ന്യൂദല്‍ഹി: കേന്ദ്രസര്‍ക്കാര്‍ 110 ബ്രഹ്മോസ് മിസൈല്‍ കൂടി വാങ്ങുകയാണെന്നും ഇതിന് 10,800 കോടി രൂപ കേന്ദ്രസര്‍ക്കാര്‍ നല്‍കുമെന്നും ഉള്ളവാര്‍ത്ത വന്നപ്പോള്‍ പലരും ചോദിച്ച ചോദ്യമാണ് ബ്രഹ്മോസ് മിസൈല്‍ ഇന്ത്യ എവിടെ നിന്നാണ് വാങ്ങുന്നത് എന്ന്. ഇന്ത്യയുടെ ബ്രഹ്മോസ് മിസൈല്‍ എന്നാണല്ലോ വാര്‍ത്തകളില്‍ എഴുതപ്പെടുന്നത്. ഇന്ത്യയുടെ സ്വന്തമായ ഒരു ബ്രഹ്മോസ് മിസൈല്‍ വാങ്ങാന്‍ എന്തിനാണ് ഇന്ത്യ പണം മുടക്കുന്നത് എന്നതാണ് പലരുടെയും സംശയം.
ഇന്ത്യയുടെ ഡി ആർ ഡി ഒ (ഡിഫന്‍സ് റിസര്‍ച്ച് ആന്‍ഡ് ഡവലപ്മെന്‍റ് ഓര്‍ഗനൈസേഷന്‍) കേന്ദ്രസര്‍ക്കാര്‍ സ്ഥാപനവും റഷ്യയുടെ എന്‍പിഒ മഷിനോസ്ട്രൊയേനിയയും ചേര്‍ന്ന് സംയുക്തമായി നിർമ്മിക്കുന്നതാണ് ബ്രഹ്മോസ് മിസൈൽ. റഷ്യയ്‌ക്ക് 50.5 ശതമാനവും ഇന്ത്യയ്‌ക്ക് 49.5 ശതമാനവും വീതം ഉടമസ്ഥാവകാശമുള്ള ബ്രഹ്മോസ് എയ്റോസ്പേസ് എന്ന കമ്പനിയ്‌ക്കാണ് ബ്രഹ്മോസ് മിസൈലിന്റെ നിര്‍മ്മാണച്ചുമതല.
ഈ പദ്ധതിയില്‍ തുല്ല്യ നിര്‍മ്മാണപങ്കാളിയാണെങ്കിലും കേന്ദ്രസര്‍ക്കാര്‍ ഇന്ത്യയുടെ വിവിധ സൈനികവിഭാഗങ്ങള്‍ക്ക് വിന്യസിക്കാനായി ബ്രഹ്മോസ് മിസൈല്‍ വാങ്ങുന്നതിന് ബ്രഹ്മോസ് എയ്റോസ്പേസിന് പണം നല്‍കണം. ബ്രഹ്മോസ് മിസൈല്‍ വികസിപ്പിക്കാനും ഉല്‍പാദിപ്പിക്കാനും കേന്ദ്രസര്‍ക്കാര്‍ പണം മുടക്കുന്നുണ്ട്. പക്ഷെ മറ്റേതൊരു രാജ്യവും ബ്രഹ്മോസ് മിസൈല്‍ വാങ്ങുമ്പോള്‍ പണം നല്‍കുന്നതുപോലെ കേന്ദ്രസര്‍ക്കാരും ബ്രഹ്മോസ് മിസൈല്‍ വാങ്ങുന്നതിന് ബ്രഹ്മോസ് എയ്റോസ്പേസിന് പണം നല്‍കണം.
ഇനി മറ്റൊരു കാര്യം കൂടി പറയാം. ബ്രഹ്മോസ് മിസൈൽ ഇന്ത്യയ്‌ക്ക് സ്വതന്ത്രമായി മറ്റൊരു രാജ്യത്തിനും വിൽക്കാൻ കഴിയില്ല, കാരണം അത് ഇന്ത്യ-റഷ്യ സംയുക്ത സംരംഭമാണ്. ഇരു രാജ്യങ്ങൾക്കും മിസൈലിന്റെ സാങ്കേതികവിദ്യയിൽ 50.5-49.5 വീതം ഓഹരികളാണുള്ളതെങ്കിലും ബ്രഹ്മോസ് മിസൈലുകളുടെ ഏതൊരു കയറ്റുമതിക്കും ഇന്ത്യയുടെയും റഷ്യയുടെയും അനുമതി ആവശ്യമാണ്. അല്ലാതെ ഇന്ത്യയ്‌ക്ക് ഏകപക്ഷീയമായി ബ്രഹ്മോസ് മിസൈല്‍ വില്‍ക്കാന്‍ സാധിക്കില്ല. പക്ഷെ പുറത്തുള്ള രാജ്യങ്ങള്‍ക്ക് ബ്രഹ്മോസ് മിസൈല്‍ വില്‍ക്കുമ്പോള്‍ ലഭിക്കുന്നതിനേക്കാള്‍ കുറഞ്ഞ തുകയ്‌ക്ക് ഇന്ത്യയ്‌ക്ക് ബ്രഹ്മോസ് മിസൈല്‍ വാങ്ങാന്‍ സാധിക്കും.
