ആലപ്പുഴ: തദ്ദേശ തെരഞ്ഞെടുപ്പില്‍ മുസ്ലീം തീവ്രവാദ പ്രസ്ഥാനങ്ങളുടെ വോട്ട് ഉറപ്പിക്കാന്‍ സിപിഎം, കോണ്‍ഗ്രസ് മത്സരം. യുഡിഎഫ് പരസ്യമായി വെല്‍ഫയര്‍ പാര്‍ട്ടിയുമായി ധാരണ പ്രഖ്യാപിച്ചപ്പോള്‍ സിപിഎമ്മാകട്ടെ നിരോധിത ഭീകരസംഘടനയായ പോപ്പുലര്‍ ഫ്രണ്ടിന്റെ രാഷ്‌ട്രീയ മുഖമായ എസ്ഡിപിഐയുമായും വെല്‍ഫെയര്‍ പാര്‍ട്ടിയുമായും പതിവുപോലെ രഹസ്യധാരണക്കുള്ള അടവുനയങ്ങളാണ് സ്വീകരിക്കുന്നത്. തങ്ങള്‍ മത്സരിക്കാത്ത സ്ഥലങ്ങളില്‍ ബിജെപി യെ തോല്‍പിക്കാന്‍ കഴിയുന്ന മുന്നണികള്‍ക്ക് വോട്ടുചെയ്യുമെന്ന് മതതീവ്രവാദ സംഘടനകള്‍ പരസ്യമായി പ്രഖ്യാപിച്ചിട്ടുണ്ട്.
ഇടതുവലതു മുന്നണികള്‍ക്കുള്ള പരസ്യ ഓഫറാണ് ഈ സംഘടനകള്‍ നല്‍കിയിട്ടുള്ളത്. കുടുതല്‍ സ്ഥലങ്ങളില്‍ പിന്തുണ നേടിയെടുക്കുന്ന കാര്യത്തിലാണ് ഇരുമുന്നണികളുമായി മത്സരം നടക്കുന്നത്. കഴിഞ്ഞ പാലക്കാട് ഉപതെരഞ്ഞെടുപ്പില്‍ യുഡിഎഫിനാണ് ഇതില്‍ വിജയിക്കാനായത്. അതിന്റെ നേട്ടം അവര്‍ക്ക് ലഭിക്കുകയും ചെയ്തു. ഇതെത്തുടര്‍ന്ന് വെല്‍ഫയര്‍ പാര്‍ട്ടിയുമായി പരസ്യബന്ധത്തിന് തയ്യാറാകുമെന്ന് പ്രതിപക്ഷ നേതാവുള്‍പ്പടെയുള്ള കോണ്‍ഗ്രസ് നേതാക്കള്‍ പ്രതികരിക്കുകയും ചെയ്തിരുന്നു. എന്നാല്‍ ഇത് മുസ്ലീം സമൂഹത്തില്‍ തങ്ങള്‍ക്കുള്ള സ്വാധീനത്തിന് ഇടിവുണ്ടാക്കുകയും വിലപേശല്‍ ശേഷി കുറയ്‌ക്കുകയും ചെയ്യുമെന്ന് തിരിച്ചറിഞ്ഞ മുസ്ലീം ലീഗ് ഈ നീക്കത്തെ എതിര്‍ക്കുകയും രഹസ്യ നീക്കുപോക്കിന് സമ്മതിക്കുകയുമായിരുന്നു. കാലങ്ങളായി വടക്കന്‍ കേരളത്തില്‍ ലീഗിന്റെ നേതൃത്വത്തില്‍ ഇത്തരത്തിലാണ് തെരഞ്ഞെടുപ്പിനെ നേരിടുന്നത്.
പൗരത്വ ഭേദതഗതി നിയമം ഉള്‍പ്പെടെയുള്ള വിഷയങ്ങള്‍ ആളിക്കത്തിച്ച് മുസ്ലീം മതവികാരം തങ്ങള്‍ക്കനുകൂലമാക്കി മാറ്റാന്‍ എല്ലാവിധ തീവ്രസംഘടനകളുമായും കൈകോര്‍ത്ത സിപിഎമ്മിനും ഇടതുപക്ഷത്തിനും ലോക്സഭാ തെരഞ്ഞെടുപ്പില്‍ കനത്ത തിരിച്ചടിയാണുണ്ടായത്. കൈപൊള്ളിയ സിപിഎം, അയ്യപ്പസംഗമം അടക്കമുള്ള അടവുകളുമായി രംഗത്തെത്തിയെങ്കിലും ശബരിമല സ്വര്‍ണക്കവര്‍ച്ചയും തുടര്‍വിവാദങ്ങളും തിരിച്ചടിയായി. ദേവസ്വം ബോര്‍ഡ് പ്രസിഡന്റും അംഗങ്ങളും ഉള്‍പ്പടെയുള്ളവര്‍ ആരോപണവിധേയരാകുകയും മുന്‍ ദേവസ്വം മന്ത്രിയിലേക്ക് വരെ അന്വേഷണം എത്തുകയും ചെയ്യുന്ന സാഹചര്യത്തിലേക്കുമാണ് കാര്യങ്ങള്‍ പോകുന്നത്.
പാര്‍ട്ടിയില്‍ നിന്ന് അകന്ന, പരമ്പരാഗതമായി പിന്തുണച്ചിരുന്ന സമൂഹങ്ങളെ വീണ്ടും അടുപ്പിക്കാനുള്ള ശ്രമങ്ങളും വിജയം കാണാത്ത സാഹചര്യത്തില്‍ ഏതു ഭീകര സംഘടനകളെയും കൂട്ടുപിടിച്ച് തെരഞ്ഞെടുപ്പിനെ നേരിടുക എന്ന തന്ത്രമാണ് സിപിഎം പയറ്റുന്നത്. തദ്ദേശ തെരഞ്ഞെടുപ്പ് ഫലം ഉടന്‍ വരുന്ന നിയമസഭാ തെരഞ്ഞെടുപ്പിനെ സ്വാധീനിക്കുന്ന സാഹചര്യത്തില്‍ ഇടതുവലതു മുന്നണികള്‍, എസ്ഡിപിഐയേയും, വെല്‍ഫെയര്‍ പാര്‍ട്ടിയേയും എങ്ങിനെയും പ്രീണിപ്പിക്കാന്‍ മത്സരമാണ്. എല്ലാവരുടെയും പൊതുശത്രു ബിജെപി ആയതിനാല്‍ അടവുനയത്തില്‍ ആരു വിജയിക്കുമെന്ന് കണ്ടറിയണം.
