നവംബര് 26 ഓരോ ഭാരതീയനും അഭിമാനത്തിന്റെ ദിവസമാണ്. 1949-ല് ഇതേ ദിവസമാണ് ഭരണഘടനാ അസംബ്ലി ഇന്ത്യന് ഭരണഘടന അംഗീകരിച്ചത്. വ്യക്തതയോടും ബോധ്യത്തോടും കൂടി രാജ്യത്തിന്റെ പുരോഗതിയെ നയിക്കുന്ന ഒരു വിശുദ്ധ രേഖയാണിത്. അതുകൊണ്ടാണ്, ഏകദേശം ഒരു ദശാബ്ദം മുമ്പ്, 2015-ല്, എന്ഡിഎ സര്ക്കാര് നവംബര് 26 ഭരണഘടനാ ദിനമായി ആചരിക്കാന് തീരുമാനിച്ചത്.
എളിയ പശ്ചാത്തലത്തിലും സാമ്പത്തികമായി പിന്നാക്കം നില്ക്കുന്നതുമായ ഒരു കുടുംബത്തില് നിന്നുള്ള എന്നെപ്പോലുള്ള ഒരു വ്യക്തിയെ 24 വര്ഷത്തിലേറെ തുടര്ച്ചയായി സര്ക്കാരിന്റെ തലവനായി സേവിക്കാന് പ്രാപ്തമാക്കിയത് നമ്മുടെ ഭരണഘടനയുടെ ശക്തിയാണ്. 2014-ല്, ആദ്യമായി പാര്ലമെന്റില് വന്ന്, ജനാധിപത്യത്തിന്റെ ഏറ്റവും വലിയ ക്ഷേത്രത്തിന്റെ പടികള് തൊട്ട് വണങ്ങിയ നിമിഷങ്ങള് ഞാന് ഇപ്പോഴും ഓര്ക്കുന്നു. വീണ്ടും, 2019-ല്, തെരഞ്ഞെടുപ്പ് ഫലത്തിന് ശേഷം, സംവിധാന് സദന്റെ സെന്ട്രല് ഹാളില് പ്രവേശിച്ചപ്പോള്, ആദരസൂചകമായി ഭരണഘടനയെ വണങ്ങി ഞാന് നെറ്റിയില് വച്ചു. ഈ ഭരണഘടന എന്നെപ്പോലെ തന്നെ നിരവധി പേര്ക്ക് സ്വപ്നം കാണാനും അതിനായി പ്രവര്ത്തിക്കാനുമുള്ള ശക്തി നല്കിയിട്ടുണ്ട്.
ഭരണഘടനാ ദിനത്തില്, ഭരണഘടനാ നിര്മ്മാണത്തിന് സംഭാവന നല്കിയ ഡോ. രാജേന്ദ്ര പ്രസാദ് അധ്യക്ഷനായ ഭരണഘടനാ അസംബ്ലിയിലെ എല്ലാ പ്രചോദനാത്മക അംഗങ്ങളെയും ഞങ്ങള് ഓര്ക്കുന്നു. ദീര്ഘവീക്ഷണത്തോടെ ഡ്രാഫ്റ്റിങ് കമ്മിറ്റിയുടെ അധ്യക്ഷനായ ഡോ. ബാബാസാഹേബ് അംബേദ്കറുടെ ശ്രമങ്ങളെ ഞങ്ങള് ഓര്ക്കുന്നു. ഭരണഘടനാ അസംബ്ലിയിലെ നിരവധി വിശിഷ്ട വനിതാ അംഗങ്ങള് അവരുടെ ചിന്തനീയമായ ഇടപെടലുകളും ദാര്ശനിക വീക്ഷണങ്ങളും കൊണ്ട് ഭരണഘടനയെ സമ്പന്നമാക്കി.
