തിരുവനന്തപുരം: ശബരിമല സ്വര്ണപ്പാളി സംബന്ധിച്ച ദുരൂഹതകള് തുടരുന്നതിനിടെ കൂടുതല് ഞെട്ടിക്കുന്ന വിവരങ്ങള് പുറത്തു വരുന്നു. അയ്യപ്പനെ യോഗനിദ്രയിലാക്കാന് അണിയിക്കുന്ന, പന്തളം രാജാവ് സമര്പ്പിച്ച യോഗദണ്ഡും കടത്തി.
അയ്യപ്പപ്രതിഷ്ഠാ സമയം മുതലുള്ള അതിപുരാതാനമായ യോഗദണ്ഡ് 2018ല് സ്വര്ണം കെട്ടാന് കടത്തിയത് അന്നത്തെ തിരുവിതാംകൂര് ദേവസ്വംബോര്ഡ് പ്രസിഡന്റ് എ.പദ്മകുമാര്. തിരികെ എത്തിച്ചത് പുതിയ യോഗണ്ഡ്. പഴയ യോഗദണ്ഡും അതില്കെട്ടിയ വെള്ളിയും സ്ട്രോങ് റൂമില് എത്തിയില്ല.
അയ്യപ്പനെ യോഗ നിദ്രയിലാക്കിയാണ് മണ്ഡലകാലം, മകരവിളക്ക്, ഓരോ മലയാളമാസം, മറ്റ് വിശേഷങ്ങള്ക്കും അവസാന ദിവസം നട അടയ്ക്കുന്നത്. ചൂരലില് തീര്ത്തിട്ടുള്ള യോഗദണ്ഡ്, ഏകമുഖ രുദ്രാക്ഷമാല എന്നിവ ധരിപ്പിച്ച് ഭസ്മാഭിഷേകം ചെയ്താണ് യോഗ നിദ്രയിലിരുത്തുന്നത്. 2018 മണ്ഡലകാലം വരെ യോഗദണ്ഡും രുദ്രാക്ഷമാലയും വെള്ളികെട്ടിയതായിരുന്നു. 2018ല് മണ്ഡലകാലം കഴിഞ്ഞപ്പോള് യോഗദണ്ഡ് സ്വര്ണം കെട്ടണമെന്നും രുദ്രാക്ഷമാലയില് സ്വര്ണം പൂശണമെന്നുമുള്ള നിര്ദേശം അന്നത്തെ ദേവസ്വം ബോര്ഡ് പ്രസിഡന്റ് എ. പദ്മകുമാര് മുന്നോട്ടുവെച്ചു.
തന്റെ മകന് ജോലി ലഭിച്ചതിനുള്ള വഴിപാട് എന്നുപറഞ്ഞാണ് സ്വര്ണം കെട്ടാന് സന്നിധാനത്ത് നിന്നും ഇവ കൊണ്ടുപോയത്. ഇത് തന്നെ എല്ലാ ചട്ടങ്ങളും ദേവസ്വം മാന്വലും ലംഘിച്ചായിരുന്നു. ഹൈക്കോടതിയുടെ പോലും അനുമതിയില്ലാതെയാണ് പുരാതന മൂല്യമുള്ള ഇവ സന്നിധാനത്ത് നിന്നും കടത്തിയത്. തൂക്കം പരിശോധിക്കുകയോ മഹസര് പോലും തയാറാക്കുകയോ ചെയ്തിരുന്നില്ല.
ഏതാനും ദിവസങ്ങള്ക്കുശേഷം രണ്ടും തിരിച്ചെത്തിച്ചു. എന്നാല് അതിപുരാതനമായ യോഗദണ്ഡിനുപകരം പുതുതായി നിര്മിച്ച യോഗദണ്ഡ് ആണ് തിരിച്ചെത്തിച്ചത്. എന്നാല് പഴയ യോഗദണ്ഡോ അതില് കെട്ടിയിരുന്ന വെള്ളിയോ തിരികെ ദേവസ്വം അധികൃതരെ ഏല്പ്പിച്ചില്ല. സ്ട്രോങ് റൂമിലടക്കം യോഗദണ്ഡോ അതിലെ വെള്ളിയോ എത്തിച്ചിട്ടുമില്ല. രുദ്രാക്ഷമാലയിലും എത്ര ഗ്രാം സ്വര്ണം പൂശിയെന്നോ അതിലെ പഴയ വെള്ളി തന്നെയാണോ അതില് ഉപയോഗിച്ചിരിക്കുന്നതെന്നോ രുദ്രാക്ഷം പഴയതാണോ എന്നടക്കമുള്ള കൃത്യമായ അറിവ് ദേവസ്വം ബോര്ഡ് ഉദ്യോഗസ്ഥര്ക്കും ലഭ്യമല്ല. ഇവയൊന്നും തിരികെ എത്തിച്ചപ്പോഴുള്ള തൂക്കവും രേഖപ്പെടുത്തിയിട്ടുമില്ല.
ശബരിമലയില് പ്രതിഷ്ഠ നടത്തുമ്പോള് പന്തളം രാജാവ് നടയ്ക്കുവച്ച യോഗദണ്ഡാണ് നഷ്ടപ്പെട്ടതെന്ന വിവരം പുറത്തുവന്നതോടെ രുദ്രാക്ഷത്തിന്റെ അടക്കം പഴക്കം പരിശോധിക്കേണ്ടതുണ്ടെന്ന ആവശ്യവും ഉയര്ന്നിട്ടുണ്ട്.
ജന്മഭൂമി ഓണ്ലൈന്