ഝാര്സുഗുഡ(ഒഡീഷ): 11000 കോടിയോളം രൂപ മുതല്മുടക്കില്, എട്ട് ഐ.ഐ.ടി.കളുടെ (തിരുപ്പതി, പാലക്കാട്, ഭിലായ്, ജമ്മു, ധാര്വാഡ്, ജോധ്പൂര്, പട്ന, ഇന്ഡോര്) വിപുലീകരണത്തിനാണ് പ്രധാനമന്ത്രി തറക്കല്ലിട്ടത്. ഈ വിപുലീകരണം അടുത്ത നാല് വര്ഷത്തിനുള്ളില് 10,000 വിദ്യാര്ത്ഥികള്ക്കുകൂടി പഠനസൗകര്യം വര്ദ്ധിപ്പിക്കുകയും എട്ട് അത്യാധുനിക ഗവേഷണ പാര്ക്കുകള് സ്ഥാപിക്കുകയും ചെയ്യും. ഇത് ഇന്ത്യയുടെ നൂതനാശയ ആവാസവ്യവസ്ഥയെ ശക്തിപ്പെടുത്തുകയും ഗവേഷണ-വികസന പ്രവര്ത്തനങ്ങള്ക്ക് കാര്യമായ ഉത്തേജനം നല്കുകയും ചെയ്യും.
രാജ്യത്തുടനീളമുള്ള 275 സംസ്ഥാന എഞ്ചിനീയറിംഗ്, പോളിടെക്നിക് സ്ഥാപനങ്ങളില് ഗുണനിലവാരം, തുല്യത, ഗവേഷണം, നവീനാശയം എന്നിവ മെച്ചപ്പെടുത്തുന്നതിനായി രൂപകല്പ്പന ചെയ്ത മെറൈറ്റ് (MERITE) പദ്ധതിക്ക് പ്രധാനമന്ത്രി തുടക്കം കുറിച്ചു.
അഗ്രിടെക്, പുനരുപയോഗ ഊര്ജ്ജം, റീട്ടെയില്, മറൈന്, ഹോസ്പിറ്റാലിറ്റി തുടങ്ങിയ വളര്ന്നുവരുന്ന മേഖലകളെ ഉള്പ്പെടുത്തി സാംബല്പൂരിലും ബെര്ഹാംപൂരിലും വേള്ഡ് സ്കില് സെന്ററുകള് സ്ഥാപിക്കുന്ന ഒഡീഷ സ്കില് ഡെവലപ്മെന്റ് പ്രോജക്ട് രണ്ടാം ഘട്ടവും പ്രധാനമന്ത്രി ഉദ്ഘാടനം ചെയ്തു. കൂടാതെ, അഞ്ച് ഐ.ടി.ഐ.കള് ഉത്കര്ഷ ഐ.ടി.ഐ.കളായി ഉയര്ത്തുകയും, 25 ഐ.ടി.ഐ.കള് സെന്റര് ഓഫ് എക്സലന്സുകളായി വികസിപ്പിക്കുകയും ചെയ്യും. ഒരു പുതിയ പ്രിസിഷന് എഞ്ചിനീയറിംഗ് മന്ദിരം വഴി നൂതന സാങ്കേതിക പരിശീലനം നല്കും.
സംസ്ഥാനത്തെ ഡിജിറ്റല് വിദ്യാഭ്യാസം മെച്ചപ്പെടുത്തുന്നതിനായി, 130 ഉന്നത വിദ്യാഭ്യാസ സ്ഥാപനങ്ങളില് ഏര്പ്പെടുത്തിയ വൈ-ഫൈ സൗകര്യങ്ങള് പ്രധാനമന്ത്രി നാടിനു സമര്പ്പിച്ചു. ഇത് 2.5 ലക്ഷത്തിലധികം വിദ്യാര്ത്ഥികള്ക്ക് സൗജന്യ പ്രതിദിന ഡാറ്റാ ലഭ്യമാക്കും
ഒഡീഷയിലെ ആരോഗ്യ സംരക്ഷണ അടിസ്ഥാന സൗകര്യങ്ങള്ക്കും വലിയ ഉത്തേജനം ലഭിക്കും. ബെര്ഹാംപൂരിലെ എംകെസിജി മെഡിക്കല് കോളേജും സാംബാല്പൂരിലെ വിംസാറും ലോകോത്തര സൂപ്പര് സ്പെഷ്യാലിറ്റി ആശുപത്രികളാക്കി ഉയര്ത്തുന്നതിനുള്ള ശിലാസ്ഥാപനം പ്രധാനമന്ത്രി നിര്വഹിച്ചു. നവീകരിച്ച സൗകര്യങ്ങളില് വര്ദ്ധിപ്പിച്ച കിടക്കകള്, ട്രോമ കെയര് യൂണിറ്റുകള്, ഡെന്റല് കോളേജുകള്, അമ്മമാര്ക്കും കുട്ടികള്ക്കുമുള്ള പരിചരണ സേവനങ്ങള്, വിപുലീകരിച്ച അക്കാദമിക് അടിസ്ഥാന സൗകര്യങ്ങള് എന്നിവ ഉള്പ്പെടും. ഇത് ഒഡീഷയിലെ ജനങ്ങള്ക്ക് സമഗ്രമായ ആരോഗ്യ സേവനങ്ങള് ഉറപ്പാക്കും.
കൂടാതെ, അന്ത്യോദയ ഗൃഹ യോജനയ്ക്ക് കീഴിലുള്ള 50,000 ഗുണഭോക്താക്കള്ക്ക് പ്രധാനമന്ത്രി അനുമതി പത്രങ്ങള് വിതരണം ചെയ്തു. ഈ പദ്ധതി ഭിന്നശേഷിക്കാര്, വിധവകള്, മാരക രോഗങ്ങളുള്ളവര്, പ്രകൃതിദുരന്തങ്ങള്ക്ക് ഇരയായവര് എന്നിവര് ഉള്പ്പെടെ ദുര്ബലരായ ഗ്രാമീണ കുടുംബങ്ങള്ക്ക് അടച്ചുറപ്പുള്ള വീടുകളും സാമ്പത്തിക സഹായവും നല്കുന്നു. സമൂഹത്തിലെ ഏറ്റവും പിന്നാക്കം നില്ക്കുന്ന വിഭാഗങ്ങള്ക്ക് സാമൂഹ്യക്ഷേമവും അന്തസും ഉറപ്പാക്കുന്നതിനുള്ള ഗവണ്മെന്റിന്റെ പ്രതിബദ്ധതയാണ് ഈ ഉദ്യമം പ്രതിഫലിപ്പിക്കുന്നത്.
