പാലക്കാട്: ഗുരുവായൂര്‍ ദേവസ്വം ചെമ്പൈ സംഗീതോത്സവം സുവര്‍ണ ജൂബിലിയാഘോഷത്തിന് 17ന് തുടക്കം. പാലക്കാട്, ഗുരുവായൂര്‍ ക്ഷേത്രം, കോഴിക്കോട് തളി ക്ഷേത്രം, തൃശൂര്‍ സംഗീത നാടക അക്കാദമി റിജിയണല്‍ തിയേറ്റര്‍, വൈക്കം ശ്രീമഹാദേവക്ഷേത്രം, തിരുവനന്തപുരം ശ്രീവരാഹം ചെമ്പൈ മെമ്മോറിയല്‍ ഹാള്‍ എന്നിവിടങ്ങളിലായി ഒരു വര്‍ഷം നീളുന്ന സുവര്‍ണജൂബിലി ആഘോഷം നടക്കുമെന്ന് ഗുരുവായൂര്‍ ദേവസ്വം ചെയര്‍മാന്‍ ഡോ. വി.കെ. വിജയന്‍ പത്രസമ്മേളനത്തില്‍ പറഞ്ഞു.
ചെമ്പൈ അനുസ്മരണ പ്രഭാഷണം, സംഗീത സെമിനാറുകള്‍, ചെമ്പൈ വൈദ്യനാഥ ഭാഗവതരുടെ ശിഷ്യര്‍, ചെമ്പൈ സംഗീതോത്സവത്തില്‍ ദീര്‍ഘ നാളായി പ്രവര്‍ത്തിക്കുന്ന മുതിര്‍ന്ന കര്‍ണാടക സംഗീതജ്ഞര്‍ എന്നിവരെ ആദരിക്കല്‍, ചെമ്പൈയുടെ ജീവചരിത്ര ഗ്രന്ഥമായ ‘ചെമ്പൈ സംഗീതവും ജീവിതവും സുവര്‍ണ ജൂബിലി പതിപ്പ് പ്രകാശനം,
സുവര്‍ണജൂബിലി സ്മാരക തപാല്‍ സ്റ്റാമ്പ്, തപാല്‍ കവര്‍ പ്രകാശനം എന്നിവ ഉള്‍പ്പെടെ വിവിധ പരിപാടികള്‍ ഉണ്ടായിരിക്കും.
ചെമ്പൈ സംഗീതോത്സവ സുവര്‍ണജൂബിലി ആഘോഷങ്ങളുടെ സംസ്ഥാനതല ഉദ്ഘാടനം 17ന് വൈകിട്ട് അഞ്ചിന് പാലക്കാട് കോട്ടായി ചെമ്പൈ ഗ്രാമത്തില്‍ ദേവസ്വം മന്ത്രി വി.എന്‍. വാസവന്‍ നിര്‍വഹിക്കും. സുവര്‍ണ ജൂബിലി ലോഗോ ഗുരുവായൂര്‍ ദേവസ്വം അഡ്മിനിസ്ട്രേറ്റര്‍ ഒ.ബി. അരുണ്‍ കുമാറിന് നല്‍കി പ്രകാശനം ചെയ്യും.
തപാല്‍ സ്റ്റാമ്പ്, കവര്‍ എന്നിവയുടെ പ്രകാശനം കെ. രാധകൃഷ്ണന്‍ എംപിയും, ചെമ്പൈ സംഗീതവും ജീവിതവും’ എന്ന ജീവചരിത്ര ഗ്രന്ഥത്തിന്റെ സുവര്‍ണജൂബിലി പതിപ്പ് പി.പി. സുമോദ് എംഎല്‍എയും പ്രകാശനം ചെയ്യും.
ചെമ്പൈയുടെ ശിഷ്യ സുകുമാരി നരേന്ദ്രമേനോന്‍, മൃദംഗവിദ്വാന്‍ കുഴല്‍മന്ദം രാമകൃഷ്ണന്‍, പി.എന്‍. സുബ്ബരാമന്‍, വിമല്‍ എന്നിവരെ ആദരിക്കും. കവിയും എഴുത്തുകാരനുമായ ആലങ്കോട് ലീലാകൃഷ്ണന്‍ അനുസ്മരണ പ്രഭാഷണം നടത്തും.
തുടര്‍ന്ന് കര്‍ണാടക സംഗീതജ്ഞന്‍ ടി.എം. കൃഷ്ണയുടെ കച്ചേരിയും ഉണ്ടായിരിക്കും. 19ന് പാലക്കാട് ഗവ. ചെമ്പൈ സ്മാരക സംഗീത കോളജില്‍ രാവിലെ 10ന് സെമിനാറും ഉണ്ടായിരിക്കും.
വാര്‍ത്താസമ്മേളനത്തില്‍ ഗുരുവായൂര്‍ ദേവസ്വം ഭരണസമിതി അംഗം സി. മനോജ്, അഡ്മിനിസ്ട്രേറ്റര്‍ ഒ.ബി. അരുണ്‍കുമാര്‍, സുവര്‍ണജൂബിലി സ്വാഗതസംഘം ചെയര്‍മാന്‍ കീഴത്തൂര്‍ മുരുകന്‍, കണ്‍വീനര്‍ ചെമ്പൈ സുരേഷ് എന്നിവര്‍ പങ്കെടുത്തു.
