തിരുവനന്തപുരം: പൊഴിയൂരില്‍ പശ്ചിമബംഗാള്‍ സ്വദേശികളായ വിനോദ സഞ്ചാരികള്‍ക്ക് നേരെ ബിയര്‍കുപ്പി എറിഞ്ഞതിനെ തുടര്‍ന്ന് മൂന്ന് വയസുകാരിക്ക് ഗുരുതര പരിക്ക്. വൈകിട്ട് കുടുംബം ബോട്ട് യാത്ര നടത്തവെ കരയില്‍ നിന്ന് യുവാവ് ബിയര്‍ കുപ്പി എറിയുകയായിരുന്നു. അക്രമം നടത്തിയ വെട്ടുകാട് സ്വദേശി സനോജിനെ ബോട്ട് ജീവനക്കാര്‍ കീഴ്പ്പെടുത്തി.
പശ്ചിമബംഗാള്‍ സ്വദേശി ആര്‍ക്കാ ദാസിന്റ മകള്‍ അനുബാദാസിനാണ് പരിക്കേറ്റത്. ഏഴംഗ കുടുംബം ആറു ദിവസം മുമ്പാണ് വിനോദ സഞ്ചാരത്തിന് എത്തിയത്.
അമ്മയുടെ മടിയില്‍ ഇരിക്കുകയായിരുന്ന മൂന്ന് വയസുകാരിയുടെ തലയില്‍ വീണ് കുപ്പി പൊട്ടി.കുട്ടിനെയ്യാറ്റിന്‍കര ആശുപത്രിയില്‍ ചികിത്സയിലാണ്. അപകട നില തരണം ചെയ്തുവെന്ന് ഡോക്ടര്‍മാര്‍ പറഞ്ഞു. പ്രതിയെ പൊഴിയൂര്‍ പൊലീസ് കസ്റ്റഡിയില്‍ എടുത്തു. ഇയാള്‍ മദ്യലഹരിയില്‍ ആയിരുന്നുവെന്ന് പൊലീസ് പറഞ്ഞു.
