ന്യൂദല്‍ഹി: ഇന്ത്യ ഡീഡോളറൈസേഷന്റെ പാതയിലേക്ക് ചുവടുവെയ്‌ക്കാന്‍ തുടങ്ങിയതോടെ അമേരിക്കയില്‍ ഫലം കണ്ടു. ട്രംപ് നല്ല ചങ്ങാതിയാണെന്നും മഹാനായ പ്രധാനമന്ത്രിയാണെന്നും ഉള്ള ട്രംപിന്റെ പ്രസ്താനവയ്‌ക്ക് പിന്നില്‍ ഇന്ത്യയുടെ ഡീഡോളറൈസേഷന്‍ ഭീഷണിയാണോ എന്ന ചോദ്യം ഉയരുന്നു.
ഇതിന്റെ ഭാഗമായാണ് റിസര്‍വ്വ് ബാങ്ക് അവരുടെ നാണ്യശേഖരം വൈവിധ്യവല്‍ക്കരിക്കാന്‍ ശ്രമം തുടങ്ങിയതായി കേന്ദ്രധനമന്ത്രി നിര്‍മ്മല സീതാരാമന്‍ ഒരു അഭിമുഖത്തില്‍ വെളിപ്പെടുത്തല്‍ നടത്തിയിരുന്നു. യുഎസ് ട്രഷറികളില്‍ ഡോളറില്‍ ഉള്ള ഇന്ത്യയുടെ നിക്ഷേപങ്ങള്‍ കുറേശ്ശെയായി സ്വര്‍ണ്ണം ഉള്‍പ്പെടെയുള്ള നിക്ഷേപങ്ങളിലേക്ക് മാറ്റാന്‍ റിസര്‍വ്വ് ബാങ്ക് ശ്രമം തുടങ്ങിയതായും നിര്‍മ്മല സീതാരാമന്‍ വെളിപ്പെടുത്തിയിരുന്നു. ആഗോളനിക്ഷേപത്തിന്റെ കാര്യത്തില്‍ സുരക്ഷിതത്താവളമായി കരുതിയിരുന്ന ഡോളറിന്മേലുള്ള ബോണ്ട് നിക്ഷേപം പലരും പിന്‍വലിച്ചത് വലിയ തിരിച്ചടിയായിരിക്കുകയാണ്. ഇന്ത്യ മാത്രമല്ല, ചൈന വന്‍തോതില്‍ ഡോളറില്‍ യുഎസ് ട്രഷറികളില്‍ നടത്തിയ നിക്ഷേപങ്ങള്‍ പിന്‍വലിച്ച് സ്വര്‍ണ്ണത്തിലേക്ക് മാറ്റിയിരുന്നു. .ജപ്പാനും ഭാഗികമായി അവരുടെ നിക്ഷേപവും ഡോളറില്‍ നിന്നും മാറ്റി സ്വര്‍ണ്ണത്തിലേക്ക് നീക്കിയിരുന്നു. റഷ്യ-ഉക്രൈന്‍ യുദ്ധം സൃഷ്ടിക്കുന്ന അസ്ഥിരതകള്‍ക്കിടയില്‍ ഡോളറിനേക്കാള്‍ മൂല്യക്ഷയം കുറഞ്ഞ നിക്ഷേപം സ്വര്‍ണ്ണമാണെന്ന കണക്കുകൂട്ടലുകളാണ് സ്വര്‍ണ്ണത്തിലേക്ക് നാണ്യ ശേഖരം മാറ്റാനുള്ള തീരുമാനത്തിന് പിന്നില്‍.
ട്രംപ് ഡോളറിന്റെ ആധിപത്യം കളഞ്ഞുകുളിക്കുമോ?
