ന്യൂദല്‍ഹി: പ്രധാനമന്ത്രി മോദി ചീഫ് ജസ്റ്റിസ് ഗവായിയെ ഫോണില്‍ വിളിച്ച് കോടതി മുറിയില്‍ അദ്ദേഹത്തിന് നേരെ നടന്ന ആക്രമണത്തെ അപലപിച്ചു. ഒരു അഭിഭാഷകനാണ് സുപ്രീംകോടതിയില്‍ കേസില്‍ വാദം കേട്ടുകൊണ്ടിരിക്കെ ചീഫ് ജസ്റ്റിസ് ഗവായിയ്‌ക്ക് നേരെ ഷൂ വലിച്ചെറിഞ്ഞത്.
എന്നാല്‍ ചീഫ് ജസ്റ്റിസ് ഗവായി ഏറെ ശാന്തനായി തന്റെ കസേരയില്‍ അക്ഷോഭ്യനായി ഇരുന്ന് ഈ പ്രകോപനപരമായ സാഹചര്യത്തെ നേരിടുകയായിരുന്നു. ചീഫ് ജസ്റ്റിസ് ഈ അങ്ങേയറ്റം അപകടകരമായ സാഹചര്യത്തെ ശാന്തമായി നേരിട്ട രീതിയെയും മോദി അഭിനന്ദിച്ചു.
നമ്മുടെ സമൂഹത്തില്‍ ഇത്തരം ആക്രമണങ്ങള്‍ക്ക് യാതൊരു സ്ഥാനവുമില്ലെന്നും പ്രധാനമന്ത്രി പറഞ്ഞു.” ഗവായിയെ ഫോണില്‍ സംസാരിച്ചു. അദ്ദേഹത്തിന് നേരെ നടന്ന ഈ ആക്രമണം എല്ലാവരേയും രോഷാകുലരാക്കിയിട്ടുണ്ട്. ഇത്തരം പ്രവൃത്തികള്‍ക്ക് നമ്മുടെ സമൂഹത്തില്‍ സ്ഥാനമില്ല. ഇത് അപലപനീയമാണ്.”- മോദി എക്സില്‍ കുറിച്ചു.
സുപ്രീംകോടതി അഭിഭാഷകന്‍ രാകേഷ് കിഷോര്‍ ആണ് ചീഫ് ജസ്റ്റിന് നേരെ ഷൂ വലിച്ചെറിഞ്ഞത്. 71 വയസ്സായ അഭിഭാഷകന്‍ തന്റെ കാലിലെ സ്പോര്‍ട് ഷൂവില്‍ ഒന്നെടുത്ത് എറിയുകയായിരുന്നു. ഇദ്ദേഹത്തെ സസ്പെന്‍റ് ചെയ്യണമെന്ന് ആവശ്യപ്പെട്ട് ബാര്‍ കൗണ്‍സില്‍ ഇടപെട്ടിട്ടുണ്ട്.
