ന്യൂദല്ഹി: അദാനിയ്ക്കെതിരെ അമേരിക്കയില് കേസുള്ളതിനാല് ട്രംപിനെ വിമര്ശിക്കാന് മോദി ഭയപ്പെടുന്നുവെന്ന രാഹുല് ഗാന്ധിയുടെ വിമര്ശനം അപഹാസ്യമായി. ട്രംപിനെതിരെ പ്രധാനമന്ത്രി മോദിയുടെ അതിശക്തനീക്കം കണ്ട് ഇപ്പോള് മോദിയെ പിന്തുണയ്ക്കേണ്ട ഗതികേടിലാണ് രാഹുല് ഗാന്ധി. ശുദ്ധ അംസബന്ധങ്ങളും നുണകളും അര്ധസത്യങ്ങളും നിറഞ്ഞ രാഹുല് ഗാന്ധിയുടെ വാര്ത്താസമ്മേളനങ്ങളും പ്രസ്താവനകളും അപഹാസ്യമായി മാറുന്നതിന് മറ്റൊരു ഉദാഹരണം കൂടിയാണ് ഇത്.
ഇന്ത്യാ പാക് യുദ്ധം അവസാനിപ്പിച്ചത് തന്റെ മധ്യസ്ഥത മൂലമാണെന്ന് ട്രംപിന്റെ പ്രസ്താവന മൂന്ന് തവണ പ്രധാനമന്ത്രി മോദി തള്ളിക്കളഞ്ഞിരുന്നു. റഷ്യയില് നിന്നും എണ്ണ വാങ്ങിയാല് ഇന്ത്യയ്ക്ക് മേല് കൂടുതല് വ്യാപാര ത്തീരുവ ഏര്പ്പെടുത്തുമെന്നായിരുന്നു ട്രംപിന്റെ അടുത്ത ഭീഷണി. എന്നാല് ജനങ്ങളുടെ ഊര്ജ്ജസുരക്ഷയാണ് ഇന്ത്യയ്ക്ക് പ്രധാനമെന്നും അതിനാല് റഷ്യയില് നിന്നും ഊര്ജ്ജം വാങ്ങില്ലെന്ന് പറയാന് കഴിയില്ലെന്നും മോദി പ്രസ്താവിച്ചിരുന്നു. ഇതിനപ്പുറം അമേരിക്കയും യൂറോപ്യന് രാജ്യങ്ങളും റഷ്യയില് നിന്നും ഇന്ധനവും പല ഉല്പന്നങ്ങളും വാങ്ങിക്കൊണ്ടിരിക്കുന്ന കാര്യങ്ങളും അക്കമിട്ട് നിരത്തി മോദി ചോദ്യം ചെയ്യുകയും ചെയ്തിരുന്നു. ഇത്രത്തോളം അമേരിക്കയെ വെല്ലുവിളിക്കാനുള്ള ചങ്കൂറ്റം ധീരയെന്ന് കോണ്ഗ്രസുകാര് വിശേഷിപ്പിക്കുന്ന രാഹുല് ഗാന്ധിയുടെ അമ്മൂമ്മ ഇന്ദിരാഗാന്ധിക്ക് പോലും ഇല്ലായിരുന്നുവെന്ന് സമൂഹമാധ്യമങ്ങളില് വിമര്ശനം ഉയരുന്നുണ്ട്.
ഇപ്പോള് അദാനിയ്ക്കെതിരെ യുഎസ് കോടതിയില് കേസുള്ളതിനാലാണ് മോദി ട്രംപിനെ വിമര്ശിക്കാത്തത് എന്ന് രാഹുല്ഗാന്ധി പറഞ്ഞാല് കോണ്ഗ്രസുകാരില് നിന്നു തന്നെ രാഹുല്ഗാന്ധി വിമര്ശനം നേരിടേണ്ടിവരും. അതോടെ തല്ക്കാലം രാജ്യതാല്പര്യം മുന്നിര്ത്തി മോദിയെ പരസ്യമായി പിന്തുണയ്ക്കേണ്ട ഗതികേടിലാണ് രാഹുല് ഗാന്ധി. മാത്രമല്ല, യുഎസുമായുള്ള വ്യാപാരക്കരാറില് കര്ഷകരുടെ താല്പര്യം ഹനിച്ചുകൊണ്ടുള്ള ഒരു വിട്ടുവീഴ്ചയ്ക്കും തയ്യാറല്ലെന്ന മോദിയുടെ പ്രസ്താവനയും രാഹുല് ഗാന്ധിയെ പ്രതിരോധത്തിലാക്കുന്നു. യുഎസുമായി വ്യാപാരക്കരാര് ഒപ്പുവെച്ചാല് കര്ഷകരുടെ താല്പര്യം ഹനിച്ചുവെന്ന് കുറ്റപ്പെടുത്തി കര്ഷകരെ ദല്ഹിയിലെ ഹൈവേകളില് ഇറക്കാനുള്ള രാഹുല് ഗാന്ധിയുടെയും കൂട്ടരുടെയും ആസൂത്രണം ഇതോടെ പാളിയിരിക്കുകയാണ്.
