മലപ്പുറം: പാണ്ടിക്കാട് പ്രവാസി വ്യവസായിയെ തട്ടിക്കൊണ്ടുപോയ സംഭവത്തിന് പിന്നില് ദുബായിലെ സാമ്പത്തിക ഇടപാടെന്ന് സൂചന. തട്ടിക്കൊണ്ടു പോകുന്നതിന്റെ കൂടുതല് ദൃശ്യങ്ങള് പുറത്ത് വന്നു. വട്ടിപ്പറമ്പത്ത് ഷമീറിനെയാണ് പാണ്ടിക്കാട് ജി എല് പി സ്കൂളിന് സമീപം നിന്ന് തട്ടിക്കൊണ്ടുപോയത്.
ദുബായിലെ സാമ്പത്തിക ഇടപാടാണ് തട്ടിക്കൊണ്ടുപോകലിന് പിന്നില് എന്നാണ് സൂചന. ഷമീറിനെ ഒരു സംഘം ആക്രമിക്കുന്നതും കാറില് കയറ്റുന്നതും ഷമീര് നിലവിളിക്കുന്നതും ദൃശ്യങ്ങളിലുണ്ട്. കഴിഞ്ഞ രാത്രി എട്ടുമണിയോടെയാണ് ഒരു സംഘം പ്രവാസി വ്യവസായിയെ തട്ടിക്കൊണ്ടു പോയത്.
ഷമീര് കുടുംബവുമൊത്ത് ദുബായിലാണ് താമസം. ആഗസ്റ്റ് നാലിന് നാട്ടില് എത്തിയ ഷമീര് 10 ദിവസത്തിനകം തിരിച്ചു പോകാന് തയാറെടുക്കവെയാണ് തട്ടിക്കൊണ്ടുപോയത്. വീടിന് സമീപം ഇന്നോവ കാറില് കാത്തിരുന്ന സംഘം ബൈക്കില് വരികയായിരുന്ന ഷമീറിനെ ബലമായി വാഹനത്തില് കയറ്റി കൊണ്ടു പോകുകയായിരുന്നു.
ദുബായില് മരുന്ന് ബിസിനസ് നടത്തുന്ന ആളാണ് ഷമീര്.ബുധനാഴ്ച രാവിലെ പത്തുമണിയോടെ യുഎഇയിലുള്ള ഷമീറിന്റെ ബിസിനസ് പങ്കാളിയ്ക്ക് ഷമീറിന്റെ ഫോണില് നിന്ന് മറ്റൊരാള് വാട്സ്ആപ്പ് കോള് ചെയ്തു. ഒരു കോടി 60 ലക്ഷം രൂപയ്ക്ക് സമാനമായ ചെക്കുകള് തയാറാക്കി വെക്കണം എന്നായിരുന്നു ആവശ്യപ്പെട്ടത്. ഭാര്യയെ വിളിച്ച് കേസുമായി മുന്നോട്ടു പോകരുതെന്നും പറഞ്ഞു.തട്ടിക്കൊണ്ടു പോയ വാഹനം കണ്ടെത്തുന്നതിന് വേണ്ടി കൂടുതല് സിസിടിവികള് പൊലീസ് പരിശോധിച്ചുവരുന്നു.