എന്റെ ചിന്തകള് 2010 ലേക്ക് പോകുന്നു. ഭാരത ഭരണഘടന 60 വര്ഷം പൂര്ത്തിയാക്കിയ വേളയായിരുന്നു അത്. ദുഃഖകരമെന്നു പറയട്ടെ, ദേശീയ തലത്തില് അര്ഹിക്കുന്ന ശ്രദ്ധ ആ അവസരത്തിന് ലഭിച്ചില്ല. എന്നാല്, ഭരണഘടനയോടുള്ള ഞങ്ങളുടെ നന്ദിയും പ്രതിബദ്ധതയും പ്രകടിപ്പിക്കാന്, ഗുജറാത്തില് ഒരു ‘സംവിധാന് ഗൗരവ് യാത്ര’ സംഘടിപ്പിച്ചു. നമ്മുടെ ഭരണഘടനയെ ആനപ്പുറത്തേറ്റി, ജീവിതത്തിന്റെ നാനാ തുറകളില് നിന്നുള്ള നിരവധി പേര്ക്കൊപ്പം ഘോഷയാത്രയുടെ ഭാഗമാകാനുള്ള അവസരം എനിക്കും ലഭിച്ചു.
ഭരണഘടന 75 വര്ഷം പൂര്ത്തിയാക്കിയപ്പോള്, ഇത് ഭാരതത്തിലെ ജനങ്ങള്ക്ക് അസാധാരണമായ ഒരു നാഴികക്കല്ലായിരിക്കണമെന്ന് ഞങ്ങള് തീരുമാനിച്ചു. ഈ ചരിത്ര മുഹൂര്ത്തത്തിന്റെ സ്മരണയ്ക്കായി പാര്ലമെന്റിന്റെ ഒരു പ്രത്യേക സമ്മേളനം സംഘടിപ്പിക്കാനും രാജ്യവ്യാപകമായി പരിപാടികള് ആരംഭിക്കാനും ഭാഗ്യം ലഭിച്ചു. ഈ പരിപാടികളില് റെക്കോര്ഡ് പൊതുജന പങ്കാളിത്തം ഉണ്ടായിരുന്നു. ഈ വര്ഷത്തെ ഭരണഘടനാ ദിനം പല കാരണങ്ങളാല് സവിശേഷമാണ്.
സര്ദാര് വല്ലഭ്ഭായ് പട്ടേലിന്റെയും ഭഗവാന് ബിര്സ മുണ്ടയുടെയും 150-ാം ജന്മവാര്ഷികമാണിത്. ഇരുവരും നമ്മുടെ രാഷ്ട്രത്തിന് മഹത്തായ സംഭാവനകള് നല്കി. സര്ദാര് പട്ടേലിന്റെ ദീര്ഘവീക്ഷണത്തോടെയുള്ള നേതൃത്വം ഭാരതത്തിന്റെ രാഷ്ട്രീയ ഏകീകരണം ഉറപ്പാക്കി. അനുഛേദം 370, 35(എ) എന്നിവയ്ക്കെതിരെ പ്രവര്ത്തിക്കാനുള്ള ഞങ്ങളുടെ ചുവടുവയ്പ്പുകളെ നയിച്ചത് അദ്ദേഹത്തിന്റെ പ്രചോദനവും ബോധ്യത്തില് നിന്നുള്ള ധൈര്യവുമാണ്. ജമ്മു-കശ്മീരില് ഇപ്പോള് ഭാരത ഭരണഘടന പൂര്ണ്ണമായും പ്രാബല്യത്തില് വന്നിരിക്കുന്നു, ജനങ്ങള്ക്ക്, പ്രത്യേകിച്ച് സ്ത്രീകള്ക്കും പാര്ശ്വവത്കരിക്കപ്പെട്ട സമൂഹങ്ങള്ക്കും എല്ലാ ഭരണഘടനാ അവകാശങ്ങളും ഉറപ്പാക്കുന്നു. നമ്മുടെ ഗോത്ര സമൂഹങ്ങള്ക്ക് നീതി, അന്തസ്സ്, ശാക്തീകരണം എന്നിവ ഉറപ്പാക്കാനുള്ള രാജ്യത്തിന്റെ ദൃഢനിശ്ചയത്തിന് ഭഗവാന് ബിര്സ മുണ്ടയുടെ ജീവിതം പ്രചോദനമേകുന്നു.
