മുംബൈ: ഈ പ്രായത്തിലും പ്രധാനമന്ത്രി മോദിയുടെ ചര്‍മ്മം തിളങ്ങുന്നത് എന്തുകൊണ്ടാണ് എന്ന ചോദ്യം മോദിയോട് ചോദിച്ചത് ഹാര്‍ലീന്‍ ഡിയോള്‍ ആണ്. വനിതാ ഏകദിന ലോകകപ്പ് കിരീടം നേടിയ ഇന്ത്യന്‍ ടീമിലെ ടോപ് ഓര്‍ഡറില്‍ ബാറ്റ് ചെയ്യുന്ന താരമാണ് ഹാര്‍ലീന്‍ ഡിയോള്‍. കഴിഞ്ഞ ദിവസം മോദിയുമായി ഇന്ത്യന്‍ വനിതാ ക്രിക്കറ്റ് ടീം കൂടിക്കാഴ്ച നടത്തിയപ്പോഴായിരുന്നു ഹാര്‍ലീന്‍ ഡിയോളിന്റെ ഈ ചോദ്യം.
എന്നാല്‍ ചോദ്യം സമൂഹമാധ്യമങ്ങളില്‍ വൈറലായതോടെ കഴിഞ്ഞ ദിവസം ബീഹാറില്‍ നടത്തിയ തെരഞ്ഞെടുപ്പ് പ്രചാരണത്തിനിടയില്‍ പ്രിയങ്ക ഗാന്ധി ഇതിനെ പരിഹസിച്ചിരുന്നു. ഇത്രമാത്രം തിളങ്ങാന്‍ വേണ്ടി മോദി പിന്തുടരുന്ന ദിനചര്യ എന്താണെന്ന് അറിയാന്‍ താല്‍പര്യമുണ്ട്, എന്നായിരുന്നു പ്രിയങ്ക ഗാന്ധിയുടെ പരിഹാസം. പ്രിയങ്കയുടെ ഈ പരിഹാസത്തിനെതിരെ ശക്തമായ വിമര്‍ശനങ്ങളാണ് സമൂഹമാധ്യമങ്ങളില്‍ ഉയരുന്നത്. “5 വർഷത്തിൽ ഒരിക്കൽ വയനാട്ടിൽ വന്നു വയനാടൻ മഞ്ഞൾ തേച്ചു കുളിക്കും..ജയിപ്പിച്ച ജനത്തിനോട് ഉള്ള കടപ്പാട്..അതാണ് ചർമത്തിന്റെ രഹസ്യം”- ഒരാള്‍ പ്രതികരിച്ചിരിക്കുന്നത് ഇങ്ങിനെയാണ്.
പ്രിയങ്കാഗാന്ധിയ്‌ക്കുള്ള ഏറ്റവും ഉചിതമായ മറുപടി വനിതാ ക്രിക്കറ്റ് താരം സ്നേഹ റാണ നല്‍കിയ വിശദീകരണത്തില്‍ അടങ്ങിയിരിക്കുന്നു. വനിതാ ക്രിക്കറ്റ് താരങ്ങളും പ്രധാനമന്ത്രിയും തമ്മിലുള്ള കൂടിക്കാഴ്ചക്കിടയില്‍ വനിതാതാരമായ സ്നേഹ റാണ ഇതിന് മറുപടിയുമായി രംഗത്തെത്തിയിരുന്നു. ഓള്‍ റൗണ്ടറായ സ്നേഹ റാണ പറഞ്ഞ ഉത്തരം ഇതായിരുന്നു:”സ്വന്തം നാട്ടുകാരുടെ സ്നേഹമാണ് പ്രധാനമന്ത്രിയെ പ്രകാശിപ്പിക്കുന്നത്!”. ഇത് തന്നെയാണ് പ്രിയങ്കയ്‌ക്കുള്ള മറുപടിയെന്നാണ് സമൂഹമാധ്യമങ്ങളില്‍ പലരും കുറിക്കുന്നത്.
