ന്യൂദല്‍ഹി: ഓപ്പറേഷന്‍ സിന്ദൂറില്‍ ഇന്ത്യ കൈവരിച്ച വലിയൊരു സാങ്കേതിക വിജയത്തെക്കുറിച്ച് തുറന്ന് പറഞ്ഞ് എയര്‍ ചീഫ് മാര്‍ഷല്‍ അമര്‍പ്രീത് സിങ്ങ്. കരയില്‍ നിന്നും 314 കിലോമീറ്റര്‍ അകലെയായി ആകാശത്ത് നില്‍ക്കുകയായിരുന്ന പാക് വിമാനം വെടിവെച്ചിടാനായത് നിസ്സാര നേട്ടമല്ലെന്നും ഇത് ഇന്ത്യയെ സംബന്ധിച്ചിടത്തോളം ഒരു ശത്രുവിമാനത്തെ വെടിവെച്ചിടുന്നതിന്റെ ദൂരത്തിന്റെ കാര്യത്തില്‍ റെക്കോഡാണെന്നും എയര്‍ചീഫ് മാര്‍ഷല്‍ അമര്‍പ്രീത് സിങ്ങ്. എസ് 400 എന്ന റഷ്യയുടെ വ്യോമപ്രതിരോധസംവിധാനത്തിലെ മിസൈല്‍ 314 കിലോമീറ്റര്‍ ദൂരത്തിലുള്ള ഒരു ശത്രുവിമാനത്തെ വെടിവെച്ചിട്ടത് എസ് 400നെ സംബന്ധിച്ചിടത്തോളം ഒരു ലോകറെക്കോഡാണെന്നും എയര്‍ ചീഫ് മാര്‍ഷല്‍ പറഞ്ഞു.
കരയില്‍ നിന്നും ആകാശത്തില്‍ സ്ഥിതിചെയ്യുന്ന വിമാനത്തിലേക്ക് ഇന്ത്യ നിറയൊഴിക്കുകയായിരുന്നു. സുദര്‍ശനചക്ര എന്ന പേരില്‍ അറിയപ്പെടുന്ന റഷ്യയില്‍ നിന്നും വാങ്ങിയ എസ് 400 ഉപയോഗിച്ചാണ് ഈ പാകിസ്ഥാന് വിമാനത്തെ വെടിവെച്ചിട്ടത്. 314 കിലോമീറ്റര്‍ അകലെയായി ആകാശത്ത് സ്ഥിതി ചെയ്തിരുന്ന പാകിസ്ഥാന്റെ അവാക്സ് വിഭാഗത്തില്‍പ്പെട്ട വിമാനമാണ് വെടിവെച്ചിട്ടതെന്നും അദ്ദേഹം പറഞ്ഞു.
ഇന്ത്യ റഷ്യയുടെ പക്കല്‍ നിന്നും വാങ്ങിയ എസ് 400 എന്ന വ്യോമപ്രതിരോധസംവിധാനം ഓപ്പറേഷന്‍ സിന്ദൂറില്‍ ഏറെ സഹായകരമായി. ഒരു സമയം ശത്രുവിന്റെ 80 ആക്രമണങ്ങളെ തിരിച്ചറിയാനും ഇതില്‍ 36 എണ്ണത്തിനെയെങ്കിലും വെടിവെച്ചിടാനും ഉള്ള കഴിവ് എസ് 400നുണ്ട്. റഷ്യയുടെ കയ്യില്‍ നിന്നും വാങ്ങിയ ശേഷം ഇതിന് സുദര്‍ശന ചക്ര എന്നാണ് ഇന്ത്യ പേരിട്ടിരിക്കുന്നത്.