ഈ വര്ഷം, വന്ദേമാതരത്തിന്റെ 150-ാം വാര്ഷികവും നാം ആഘോഷിക്കുന്നു, ആ വാക്കുകള് യുഗങ്ങളായി നമ്മുടെ ദൃഢനിശ്ചയവുമായി പ്രതിധ്വനിക്കുന്നു. അതേ സമയം, ധൈര്യം, കാരുണ്യം, ശക്തി എന്നിവയാല് നമ്മെ പ്രകാശിപ്പിക്കുന്ന ഗുരു തേജ് ബഹാദൂറിന്റെ 350-ാം രക്തസാക്ഷിത്വ വാര്ഷികവും നാം അനുസ്മരിക്കുന്നു. ഈ വ്യക്തിത്വങ്ങളും നാഴികക്കല്ലുകളുമെല്ലാം നമ്മുടെ കടമകളുടെ പ്രാധാന്യം ഓര്മ്മിപ്പിക്കുന്നു, ഭരണഘടനയിലെ അനുച്ഛേദം 51അ-ല് മൗലിക കടമകളെക്കുറിച്ചുള്ള ഒരു സമര്പ്പിത അധ്യായത്തിലൂടെ ഇത് ഊന്നിപ്പറയുന്നു. സാമൂഹികവും സാമ്പത്തികവുമായ പുരോഗതി എങ്ങനെ കൂട്ടായി കൈവരിക്കാമെന്നതിലേക്ക് ഈ കടമകള് നമ്മെ നയിക്കുന്നു. മഹാത്മാഗാന്ധി എപ്പോഴും ഒരു പൗരന്റെ കടമകളെ ഊന്നിപ്പറഞ്ഞിരുന്നു. ഒരു കടമ നന്നായി നിര്വഹിക്കുമ്പോള് അതിനനുസൃതമായി അവകാശം സൃഷ്ടിക്കുന്നുവെന്നും യഥാര്ത്ഥ അവകാശങ്ങള് കടമനിര്വഹണത്തിന്റെ പ്രതിഫലമാണെന്നും അദ്ദേഹം വിശ്വസിച്ചു.
ഈ നൂറ്റാണ്ട് ആരംഭിച്ചിട്ട് 25 വര്ഷം കഴിഞ്ഞു. വെറും രണ്ട് പതിറ്റാണ്ടിനുള്ളില്, കൊളോണിയല് ഭരണത്തില് നിന്ന് സ്വാതന്ത്ര്യം ലഭിച്ചതിന്റെ 100 വര്ഷം നാം ആഘോഷിക്കും. 2049-ല്, ഭരണഘടന അംഗീകരിക്കപ്പെട്ടിട്ട് നൂറ് വര്ഷം തികയും. നമ്മള് രൂപപ്പെടുത്തുന്ന നയങ്ങളും, ഇന്ന് നമ്മള് എടുക്കുന്ന തീരുമാനങ്ങളും, നമ്മുടെ കൂട്ടായ പ്രവര്ത്തനങ്ങളും വരും തലമുറകളുടെ ജീവിതത്തെ രൂപപ്പെടുത്തും. ഇതില് നിന്ന് പ്രചോദനം ഉള്ക്കൊണ്ട്, വികസിത ഭാരതം എന്ന സ്വപ്നം സാക്ഷാത്കരിക്കാന് നാം മുന്നോട്ട് പോകുമ്പോള്, നമ്മുടെ രാഷ്ട്രത്തോടുള്ള കടമകള് മനസ്സില് എപ്പോഴും പ്രഥമ സ്ഥാനത്ത് വയ്ക്കണം.
നമ്മുടെ രാജ്യം നമുക്ക് വളരെയേറെ നല്കിയിട്ടുണ്ട്, ഇത് നമ്മുടെ ഉള്ളില് നിന്ന് ആഴത്തിലുള്ള കൃതജ്ഞത പ്രകടിപ്പിക്കാന് കാരണമാകുന്നു. ഈ വികാരത്തോടെ ജീവിക്കുമ്പോള്, കടമകള് നിറവേറ്റുന്നത് നമ്മുടെ സ്വഭാവത്തിന്റെ അവിഭാജ്യ ഘടകമായി മാറുന്നു.
