ഇസ്ലാമബാദ് : ഇന്ത്യന്‍ പാര്‍ലമെന്‍റ് ആക്രമിച്ചതിന് പിന്നില്‍ മസൂദ് അസറെന്ന് വെളിപ്പെടുത്തി ജെയ്ഷെ മുഹമ്മദിന്റെ ഉന്നത ജെയ്ഷെ കമാന്‍ഡര്‍. പാകിസ്ഥാനിലെ ബാലകോട്ടിലുള്ള തന്റെ ആസ്ഥാനത്തിരുന്നാണ് ഈ ആക്രമണം മസൂദ് അസര്‍ ആസൂത്രണം ചെയ്തതെന്നും ജെയ്ഷെ മുഹമ്മദിന്റെ കമാന്‍ഡറായ മസൂദ് ഇല്യാസ് കാശ്മീരി പറഞ്ഞു.
ഇതോടെ തീവ്രവാദികള്‍ക്ക് പാകിസ്ഥാന്‍ മണ്ണില്‍ അഭയം നല്‍കുന്നില്ലെന്ന പാകിസ്ഥാന്റെ വാദം പൊളിഞ്ഞിരിക്കുകയാണ്. മുംബൈയിലും ദല്‍ഹിയിലും മസൂദ് അസര്‍ ആക്രമണങ്ങള്‍ നടത്തിയത് പാകിസ്ഥാനിലെ ബാലകോട്ടിലുള്ള ക്യാമ്പില്‍ നിന്നാണെന്നും ജെയ്ഷെ മുഹമ്മദിന്റെ കമാന്‍ഡര്‍ മസൂദ് ഇല്യാസ് കാശ്മീരി പറഞ്ഞു.
ഇന്ത്യയില്‍ അഞ്ച് വര്‍ഷത്തോളം തടവിലായിരുന്ന മസൂദ് അസറിനെ പിന്നീട് ഇന്ത്യ വിട്ടയക്കുകയായിരുന്നു. തുടര്‍ന്ന് പാകിസ്ഥാനില്‍ എത്തിയതിന് ശേഷമാണ് മസൂദ് അസര്‍ ഈ ആക്രമണങ്ങള്‍ നടത്തിയത്. മസൂദ് ഇല്യാസ് കാശ്മീരിയുടെ വോയ്സ് ക്ലിപ്പിലാണ് ഈ വെളിപ്പെടുത്തല്‍.
ഇന്ത്യയിലെ തീഹാര്‍ ജയിലില്‍ നിന്നും വിട്ടയച്ച ശേഷം മസൂദ് അസര്‍ പാകിസ്ഥാനിലെ ബാലകോട്ട് തന്റെ തീവ്രവാദകേന്ദ്രമാക്കി. അവിടെ വെച്ചാണ് ദല്‍ഹിയിലും മുംബൈയിലും ആക്രമണങ്ങള്‍ ആസൂത്രണം ചെയ്ത് നടപ്പാക്കിയത്. ഇതില്‍ ഇന്ത്യയിലെ പാര്‍ലമെന്‍റ് ആക്രമണവും ഉള്‍പ്പെടുന്നു. പാകിസ്ഥാനെ ഒരു തീവ്രവാദകേന്ദ്രമാക്കി മാറ്റുന്നതില്‍ മസൂദ് അസറിന് പങ്കുണ്ട്. തീവ്രവാദത്തിനോ തീവ്രവാദി സംഘടനകള്‍ക്കോ പാകിസ്ഥാന്‍ അഭയം നല്‍കുന്നില്ലെന്ന പാകിസ്ഥാന്റെ വാദം പൊളിക്കുന്നതാണ് മസൂദ് ഇല്യാസ് കാശ്മീരിയുടെ വെളിപ്പെടുത്തല്‍.
ബാലകോട്ട് കേന്ദ്രമാക്കിയുള്ള പ്രവര്‍ത്തനത്തിനിടെയാണ് ഇന്ത്യയ്‌ക്കെതിരെ തീവ്രവാദ ആക്രമണം നടത്തുക എന്ന പ്രചാരണം മസൂദ് അസര്‍ അഴിച്ചുവിട്ടത്. ഒസാമ ബിന്‍ ലാദനും പാകിസ്ഥാനെ ഭീകരവാദികളുടെ കേന്ദ്രമാക്കുന്നതില്‍ ശക്തമായ പങ്കുവഹിച്ചിട്ടുണ്ടെന്നും ഇല്യാസി പറയുന്നു.
പാകിസ്ഥാന്റെ സൈനിക സുരക്ഷയുടെ കീഴിലാണ് ജെയ്ഷെ മുഹമ്മദ് ഉള്‍പ്പെടെയുള്ള ഭീകരവാദ കേന്ദ്രങ്ങള്‍ പ്രവര്‍ത്തിച്ചിരുന്നതെന്ന ഇന്ത്യയുടെ ആരോപണം ശരിവെയ്‌ക്കുന്നതാണ് ഈ വെളിപ്പെടുത്തല്‍. ഇതോടെ പാക് അതിര്‍ത്തിപ്രദേശങ്ങളില്‍ ഭീകരവാദ കേന്ദ്രങ്ങള്‍ ഇല്ലെന്ന പാകിസ്ഥാന്റെ അവകാശവാദം പൊളിഞ്ഞിരിക്കുകയാണ്.
കഴിഞ്ഞ ദിവസം ഇന്ത്യാ ടുഡേ മസൂദ് ഇല്യാസ് കാശ്മീരിയുടെ മറ്റൊരു വോയ് സ് ക്ലിപ്പ് പുറത്തുവിട്ടിരുന്നു. ഇതില്‍ ഇന്ത്യയുടെ ഓപ്പറേഷന്‍ സിന്ദൂറിന്റെ ഭാഗമായി മാര്‍ച്ച് ഏഴിന് ജെയ് ഷെ മുഹമ്മദിന്റെ പാകിസ്ഥാനിലെ ബഹവല്‍പൂരിലുള്ള ജാമിയ മസ് ജിദ് ഷുബാന്‍ അള്ള എന്ന ആസ്ഥാനം തകര്‍ക്കപ്പെട്ടെന്നും മസൂദ് അസറിന്റെ കുടുംബാംഗങ്ങളില്‍ പലരുടെയും ശരീരം ഇന്ത്യയുടെ ആക്രമണത്തില്‍ ഛിന്നഭിന്നമായെന്നും ഇതില്‍ ഇല്യാസി വെളിപ്പെടുത്തിയിരുന്നു.
