മലപ്പുറം : വെല്‍ഫയര്‍ പാര്‍ട്ടിയുമായി തദ്ദേശ തെരഞ്ഞെടുപ്പില്‍ പ്രാദേശിക നീക്കുപോക്കുണ്ടെന്ന് മുസ്ലിം ലീഗ് സംസ്ഥാന അധ്യക്ഷന്‍ പാണക്കാട് സയിദ് സാദിഖലി ശിഹാബ് തങ്ങള്‍. എന്നാല്‍ സഖ്യമില്ല.യുഡിഎഫിനോടുള്ള നിലപാടില്‍ അവരാണ് മാറ്റം വരുത്തിയത്. നേരത്തേ എല്‍ഡിഎഫുമായി സഹകരിച്ച ജമാഅത്തെ ഇസ്‌ലാമി ഇപ്പോള്‍ യുഡിഎഫുമായി സഹകരിക്കുന്നുവെന്ന് മാത്രമെയുളളൂ.
തനിക്ക് ഖാസിയാകാന്‍ യോഗ്യതയില്ലെന്ന് ഉമര്‍ ഫൈസി മുക്കം പരോക്ഷമായി വിമര്‍ശിച്ചതിന് മറുപടിയായി തന്നെ ഖാസിയാക്കിയത് സമുദായ നേതൃത്വമാണെന്നും പാണക്കാട് സയിദ് സാദിഖലി ശിഹാബ് തങ്ങള്‍ പറഞ്ഞു.വിമര്‍ശനം ഉന്നയിക്കുന്നവര്‍ ഓരോ സമയത്തെ മനോനില അനുസരിച്ച് പറയുന്നതാണ്. ഉമര്‍ ഫൈസിയുടെ വിമര്‍ശനം സമസ്തയുടെ വിമര്‍ശമല്ലെന്നും സാദിഖലി തങ്ങള്‍ വ്യക്തമാക്കി.
നിയമസഭാ തെരഞ്ഞെടുപ്പില്‍ മുസ്ലിം ലീഗിന്റെ നിലവിലെ എംഎല്‍എമാരില്‍ പലരും മാറും. ടേം വ്യവസ്ഥ നടപ്പിലാക്കാതെയും ആളുകളെ മാറ്റാം. എംഎല്‍എമാരുടെ പ്രകടനവും ജനങ്ങളുമായുള്ള ബന്ധവും പരിഗണിക്കും.ചിലര്‍ സ്വയം മാറാന്‍ തയാറായിട്ടുണ്ടെന്ന് സാദിഖലി തങ്ങള്‍ പറഞ്ഞു.
നിലവിലെ കോണ്‍ഗ്രസ് സംസ്ഥാന നേതൃത്വത്തെ കുറിച്ച് മുസ്ലീം ലീഗിന്റെ അഭിപ്രായം ഹൈക്കമാന്റിനെ അറിയിച്ചിട്ടുണ്ടെന്ന് സാദിഖലി തങ്ങള്‍ പറഞ്ഞു. മുന്നണി ബന്ധവും നേതൃത്വവും ശക്തമാക്കണണമെന്നും പാണക്കാട് സയിദ് സാദിഖലി ശിഹാബ് തങ്ങള്‍ വ്യക്തമാക്കി.