മറ്റ് രാജ്യങ്ങളില്‍ നിന്നും യുഎസിലേക്ക് ഇറക്കുമതി ചെയ്യുന്ന സാധനങ്ങള്‍ക്ക് അമിതമായ വ്യാപാരച്ചുങ്കം ഏര്‍പ്പെടുത്തിക്കൊണ്ട് അമേരിക്കയെ സംരക്ഷിക്കാനുള്ള ട്രംപിന്റെ നീക്കം ഏകദേശം ഏഴ് പതിറ്റാണ്ടായുള്ള ഡോളറിന്റെ ആധിപത്യം കളഞ്ഞുകുളിക്കുമോ എന്ന ചോദ്യം ആഗോള പ്രശസ്തരായ പല സാമ്പത്തിക വിദഗ്ധരും ഉയര്‍ത്തുന്നു. പ്രമുഖ സാമ്പത്തിക അനലിസ്റ്റായ മാര്‍ക് ചാന്‍ഡ് ലര്‍ ഡോളറിന്റെ ആധിപത്യം തകര്‍ന്നുതുടങ്ങിയെന്ന പ്രവചനവുമായി രംഗത്ത് വന്നിട്ട് കുറച്ചുനാളായി. 2025 ജനവരി മുതലുള്ള കണക്കെടുത്താല്‍ ഇതുവരെ ഡോളറിന് 11 ശമതാനം മൂല്യശോഷണം സംഭവിച്ചുവെന്നും ഇതില്‍ അഞ്ച് ശതമാനത്തോളം മൂല്യശോഷണത്തിന് കാരണം ട്രംപിന്റെ പ്രതികാരബുദ്ധിയോടെയുള്ള വ്യാപാരച്ചുങ്കമാണെന്നും മാര്‍ക് ചാന്‍ഡ് ലര്‍ പറയുന്നു. ബനോക് ബേണ്‍ കാപിറ്റല്‍ മാര്‍ക്കറ്റിന്റെ പ്രധാന മാര്‍ക്കറ്റ് സ്ട്രാറ്റജിസ്റ്റാണ് മാര്‍ക് ചാന്‍ഡ് ലര്‍.
ഡോളറിന്റെ കീഴോട്ടിറക്കം തുടങ്ങിക്കഴിഞ്ഞുവെന്ന് മാര്‍ക് ചാന്‍ഡ് ലര്‍ പ്രവചിക്കുന്നു. വാസ്തവത്തില്‍ ഇറക്കുമതി ചുങ്കം ഉയര്‍ത്തിയാല്‍ ആ രാജ്യത്തിന്റെ കറന്‍സിയുടെ മൂല്യം ഉയരുക എന്നതാണ് സാധാരണ സംഭവിക്കുക. എന്നാല്‍ ഡോളറിന്റെ കാര്യത്തില്‍ നേര്‍വിപരീതമാണ് സംഭവിച്ചത്. ട്രംപിന്റെ പ്രതികാരച്ചുങ്കത്തോടെ ഡോളര്‍ കീഴോട്ടുപോയി.
എന്താണ് ഡീ ഡോളറൈസേഷന്‍?
രാജ്യങ്ങള്‍ അവരുടെ ഡോളറിലുള്ള കരുതല്‍ ധനം കുറച്ചുകൊണ്ടുവരുന്ന പ്രക്രിയയെയാണ് ഡീഡോളറൈസേഷന്‍ എന്ന് വിളിക്കുന്നത്. ഡോളറില്‍ കരുതല്‍ ധനം കയ്യില്‍വെയ്‌ക്കുന്നതിന് പകരം പല രാജ്യങ്ങളും സ്വര്‍ണ്ണത്തിലേക്ക് മാറുകയാണ്. കാരണം ഡോളറിന്റെ മൂല്യം ചാഞ്ചാടുകയും സ്വര്‍ണ്ണത്തിന്റെ മൂല്യം മാറാതെ തുടരുമെന്ന പ്രതീക്ഷയും ഉള്ളതിനാലാണിത്. ഇതോടെ ആഗോള വ്യാപാരത്തിലും ധനകാര്യപ്രവര്‍ത്തനങ്ങളിലും ഉള്ള ഡോളറിന്റെ ആധിപത്യം ക്രമേണ ഇല്ലാതാകും. ഫലത്തില്‍ അമേരിക്കയുടെ ആഗോളനിയന്ത്രകന്‍ എന്ന മുഖമാണ് നഷ്ടമാവുക.
