ന്യൂദല്‍ഹി: മോദി ഈയിടെ ആര്‍എസ്എസ് നേതാവ് മോഹന്‍ ഭാഗവതിനെ പ്രശംസിച്ചതില്‍ അസ്വസ്ഥത പ്രകടിപ്പിച്ച് കോണ്‍ഗ്രസ് നേതാവ് ജയറാം രമേശ്. ഇത് ആര്‍എസ്എസിന്റെയും മോഹന്‍ ഭാഗവതിന്റെയും പ്രിയം നേടാനുള്ള മോദിയുടെ ശ്രമമാണെന്നായിരുന്നു ജയറാം രമേശിന്റെ പ്രസ്താവന. എന്തിനാണ് ജയറാം രമേശ് ഇതില്‍ ഇത്രമാത്രം അസ്വസ്ഥപ്പെടുന്നത് എന്നാണ് ബിജെപിയിലെ ചില നേതാക്കള്‍ പ്രതികരിക്കുന്നത്.
2009 മുതല്‍ ആര്‍എസ്എസിന്റെ സര്‍സംഘചാലക് ആയ മോഹന്‍ ഭാഗവതിന്റെ കാലഘട്ടം ആര്‍എസ്എസിന്റെ 100 വര്‍ഷത്തെ ചരിത്രമെടുത്താല്‍ വലിയ പരിവര്‍ത്തനങ്ങളുടെ നാളുകളായി എണ്ണപ്പെടുമെന്ന് മോദി ഈയിടെ എഴുതിയ ഒരു ലേഖനത്തില്‍ പരാമര്‍ശിച്ചിരുന്നു. ഇതാണ് ജയറാം രമേശിനെ ചൊടിപ്പിച്ചിരിക്കുന്നത്. കോണ്‍ഗ്രസിന്റെ നേതാവും സോണിയയുടെ വിശ്വസ്തനുമായ ജയറാം രമേശിന് ആര്‍എസ്എസിന്റെ കാര്യത്തിലും മോദി-മോഹന്‍ഭാഗവത് വിഷയത്തിലും എന്തിനാണ് ഇത്ര താല്പര്യമെന്നും ചില ബിജെപി നേതാക്കള്‍ ചോദിക്കുന്നു. കോണ്‍ഗ്രസ് അനുകൂല, ബിജെപി വിരുദ്ധ മാധ്യമങ്ങള്‍ ഹിന്ദുത്വസംഘടനകളില്‍ അഭിപ്രായഭിന്നതകളുണ്ടെന്ന പ്രചാരണം നിരന്തരം അഴിച്ചുവിട്ടിരുന്നു. കര്‍ണ്ണാടകയില്‍ ധര്‍മ്മസ്ഥല വിവാദമുണ്ടായപ്പോള്‍ ഈ വിഷയത്തില്‍ ആര്‍എസ് എസും ബിജെപിയും രണ്ടു തട്ടിലാണെന്ന് ദ ന്യൂസ് മിനിറ്റ്, ദ ഹിന്ദു, ഇന്ത്യന്‍ എക്സ്പ്രസ് ഉള്‍പ്പെടെയുള്ള ഹിന്ദുത്വകില്ലര്‍ മാധ്യമങ്ങളും വിദേശഫണ്ടില്‍ പ്രവര്‍ത്തിച്ചിരുന്ന യൂട്യൂബര്‍മാരും പ്രചരിപ്പിച്ചിരുന്നത് ഇതിന് ഒരു ഉദാഹരണമാണ്. ഹിന്ദുത്വയ്‌ക്ക് വേണ്ടി നിലകൊള്ളുന്ന നേതാക്കള്‍ തമ്മില്‍ അഭിപ്രായഭിന്നതയുണ്ടെന്ന് പ്രചരിപ്പിക്കുക മോദി സര്‍ക്കാരിനെ മറിച്ചിടാന്‍ തുനിയുന്ന അമേരിക്കയിലെ സമാന്തര അധികാരശൃംഖലയായ ഡീപ് സ്റ്റേറ്റിന്റെ പ്രധാന ടൂള്‍കിറ്റുകളില്‍ ഒന്നാണ്. ഇതിന് അവര്‍ ഇന്ത്യയില്‍ പ്രമുഖമാധ്യമ ദല്ലാളന്മാര്‍ക്ക് ഫണ്ട് ചെയ്യുന്നതായും റിപ്പോര്‍ട്ടുകളുണ്ട്.
ആര്‍എസ്എസ് സര്‍സംഘചാലക് മോഹന്‍ ഭാഗവതിന്റെ 75ാം പിറന്നാള്‍ ദിനത്തോടനുബന്ധിച്ചായിരുന്നു മോദിയുടെ ലേഖനം. മോഹന്‍ ഭാഗവതിന്റെ പ്രീതി നേടാനുള്ള മോദിയുടെ നിരാശജനകമായ നീക്കമെന്നാണ് ജയറാം രമേശ് ഇതിനെ വിശേഷിപ്പിക്കുന്നത്. എന്തിനാണ് ഇക്കാര്യങ്ങള്‍ ജയറാം രമേശ് ഇത്ര ആശങ്കാകുലനാകുന്നത്, പകരം ആ രാഹുല്‍ ഗാന്ധിയെ നന്നാക്കിക്കൂടേ എന്നാണ് ബിജെപി നേതാക്കളുടെ പ്രതികരണം.
