പനജി : വടക്കൻ ഗോവയിലെ രണ്ട് കടകളിൽ “പാകിസ്ഥാൻ സിന്ദാബാദ്” പോലുള്ള മുദ്രാവാക്യങ്ങൾ ഉൾക്കൊള്ളുന്ന എൽഇഡി സൈൻബോർഡുകൾ പ്രദർശിപ്പിച്ച സംഭവത്തിൽ അഞ്ച് പേർ അറസ്റ്റിൽ. ബൈഗയിലെ റിവൈവ് ഹെയർ കട്ടിംഗ് സലൂൺ, അർപോറയിലെ വിസ്കി പീഡിയ എന്നീ കടകളുടെ ഉടമകളെയാണ് പോലീസ് അറസ്റ്റ് ചെയ്തത്.
അർപോറയിലെ വിസ്കി പീഡിയയിൽ, ഹരിയാനയിൽ നിന്നുള്ള റാഞ്ചിത് ഭാട്ടിയ, വിപിൻ പഹുജ, കർണാടകയിൽ നിന്നുള്ള വിനയ് ചന്ദ്ര റാവു, കൃഷ്ണ ലമാനി, ബീഹാറിൽ നിന്നുള്ള മനോജ് കുമാർ എന്നിവരെ അഞ്ജുന പോലീസ് അറസ്റ്റ് ചെയ്തു. അതേസമയം, ബൈഗയുടെ റിവൈവ് ഹെയർ കട്ടിംഗ് സലൂണിൽ, ഉത്തർപ്രദേശിൽ നിന്നുള്ള മുഹമ്മദ് ഫർമാൻ, മുഹമ്മദ് ഷാവേസ്, ഡൽഹിയിൽ നിന്നുള്ള നൗഷാദ് കാസിം, കലാൻഗുട്ടിൽ നിന്നുള്ള രാകേഷ് ദാസ് എന്നിവരെ കലാൻഗുട്ട പോലീസും കസ്റ്റഡിയിലെടുത്തു.
എൽഇഡി ബോർഡിൽ പ്രതികൾ മനഃപൂർവ്വം മുദ്രാവാക്യം എഴുതിയതായും, ജനങ്ങൾക്കിടയിൽ ഭയം, കോപം, പ്രകോപനം എന്നിവ പ്രചരിപ്പിച്ചതായും അഞ്ജുന പോലീസ് എഫ്‌ഐ‌ആറിൽ പറയുന്നു. ഇന്ത്യയുടെ പരമാധികാരത്തിനെതിരായ ഒരു വിമത സന്ദേശമായിരുന്നു ഇതെന്നും രാജ്യത്തിനെതിരായ പ്രചാരണവുമാണെന്നും കലാൻഗുട്ടിൽ നിന്നുള്ള പോലീസ് ഇതിനെ വിശേഷിപ്പിച്ചു. രണ്ട് സ്ഥലങ്ങളിലും എൽഇഡി ബോർഡുകൾ മുറിച്ചുമാറ്റി.
അതേ സമയം ഇത്തരത്തിലുള്ള സ്ക്രോളിംഗ് വാചകം പ്രദർശിപ്പിച്ചത് പ്രദേശത്തെ പൊതുജനങ്ങളുടെ പ്രതിഷേധത്തിന് കാരണമായിട്ടുണ്ട്. ഇന്ത്യയുടെ ഐക്യത്തിനും, സമഗ്രതയ്‌ക്കും, സുരക്ഷയ്‌ക്കും, പരമാധികാരത്തിനും ഭീഷണിയാണെന്ന് ചൂണ്ടിക്കാട്ടി ബിഎൻഎസ്, ഐടി നിയമങ്ങൾ പ്രകാരമാണ് പോലീസ് കേസ് ഫയൽ ചെയ്തത്. അനുമതിയില്ലാതെയാണ് ഈ സൈൻബോർഡുകൾ സ്ഥാപിച്ചതെന്നും പോലീസ് ഉടനടി നടപടി സ്വീകരിച്ചുവെന്നും പിന്നീട് മുഖ്യമന്ത്രി പ്രമോദ് സാവന്ത് പറഞ്ഞു.
