മുംബൈ: മുകേഷ് അംബാനിയുടെ മകന്‍ അനന്ത് അംബാനി സ്ഥാപിച്ച വന്താര എന്ന മൃഗങ്ങളെ രക്ഷിച്ച് പുനരധിവസിപ്പിക്കുന്ന സുവോളജിക്കല്‍ പാര്‍ക്കിനെ നശിപ്പിക്കാന്‍ രാഷ്‌ട്രീയ നീക്കം തുടരുകയാണ്. മോദിയോട് കൂറ് പുലര്‍ത്തുന്നു എന്ന ഒറ്റക്കാരണത്താല്‍ മോദി വിരുദ്ധമാധ്യമമായ ദി വൈര്‍ മാസിക വന്താരയ്‌ക്കെതിരെ യുദ്ധം പ്രഖ്യാപിച്ചിരിക്കുകയാണ്.
പക്ഷെ മുകേഷ് അംബാനിയുടെ മകന്‍ അനന്ത് അംബാനിയുടെ അഗാധമായ മൃഗസ്നേഹം എന്ന സദുദ്ദേശ്യത്തെ ന്യായീകരിക്കുന്ന ഒരു കഥ കേരളത്തില്‍ നിന്നും ഉയര്‍ന്നു കേള്‍ക്കുന്നു. അത് എല്ലാ മലയാളികള്‍ക്കും അറിയുന്ന പുതുപ്പള്ളി സാധു എന്ന ആനയുടെ കഥയാണ്. 55 വയസ്സുള്ള പുതുപ്പള്ളി സാധു കുടലിന് അസുഖം ബാധിച്ച ആനയാണ് . ഈ ആനയുടെ രോഗം ചികിത്സിച്ച് ഭേദമാക്കാനാണ് വന്താരയിലേക്ക് കോട്ടയത്ത് നിന്നും അപേക്ഷ പോയത്.
പുതുപ്പള്ളി സാധുവിന്റെ ഉടമയായ പോത്തന്‍ വര്‍ഗ്ഗീസാണ് ആനയെ രക്ഷിക്കണമെന്നാവശ്യപ്പെട്ട് വന്താരയെ സമീപിക്കണമെന്ന് ചീഫ് വൈല്‍ഡ് ലൈഫ് വാര്‍ഡനോട് ആവശ്യപ്പെട്ടത്. ലോക്കല്‍ മൃഗഡോക്ടര്‍മാര്‍ക്കും വനപാലകര്‍ക്കും ചികിത്സയിലൂടെ പുതുപ്പള്ളി സാധുവിന്റെ രോഗം ഭേദമാക്കാന്‍ സാധിച്ചില്ല. ചീഫ് വൈല്‍ഡ് വാര്‍ഡനും പോത്തന്‍ വര്‍ഗ്ഗീസിന്റെ ആവശ്യം അതോടെ പിന്താങ്ങി. വന്താരയുടെ സാന്ത്വനം തേടി ഇവര്‍ അപേക്ഷ സമര്‍പ്പിച്ചു.
ഉടനെ വന്താരയുടെ ഡോക്ടര്‍ വീഡിയോ കാള്‍ വഴി പുതുപ്പള്ളി സാധുവിനെ പരിശോധിച്ചു. പിന്നീട് വന്താര അവരുടെ ആധുനിക മെഡിക്കല്‍ കിറ്റുമായി അടിയന്തരസഹായസംഘത്തെ അയച്ചു. ഡോ. വൈശാഖ് എന്ന വെറ്ററിനറി കണ്‍സള്‍ട്ടന്‍റാണ് ആ ടീമിനെ നയിച്ചത്. അമര്‍ ഘരാട്ട്, പ്രിതീഷ് തായഡേ എന്നീ രണ്ട് മൃഗഡോക്ടര്‍മാരും സംഘത്തില്‍ ഉണ്ടായിരുന്നു. ശരിയായി തിന്നുകയും കുടിക്കുകയും ചെയ്യാത്തതിനാല്‍ ആന ക്ഷീണിച്ചിരുന്നു. ഐവി ഫ്ലൂയിഡ് 80 ലിറ്ററോളം ദിവസേന നല്‍കി. മലദ്വാരഭാഗങ്ങളില്‍ ജലാശം വര്‍ധിപ്പിക്കാന്‍ മരുന്നുകള്‍ നല്‍കി. വേദനയ്‌ക്കുള്ള മരുന്നും നല്‍കി. മലവിസര്‍ജ്ജനം സുഗമമാക്കാന്‍ വേണ്ടി ആവണക്കെണ്ണകൊണ്ട് ഉഴിച്ചില്‍ നടത്തി.