ഉത്തരവാദിത്തങ്ങള് നിര്വഹിക്കുമ്പോള്, ഓരോ ജോലിയിലും പൂര്ണ്ണ ശേഷിയും സമര്പ്പണവും ഉള്പ്പെടുത്തേണ്ടത് അനിവാര്യമാണ്. നമ്മുടെ ഓരോ പ്രവൃത്തിയും ഭരണഘടനയെ ശക്തിപ്പെടുത്തുകയും ദേശീയ ലക്ഷ്യങ്ങളും താല്പര്യങ്ങളും മുന്നോട്ട് കൊണ്ടുപോവുകയും വേണം. ഭരണഘടനാ ശില്പികള് വിഭാവനം ചെയ്ത സ്വപ്നങ്ങള് നിറവേറ്റേണ്ടത് നമ്മുടെ ഉത്തരവാദിത്തമാണ്. ഈ കര്ത്തവ്യബോധത്തോടെ പ്രവര്ത്തിക്കുമ്പോള്, രാജ്യത്തിന്റെ സാമൂഹികവും സാമ്പത്തികവുമായ പുരോഗതി പലമടങ്ങ് വര്ദ്ധിക്കും.
ഭരണഘടന നമുക്ക് വോട്ടവകാശം നല്കിയിട്ടുണ്ട്. പൗരന്മാര് എന്ന നിലയില്, നമ്മള് രജിസ്റ്റര് ചെയ്തിട്ടുള്ള ദേശീയ, സംസ്ഥാന, തദ്ദേശ തെരഞ്ഞെടുപ്പുകളില് വോട്ടുചെയ്യാനുള്ള അവസരം നഷ്ടപ്പെടുത്താതിരിക്കേണ്ടത് നമ്മുടെ കടമയാണ്. മറ്റുള്ളവരെ പ്രചോദിപ്പിക്കുന്നതിനായി, 18 വയസ്സ് തികയുന്ന യുവാക്കളെ ആഘോഷിക്കുന്നതിനായി എല്ലാ നവംബര് 26 നും സ്കൂളുകളിലും കോളജുകളിലും പ്രത്യേക ചടങ്ങുകള് സംഘടിപ്പിക്കുന്നതിനെക്കുറിച്ച് നമുക്ക് ചിന്തിക്കാം. അങ്ങനെ, കന്നിവോട്ടര്മാര്ക്ക് അവര് വിദ്യാര്ത്ഥികള് എന്നതിനപ്പുറം, രാഷ്ട്രനിര്മ്മാണ പ്രക്രിയയില് സജീവ പങ്കാളികളാണെന്നും തോന്നും.
നമ്മുടെ യുവാക്കളെ ഉത്തരവാദിത്തബോധവും അഭിമാനവും കൊണ്ട് പ്രചോദിപ്പിക്കുമ്പോള്, അവര് ജീവിതത്തിലുടനീളം ജനാധിപത്യത്തിന്റെ മൂല്യങ്ങളോട് പ്രതിജ്ഞാബദ്ധരായി തുടരും. ഈ പ്രതിബദ്ധതയാണ് ശക്തമായ ഒരു രാഷ്ട്രത്തിന്റെ അടിത്തറ. ഈ ഭരണഘടനാ ദിനത്തില്, ഈ മഹത്തായ രാഷ്ട്രത്തിന്റെ പൗരന്മാര് എന്ന നിലയില് നമ്മുടെ കടമകള് നിറവേറ്റാനുള്ള പ്രതിജ്ഞ വീണ്ടും ഉറപ്പിക്കാം. അങ്ങനെ ചെയ്യുന്നതിലൂടെ, വികസിതവും ശാക്തീകരിക്കപ്പെട്ടതുമായ ഒരു വികസിത ഭാരതത്തിന്റെ നിര്മ്മാണത്തിന് നമുക്കെല്ലാവര്ക്കും അര്ത്ഥവത്തായ സംഭാവനകള് നല്കാന് കഴിയും.
