ശ്രീനഗർ : നിയന്ത്രണ രേഖയ്‌ക്ക് അപ്പുറത്തുള്ള ലോഞ്ച് പാഡുകളിൽ തീവ്രവാദികളുടെ സാന്നിധ്യത്തെക്കുറിച്ച് രഹസ്യാന്വേഷണ വിവരങ്ങൾ ലഭിച്ചതായി ബിഎസ്എഫ് കശ്മീർ ഫ്രോണ്ടിയർ ഐജി അശോക് യാദവ് പറഞ്ഞു. എന്നാൽ കശ്മീരിലെ നിയന്ത്രണ രേഖയിലെ സുരക്ഷാ സേനയുടെ ജാഗ്രതയും ആധുനിക നിരീക്ഷണ ഉപകരണങ്ങളുടെ ഉപയോഗവും കാരണം പാകിസ്ഥാൻ അധിനിവേശ കശ്മീരിൽ നിന്ന് തീവ്രവാദികൾ നുഴഞ്ഞുകയറാനുള്ള ശ്രമങ്ങൾ പരാജയപ്പെടുത്തിയെന്നും അദ്ദേഹം വ്യക്തമാക്കി. ഓപ്പറേഷൻ സിന്ദൂരിനുശേഷം നിയന്ത്രണ രേഖയിലെ സ്ഥിതിയെക്കുറിച്ചുള്ള ചോദ്യത്തിന് മറുപടിയായി യാദവ് മാധ്യമപ്രവർത്തകരോട് സംസാരിക്കുകയായിരുന്നു അദ്ദേഹം.
ജാഗ്രതയിലൂടെയും ആധുനിക നിരീക്ഷണ ഉപകരണങ്ങളുടെ ഉപയോഗത്തിലൂടെയും ബി‌എസ്‌എഫും സൈന്യവും നിയന്ത്രണ രേഖയിൽ ആധിപത്യം നിലനിർത്തിയ രീതി നുഴഞ്ഞുകയറ്റ ശ്രമങ്ങൾ വിജയിച്ചില്ലെന്ന് ഉറപ്പാക്കിയെന്ന് അദ്ദേഹം പറഞ്ഞു. ശൈത്യകാലത്തിന് ഏകദേശം രണ്ട് മാസം ശേഷിക്കെ തീവ്രവാദികൾ ശ്രമങ്ങൾ തുടരുമെന്നും എന്നാൽ പ്രദേശത്തെ ഞങ്ങളുടെ ആധിപത്യം കാരണം ഏതൊരു ശ്രമവും കണ്ടെത്തി പരാജയപ്പെടുത്തുമെന്നും അദ്ദേഹം ഉറപ്പിച്ച് പറഞ്ഞു.
ഇതിനു പുറമെ ലോഞ്ച് പാഡുകളിൽ പതിയിരിക്കുന്ന തീവ്രവാദികളുടെ എണ്ണത്തെക്കുറിച്ച് ചോദിച്ചപ്പോൾ എണ്ണം ഇടയ്‌ക്കിടെ വ്യത്യാസപ്പെടുന്നുണ്ടെന്ന് യാദവ് പറഞ്ഞു. ലോഞ്ച് പാഡുകളിൽ ഉള്ള എല്ലാ തീവ്രവാദികളും പാകിസ്ഥാനികളാണെന്നും അദ്ദേഹം പറഞ്ഞു. ഈ പ്രദേശങ്ങളിൽ ഇന്റലിജൻസ് വിശകലനം അനുസരിച്ച് ഏത് സമയത്തും ഏകദേശം 100 മുതൽ 120 വരെ തീവ്രവാദികൾ ഉണ്ടെന്ന് പൊതുവെ നിരീക്ഷിക്കപ്പെടുന്നതായും അദ്ദേഹം വ്യക്തമാക്കി.
ലഷ്‌കർ-ഇ-തൊയ്ബ ഭീകര സംഘടന ഇസ്ലാമിക് സ്റ്റേറ്റുമായി ചേരുന്നതിനെക്കുറിച്ച് ചോദിച്ചപ്പോൾ എല്ലാ രഹസ്യാന്വേഷണ ഏജൻസികളും ഇത്തരം സംഭവവികാസങ്ങൾ സൂക്ഷ്മമായി വിശകലനം ചെയ്യുന്നുണ്ടെന്ന് യാദവ് പറഞ്ഞു. ആ വിശകലനത്തിന്റെ അടിസ്ഥാനത്തിൽ എല്ലാ സുരക്ഷാ സേനകളുമായും സഹകരിച്ച് ഞങ്ങൾ ഞങ്ങളുടെ പ്രവർത്തന പദ്ധതികൾ രൂപപ്പെടുത്തുന്നുണ്ടെന്നും അദ്ദേഹം കൂട്ടിച്ചേർത്തു.
