കോഴിക്കോട്: ലേബര്‍ കോഡുകള്‍ തൊഴിലാളികള്‍ക്ക് ഗുണകരമായ പരിഷ്‌കാരമാണെന്ന് ബിജെപി മുന്‍ സംസ്ഥാന അധ്യക്ഷന്‍ കെ. സുരേന്ദ്രന്‍ പറഞ്ഞു.
ശബരിമല ക്ഷേത്രം സംരക്ഷിക്കണമെന്നാവശ്യപ്പെട്ട് കോഴിക്കോട് വളയനാട് ക്ഷേത്രപരിസരത്ത് ബിജെപി സംഘടിപ്പിച്ച ഭക്തജന കൂട്ടായ്‌മയില്‍ ഒപ്പുശേഖരണം ഉദ്ഘാടനം ചെയ്യുകയായിരുന്നു അദ്ദേഹം.
തൊഴിലാളികളുടെ ന്യായമായ അവകാശങ്ങള്‍ പരിരക്ഷിക്കുന്നതാണ് ലേബര്‍ കോഡ്. തൊഴിലാളി സമൂഹത്തെ ഒരു തരത്തിലും ദോഷകരമായി ഇത് ബാധിക്കില്ല. എന്നാല്‍ ചില തൊഴിലാളി യൂണിയനുകളെ ഇത് ബാധിക്കുമായിരിക്കാം. അത്തരം തൊഴിലാളി യൂണിയനുകളുടെ പ്രതിഷേധം ബിജെപി കണക്കിലെടുക്കുന്നില്ല. അദ്ദേഹം പറഞ്ഞു.
ശബരിമല സ്വര്‍ണക്കൊള്ളക്കേസില്‍ തന്ത്രിമാരെ ചോദ്യം ചെയ്യുന്നതിന് മുമ്പ് പ്രത്യേക അന്വേഷണ സംഘം മുന്‍ ദേവസ്വം മന്ത്രി കടകംപള്ളി സുരേന്ദ്രനെ അറസ്റ്റ് ചെയ്യുകയാണ് വേണ്ടത്. ആദ്യം അറസ്റ്റുചെയ്ത മുരാരിബാബു, ഉണ്ണികൃഷ്ണന്‍ പോറ്റി എന്നിവര്‍ നല്‍കിയ മൊഴികളുടെ അടിസ്ഥാനത്തില്‍ കടകംപള്ളിയെ അറസ്റ്റ് ചെയ്യേണ്ടതായിരുന്നു. അന്വേഷണ സംഘം യഥാര്‍ത്ഥ വിവരങ്ങള്‍ ഹൈക്കോടതിയില്‍ നിന്ന് മറച്ചുവെയ്‌ക്കുകയാണ്. പിണറായി വിജയന്റെ മനസ്സാക്ഷിസൂക്ഷിപ്പുകാരനാണ് കടകംപള്ളി. സിപിഎമ്മും മുഖ്യമന്ത്രിയും അറിയാതെ സ്വര്‍ണക്കൊള്ള നടക്കില്ലെന്ന് അദ്ദേഹം പറഞ്ഞു.
