വൈപ്പിന്‍: മുനമ്പത്തെ ഭൂമി വഖഫിന്റേതല്ലെന്ന് ഹൈക്കോടതി ഡിവിഷന്‍ ബെഞ്ച് ഉത്തരവിട്ടിട്ടും ഭൂവുടമകള്‍ക്ക് നികുതി അടയ്‌ക്കാനുള്ള സൗകര്യം ഒരുക്കാന്‍ ശ്രമിക്കാത്ത സര്‍ക്കാര്‍ വഖഫ് ബോര്‍ഡിനു വേണ്ടി ഒളിച്ചുകളിക്കുകയാണെന്ന് മുനമ്പം ഭൂസംരക്ഷണ സമിതി ആരോപിച്ചു.
ഇത് തുടര്‍ന്നാല്‍ സമരത്തിന്റെ മുഖം മാറുമെന്ന് സര്‍ക്കാരിന് സമിതി മുന്നറിയിപ്പ് നല്‍കി.കോടതി ഉത്തരവ് വന്നതോടെ ഭൂമിയുടെ കരം അടയ്‌ക്കുന്നതിനും ക്രയവിക്രയം നടത്തുന്നതിനും യാതൊരു നിയമതടസവുമില്ല. എന്നാല്‍ അതിനുളള നിര്‍ദേശം വില്ലേജ് അധികാരികള്‍ക്ക് നല്‍കിയിട്ടില്ല. ഇതില്‍ ദുരൂഹതയുണ്ടെന്ന് മുനമ്പം ഭൂസംരക്ഷണ സമിതി പറഞ്ഞു. ഇതിനിടെ സര്‍ക്കാര്‍ നിയന്ത്രണത്തിലുള്ള വഖഫ് ബോര്‍ഡ് ഹൈക്കോടതി വിധി അസ്ഥിരപ്പെടുത്താന്‍ റിവ്യു ഹര്‍ജി സമര്‍പ്പിക്കാന്‍ നീക്കം നടത്തുന്നുണ്ട്.
മുനമ്പം നിവാസികളെ സര്‍ക്കാര്‍ കബളിപ്പിക്കുകയാണ്. മുനമ്പം നിവാസികള്‍ക്കുവേണ്ടി വഖഫ് ട്രൈബ്യൂണലില്‍ ഫയല്‍ ചെയ്ത ഹര്‍ജി എത്രയും വേഗം തീര്‍പ്പാക്കാനും സര്‍ക്കാര്‍ നടപടി സ്വീകരിക്കണമെന്ന് ഭൂസംരക്ഷണ സമിതി ആവശ്യപ്പെട്ടു.
