തിരുവനന്തപുരം: തെരഞ്ഞെടുപ്പ് കാലത്ത് കോണ്‍ഗ്രസിന് ഏറ്റ കനത്ത തിരിച്ചടിയാണ് രാഹുല്‍ മാങ്കൂട്ടത്തിലിനെതിരെയുള്ള യുവതിയുടെ പരാതി. രാഹുലിനെതിരെ യുവതിയുടെ ശബ്ദ സന്ദേശം കഴിഞ്ഞ ദിവസം പുറത്ത് വന്നു. ഗര്‍ഭം ധരിക്കാന്‍ പറയുകയും പിന്നീട് ഗര്‍ഭച്ഛിദ്രത്തിന് പ്രേരിപ്പിച്ചുവെന്ന് യുവതി ഡിജിറ്റല്‍ സന്ദേശത്തിലൂടെ വ്യക്തമാക്കിയിട്ടും പരാതി എവിടെ എന്നായിരുന്നു പ്രതിപക്ഷനേതാവ് വി.ഡി. സതീശനും മുന്‍ കെപിസിസി പ്രസിഡന്റ്‌രമേശ് ചെന്നിത്തലയും കെപിസിസി പ്രസിഡന്റ് സണ്ണി ജോസഫും ചോദിച്ചിരുന്നത്. എഐ സംവിധാനത്തിലൂടെയുള്ള ശബ്ദസന്ദേശമാണ് പുറത്ത് വന്നതെന്നായിരുന്നു ഷാഫി പറമ്പില്‍ എംപി പറഞ്ഞത്. ഇപ്പോള്‍ പരാതി നല്‍കിയപ്പോള്‍ മാധ്യമങ്ങള്‍ക്ക് മുന്നില്‍ നിന്നും ഓടി മാറുകയാണ് വി.ഡി. സതീശന്‍. നിയമം അതിന്റെ വഴിക്കു നീങ്ങട്ടെയെന്ന് കെ. മുരളീധരനും സണ്ണി ജോസഫും പറഞ്ഞു.
ലൈംഗിക പീഡന ആരോപണം പുറത്ത് വന്നതോടെ രാഹുലിനെ പാര്‍ട്ടി സ്ഥാനങ്ങളില്‍ നിന്നും ഒഴിവാക്കിയിരുന്നു. മാതൃകാപരമെന്നാണ് കോണ്‍ഗ്രസ് നേതാക്കള്‍ ഇതിനെ വിശേഷിപ്പിച്ചത്. ഇത് സംബന്ധിച്ച് നിയമസഭയില്‍ ആരോപണം ഉയര്‍ന്നപ്പോള്‍ മുഖ്യമന്ത്രി പറഞ്ഞത് ഒരാളുടെ ആരോപണം മാത്രമല്ല ഒരുകൂട്ടം പേരുടെ ആരോപണം ഉണ്ടെന്നായിരുന്നു. ഇതോടെ കോണ്‍ഗ്രസ് നേതാക്കള്‍ ആരോപണങ്ങളില്‍ നിന്നും പിന്‍വാങ്ങാന്‍ അതിജീവിതയില്‍ സമ്മര്‍ദ്ദം ചെലുത്തിയിരുന്നു.