പിന്നീട് ആനയെ കോളണോസ്കോപിക്ക് (Colonoscopy) വിധേയമാക്കി. ദഹനം നടക്കേണ്ട മസിലുകള്‍ ചുരുങ്ങിയിരിക്കുന്നതായി കണ്ടെത്തി. ഇത് ഭക്ഷണം കുടലിലൂടെ സുഗമമായി നീങ്ങുന്നതിന് തടസ്സമാകും. ഇത് മതിയായ വെള്ളം കുടിക്കാന്‍ തോന്നിക്കില്ല. ഭക്ഷണം ചവച്ച് കഴിക്കാന്‍ സാധിക്കാതെ വരും. അമിതമായി ഭക്ഷണം അമിതമായി ഭക്ഷണം വിഴുങ്ങുതിലേക്ക് എത്തിക്കും. അത് ആനകളുടെ മരണത്തിന് വരെ കാരണമാകും. വീണ്ടും ഒരു കോളനോസ്കോപി കൂടി നടത്തി. കുടലില്‍ തടസ്സം കണ്ടെത്തി. പിന്നീട് ശസ്ത്രക്രിയയിലൂടെ കുടലില്‍ നിന്നും 32 കിലോ വരുന്ന കുടല്‍ തടസ്സം നീക്കിക്കളഞ്ഞു. ഇതോടെ പുതുപ്പള്ളി സാധു സാധാരണ നിലയില്‍ വിസര്‍ജ്ജനം നടത്താന്‍ തുടങ്ങി. മൂത്രവും സുഗമമായി പോയി. അതോടെ ആന പതിയെ സാധാരണനിലയിലാകാന്‍ തുടങ്ങി. പിന്നെ ആനയ്‌ക്ക് സ്വാഭാവിക വിശപ്പ് തിരിച്ച് വന്നു. . ഭക്ഷണം സാധാരണനിലയില്‍ കഴിക്കാന്‍ തുടങ്ങി. “ഇവിടുത്തെ മൃഗഡോക്ടര്‍മാര്‍ ആനയുടെ രോഗം കണ്ടെത്തിയിരുന്നെങ്കിലും അവര്‍ക്ക് അത് പരിഹരിക്കാനുള്ള ആധുനിക മെഡിക്കല്‍ സംവിധാനം കേരളത്തില്‍ ഇല്ലായിരുന്നു. അതാണ് വന്താരയില്‍ നിന്നും കിട്ടിയത്. “- പുതുപ്പള്ളി സാധുവിന്റെ ഉടമ പോത്തന്‍ വര്‍ഗ്ഗീസ് പറയുന്നു. ആന ചികിത്സകളോട് ശാന്തമായി സഹകരിച്ചവെന്ന് ഡോ. വൈശാഖ്.
കള്ളപ്പണം വെളുപ്പിക്കല്‍, മൃഗങ്ങളോടുള്ള ക്രൂരത… തുടങ്ങി പല കുറ്റങ്ങളും വന്താരയ്‌ക്ക് നേരെ ഉന്നയിച്ചിരിക്കുകയാണ് ദി വൈര്‍ മാഗസിനും മറ്റ് ചില പരിസ്ഥിതി പ്രവര്‍ത്തകരും.. അനന്ത് അംബാനിയുടെ സദുദ്ദേശ്യത്തെ തകര്‍ക്കാനുള്ള ചീപ് പൊളിറ്റിക്സാണ് ഇതെന്ന് പലരും പറയുന്നു. ദി വൈര്‍ മാസികയും മറ്റും കോടതിയില്‍ കേസിന് പോയി. ഇത് സംബന്ധിച്ച് സുപ്രീംകോടതി നിയോഗിച്ച പ്രത്യേക അന്വേഷണ സംഘം അവരുടെ അന്വേഷണ റിപ്പോര്‍ട്ട് സുപ്രീംകോടതിയില്‍ സമര്‍പ്പിച്ചിരിക്കുകയാണ്. പുതുപ്പള്ളി സാധുവിനെ എത്രയോ ക്ഷേത്രോത്സവങ്ങളില്‍ ആസ്വദിച്ച ആനക്കമ്പക്കാരുടെ പ്രാര്‍ത്ഥന വന്താര സ്ഥാപിച്ച അനന്ത് അംബാനിക്കാണ്. കാരണം അടുത്ത ഉത്സവസീസണില്‍ അവര്‍ക്ക് പുതുപ്പള്ളി സാധുവിനെ വീണ്ടും പഴയ ചുറുചുറുക്കോടെ കാണാനാകും.
