കാശി: ഗംഗാനദിയാണ് തന്നെ സസ്യഭുക്കാക്കി മാറ്റിയതെന്ന് ഉപരാഷ്ട്രപതി സി.പി. രാധാകൃഷ്ണന്. 25 വര്ഷം മുന്പ് ആദ്യമായി കാശി സന്ദര്ശിക്കാനെത്തിയ താന് ഗംഗാനദിയില് മുങ്ങിക്കുളിച്ച അന്നാണ് പൂര്ണ്ണമായും മാംസാഹാരം ഉപേക്ഷിക്കാന് തീരുമാനമെടുത്തതെന്നും അദ്ദേഹം പറഞ്ഞു.
ഉത്തര്പ്രദേശിലെ വാരണാസിയില് ഒരു പുതിയ സത്രം ഉദ്ഘാടനം ചെയ്യാന് എത്തിയതായിരുന്നു അദ്ദേഹം. “25 വര്ഷങ്ങള്ക്ക് മുന്പ് ഇവിടെ വന്നപ്പോള് താന് ഒരു മാംസാഹാരം കഴിക്കുമായിരുന്നു. അന്ന് ഗംഗയില് മുങ്ങിക്കുളിച്ചത് ജീവിതം മാറ്റിമറിക്കുന്ന അനുഭവമായി. “- അദ്ദേഹം പറഞ്ഞു.
കാശി നാട്ടുകൊട്ടൈ നഗരസത്രം മാനേജിംഗ് സൊസൈറ്റിയാണ് പത്ത് നിലകളുള്ള പുതിയ സത്രം പണിതത്. ഉപരാഷ്ട്രപതിയും ഉത്തര്പ്രദേശ് മുഖ്യമന്ത്രി യോഗി ആദിത്യനാഥും ചേര്ന്നാണ് ഇത് ഉദ്ഘാടനം ചെയ്തത്. സമുദായ സംഭാവനകളിലൂടെയാണ് ഈ സ്വപ്നം യാഥാര്ത്ഥ്യമായത്. ഈ സത്രത്തില് തീര്ത്ഥാടകര്ക്ക് താമസത്തിനായി 140 മുറികളാണ് ഉള്ളത്.
സാമൂഹ്യസേവനത്തിനും തമിഴ് സംസ്കാരത്തെ പ്രോത്സാഹിപ്പിക്കാനും ഉള്ള നഗരത്താര് സമുദായത്തിന്റെ മഹാമനസ്കതയെ ഉപരാഷ്ട്രപതി അഭിനന്ദിച്ചു. “ധര്മ്മം താല്ക്കാലികമായി പ്രതിസന്ധി നേരിട്ടേക്കാം. പക്ഷെ അത് ശാശ്വതമല്ല. ഈ കെട്ടിടം തന്നെ അതിന് സാക്ഷിയാണ്.”- ഉപരാഷ്ട്രപതി ഓര്മ്മിപ്പിച്ചു. സേവനം, മതം, പുരോഗതി എന്നിവയെ പ്രവര്ത്തനങ്ങളിലൂടെ തെളിയിക്കുന്ന എന്ന നാട്ടുകൊട്ടൈ സംഘത്തിന്റെ പരിശ്രമങ്ങളെയും ഉപരാഷ്ട്രപതി വാഴ്ത്തി.
വാരണാസി നഗരത്തിന്റെ മുഖച്ഛായാമാറ്റത്തെയും ഉപരാഷ്ട്രപതി അഭിനന്ദിച്ചു. “25 വര്ഷം മുന്പുള്ള കാശിയല്ല, 25 വര്ഷത്തിന് ശേഷമുള്ള കാശി.ഈ പരിവര്ത്തനം സാധ്യമാക്കിയത് പ്രധാനമന്ത്രി മോദിയും മുഖ്യമന്ത്രി യോഗിയും ആണ്.”
“കേവലം ഒരു ലോഡ്ജിംഗ് സൗകര്യം എന്നതിനും അപ്പുറം വടക്കേയിന്ത്യയും തെക്കേയിന്ത്യയും തമ്മിലുള്ള ഒരു പാലമാണ് ഇത്. തമിഴ്നാടും കാശിയും തമ്മിലുള്ള സാംസ്കാരികബന്ധത്തിന്റെ ഒരു പുതിയ അധ്യായം കൂടിയാണ് ഇത്. കാശി സന്ദര്ശിക്കുന്ന തമിഴ് സ്വദേശികളെ സഹായിക്കാന് രൂപീകരിച്ച ഈ സത്രം ഇന്നും ആ പാരമ്പര്യം ഉയര്ത്തിപ്പിടിക്കുന്നു. “- ഉപരാഷ്ട്രപതി രാധാകൃഷ്ണന് പറഞ്ഞു.
കാനഡയില് നിന്നും 2021ല് കാശി വിശ്വനാഥക്ഷേത്രത്തിലേക്കുള്ള അന്നപൂര്ണ്ണ അമ്മന്ദേവി വിഗ്രഹത്തിന്റെ വരവിനെക്കുറിച്ച് അദ്ദേഹം വീണ്ടും ഈ ചടങ്ങില് അനുസ്മരിച്ചു. മോദി സര്ക്കാരിന്റെ കീഴില് ഉണ്ടാകുന്ന സാംസ്കാരിക നവോത്ഥാനത്തിന്റെ ഉദാഹരണമാണിത്. – അദ്ദേഹം വിശദമാക്കി.
ഈ പത്ത് നിലയുള്ള ലോഡ്ജിംഗില് ഒന്നരക്കോടി രൂപ ചെലവില് 76 സോളാര് ലാമ്പുകള് സ്ഥാപിച്ചിട്ടുണ്ട്. ഹരിതോര്ജ്ജ ഉപയോഗം മൂലം വര്ഷം 25 ലക്ഷം രൂപ വീതം ലാഭിക്കാന് സാധിക്കും.
ചടങ്ങിന് ശേഷം കാശി വിശ്വനാഥക്ഷേത്രത്തിലും അതിനുള്ളില് സ്ഥാപിച്ചിട്ടുള്ള അന്നപൂര്ണി അമ്മന്ദേവി ക്ഷേത്രവും ഉപരാഷ്ട്രപതി സന്ദര്ശിച്ചു. യുവതലമുറയെ കാശി സന്ദര്ശിക്കാന് പ്രചോദിപ്പിക്കുകയാണ് പുതിയ സത്രത്തിന്റെ ലക്ഷ്യമെന്ന് ഉപരാഷ്ട്പതി എക്സില് കുറിച്ചു.
