ഭീഷണിയായി മാറിയിരിക്കുന്നു.
