കോഴിക്കോട്: രാഷ്ട്രീയ സ്വയംസേവക സംഘത്തിന്റെ പ്രാന്ത സംഘചാലകനായി ദീര്ഘകാലം പ്രവര്ത്തിച്ചിരുന്ന പി.ഇ.ബി മേനോന് അക്ഷരാര്ത്ഥത്തില് ആദര്ശത്തിന്റെ ആള് രൂപവും സ്നേഹത്തിന്റെ പ്രതീകവുമായിരുന്നു. അദ്ദേഹത്തിന്റെ ജീവിതം മുഴുവന് സംഘ പ്രവര്ത്തകര്ക്കു മാത്രമല്ല, ഏതൊരു പൊതു പ്രവര്ത്തകനും അത്യന്തം അനുകരണീയവും മാതൃകാ നിര്ഭരവുമായിരുന്നു. സംഘാദര്ശത്തെ സ്വജീവിതത്തിന്റെ അടിസ്ഥാനമാക്കിയ അപൂര്വ്വ വ്യക്തിത്വമായിരുന്നു അദ്ദേഹത്തിന്റേത്.
സംഘടനയുടെ സല്പ്പേരിന് ഒരു ചെറിയ പോറല് പോലുമേല്ക്കുന്നത് അദ്ദേഹത്തിന് അസഹ്യമായിരുന്നു. അത്രമേല് ജാഗ്രതയോടെ സംഘടനയുടെ മഹത്വത്തെ സ്വാംശീകരിച്ചതായിരുന്നു അദ്ദേഹത്തിന്റെ ജീവിതം.
ഉന്നതമായ ജീവിത സാധ്യതകള് എല്ലാം ഉള്ളപ്പോഴും എളിമയുടെ പ്രതീകമായി സഹപ്രവര്ത്തകരുടെ സാധാരണജീവിതത്തെ സ്വയം വരിച്ച തപസ്സായിരുന്നു അദ്ദേഹത്തിന്റെ സംഘടനാ പ്രവര്ത്തനം. സഹപ്രവര്ത്തകര്ക്കെല്ലാം ജീവിതം കൊണ്ട് സന്ദേശമേകിയ അദ്ദേഹത്തിന് തന്റെ കുടുംബത്തെ മുഴുവന് അതേ മാര്ഗ്ഗത്തിലൂടെ നയിക്കാനും മാതൃകയാക്കാനും സാധിച്ചിരുന്നു.
വീടുമായി ബന്ധപ്പെടുമ്പോള് അദ്ദേഹത്തിന്റെ സാധ്വിയായ സഹധര്മ്മിണിയുടെ സ്നേഹവാത്സല്യങ്ങള്ക്ക് പാത്രമാകാത്ത ഒരു സംഘപ്രവര്ത്തകനുമുണ്ടാവില്ല. തന്റെ തെളിഞ്ഞ ആദര്ശവും സുതാര്യമായ ജീവിതവും, മഹനീയമായ ജീവിതമാതൃകയും കൊണ്ട് വീട്ടുകാരേയും, സഹപ്രവര്ത്തകരേയും, സമാജ ബാന്ധവരേയും ഒരേപോലെ മാര്ഗ്ഗദര്ശനം ചെയ്യാന് കഴിഞ്ഞ അദ്ദേഹത്തിന്റെ പ്രേരണ ഏവരിലും ഏറെ സ്വാധീനമുളവാക്കിയിരുന്നു.
സംഘ ശതാബ്ദിയുടെ പൂര്ത്തീകരണ സമയത്ത് അദ്ദേഹത്തിന്റെ വിയോഗം ഏറെ വേദനാ
ജനകവും, അസഹ്യവുമാണ് .
ഏതു പ്രതിസന്ധി ഘട്ടത്തേയും ആത്മവിശ്വാസത്തോടെ അഭിമുഖീകരിക്കുകയും അതിജീവിക്കുകയും ചെയ്യാനുള്ള അദ്ദേഹത്തിന്റെ സ്വയം സിദ്ധിയും മറ്റുള്ളവരുടെ മനസ്സിനെ അതേ തരത്തില് സജ്ജമാക്കാനുള്ള അനിതരസാധാരണമായ ശേഷിയും പല സന്ദര്ഭങ്ങളിലും തെളിയിക്കപ്പെട്ടിരുന്നു. കുടുംബത്തിന്റെ ദുഃഖത്തില് പങ്കുചേരുന്നതോടൊപ്പം ഈ വേര്പാടിന്റെ പ്രയാസങ്ങളെ നേരിടാന് സര്വ്വശക്തന് അവര്ക്കുകരുത്തുനല്കട്ടെയെന്ന് പ്രാര്ത്ഥിക്കുന്നു.
പ്രേരണാദായകവും പ്രദീപ്തവുമായ ജ്യേഷ്ഠസഹോദരന്റെ ജ്വലിക്കുന്ന ഓര്മ്മകള്ക്കു മുന്നില് ഒരായിരം പ്രണാമങ്ങള്!
