വയനാട്: ഡിസിസി ട്രഷറര്‍ എന്‍ എം വിജയന്‍ ജീവനൊടുക്കിയ കേസില്‍ പ്രത്യേക അന്വേഷണസംഘം ബത്തേരി ജുഡീഷ്യല്‍ ഫസ്റ്റ് ക്ലാസ് കോടതിയില്‍ കുറ്റപത്രം സമര്‍പ്പിച്ചു. ഐ സി ബാലകൃഷ്ണന്‍ എംഎല്‍എയാണ് ഒന്നാം പ്രതി. വയനാട് ഡിസിസി മുന്‍ പ്രസിഡന്റ് എന്‍ ഡി അപ്പച്ചന്‍, കോണ്‍ഗ്രസ് നേതാവ് കെ കെ ഗോപിനാഥന്‍ എന്നിവര്‍ രണ്ടും മൂന്നും പ്രതികളാണ്. വിജയനുമായി നേതാക്കള്‍ നടത്തിയ ഫോണ്‍ വിളികളുടെ വിശദാംശങ്ങള്‍, ഓഡിയോ ക്ലിപ്പിങ്ങുകള്‍, ബാങ്ക് ഇടപാട് രേഖകള്‍, വിജയന്റെ ഡയറിയിലെ വിശദാംശങ്ങള്‍ എന്നിവയ്‌ക്കു പുറമെ നൂറോളം പേരുടെ സാക്ഷിമൊഴികളും പ്രത്യേക അന്വേഷകസംഘത്തിന്‌റെ മേധാവി ബത്തേരി ഡിവൈഎസ്പി കെ കെ അബ്ദുള്‍ ഷെരീഫ് സമര്‍പ്പിച്ച കുറ്റപത്രത്തിലുണ്ട്.
2024 ഡിസംബര്‍ 24നാണ് എന്‍.എം.വിജയനെയും മകന്‍ ജിജേഷിനെയും വിഷം ഉള്ളില്‍ ചെന്ന നിലയില്‍ കണ്ടെത്തിയത്. ആശുപത്രിയിലെത്തിച്ചെങ്കിലും 27ന് മരിച്ചു. ഇപ്പോള്‍ പ്രതി പട്ടികയില്‍ ഉള്ളവരാണ് മരണത്തിന് ഉത്തരവാദികളെന്ന് വിജയന്‍ ആത്മഹത്യ കുറിപ്പില്‍ പറഞ്ഞിരുന്നു.
