തിരുവനന്തപുരം: വരവ് കുറയുകയും ആവശ്യക്കാര്‍ കൂടുകയും ചെയ്തതോടെ വിപണിയില്‍ പച്ചക്കറിക്ക് തീവിലയായി. മഴയെ തുടര്‍ന്ന് പച്ചക്കറികള്‍ക്ക് ഒരു മാസം മുമ്പ് വില കൂടിയിരുന്നുവെങ്കിലും പിന്നീട് കുറഞ്ഞിരുന്നു. എന്നാല്‍, മണ്ഡലകാലം ആരംഭിച്ചതോടെ വീണ്ടും വര്‍ദ്ധിച്ചു.
പച്ചക്കറികളുടെ ഉത്പാദന കേന്ദ്രങ്ങളില്‍ ഉണ്ടായ ശക്തമായ മഴയാണ് വീണ്ടും വിലകൂടാന്‍ കാരണമെന്നാണ് പറയുന്നത്. മൊത്തക്കച്ചവടക്കാരുടെ കടകളില്‍ 60 രൂപയുണ്ടായിരുന്ന മുരിങ്ങക്കായ 300 രൂപയായി ഉയര്‍ന്നു. ബീട്ട്‌റൂട്ട് മൊത്തവില 60 രൂപയാണ്. നീളന്‍ വഴുതന 50, കൊത്തമര 50, കോളിഫ്ളവര്‍ 50, എന്നിങ്ങിനെ പോകുന്നു ഹോള്‍സെയില്‍ വില.
കാരറ്റ് 60 രൂപയും തക്കാളി 50 രൂപയുമാണ് മൊത്തവില. ഒരാഴ്ച മുമ്പ് വരെ തക്കാളിക്ക് 20 രൂപയുണ്ടായിരുന്നതാണ് ഇപ്പോള്‍ 50 രൂപയായി വര്‍ദ്ധിച്ചിട്ടുള്ളത്. 20 രൂപയുണ്ടായിരുന്ന എളവന്‍ 30 രൂപയായി ഉയര്‍ന്നു. 30 രൂപയുണ്ടായിരുന്ന വെണ്ട 60 -70 നിലകളിലെത്തി. ഉരുളന്‍ കിഴങ്ങ് വില 60 രൂപയായി ഉയര്‍ന്നു. ഗുജറാത്ത് ഉരുളന്‍ കിഴങ്ങിന് 40 രൂപയാണ് മൊത്തവില. ചില്ലറ വില്‍പ്പന കടകളില്‍ എത്തുമ്പോള്‍ 10 -20 രൂപയുടെ വര്‍ദ്ധനവും കൂടി ഉണ്ടാകുന്നു.
ചെറിയ ഉള്ളി 60 രൂപയായി ഉയര്‍ന്നു. സവാള, ബീന്‍സ്, ചേന, ചേമ്പ്, ചെറു നാരങ്ങ തുടങ്ങിയവയ്‌ക്ക് വിലയില്‍ വലിയ മാറ്റമുണ്ടായിട്ടുണ്ട്. മണ്ഡലകാലമായതിനാല്‍ വില ഇനിയും ഉയരാനാണ് സാദ്ധ്യത.
