തിരുവനന്തപുരം: രാഹുല്‍ മാങ്കൂട്ടത്തില്‍ എം.എല്‍.എക്കെതിരായ പീഡന ആരോപണങ്ങളില്‍ അന്വേഷണം എവിടെ തുടങ്ങണമെന്ന അനിശ്ചിതത്വത്തില്‍ പൊലീസ് നില്‍ക്കെ ആ യുവതിയെ താന്‍ കണ്ടുവെന്ന വെളിപ്പെടുത്തലുമായി ന്യൂസ് മലയാളത്തിലെ മാധ്യമ പ്രവര്‍ത്തക ലക്ഷ്മി പദ്മയുടെ ഫേസ്ബുക്ക് കുറിപ്പ്. ഗര്‍ഭച്ഛിദ്രം സംബന്ധിച്ച് രാഹുലുമായി ഒരു യുവതി സംസാരിക്കുന്ന ഓഡിയോ പുറത്തിറങ്ങിയെങ്കിലും അതാരാണെന്ന് വ്യക്തമായിരുന്നില്ല. ഈ ഘട്ടത്തിലാണ് അങ്ങനെ ഒരു പെണ്‍കുട്ടി ഉണ്ട് അവര്‍ വളരെ അധികം മാനസികാഘാതത്തില്‍ ആണെന്നും ലക്ഷ്മി പദ്മ വെളിപ്പെടുത്തുന്നത്. ഗര്‍ഭഛിദ്രവും അതേത്തുടര്‍ന്നുണ്ടായ ആരോഗ്യപ്രശ്നങ്ങളും മൂലം പരാതിയുമായി മുന്നോട്ട് പോകാനുള്ള മാനസികമായ കരുത്ത് അവള്‍ക്കോ ആ കുടുംബത്തിനോ ഇല്ലെന്നാണ് പറയുന്നതെന്നും ഫേസ്ബുക്ക് കുറിപ്പില്‍ പറയുന്നുണ്ട്.
