കൊച്ചി: കോളജ് കാമ്പസിലെ മഹാത്മാഗാന്ധിയുടെ പ്രതിമയില് ഒരു ജോഡി സണ്ഗ്ലാസ് വെയ്ക്കുകയും മാലയിടുകയും ചെയ്ത് അനാദരവ് കാണിച്ചുവെന്നാരോപിച്ച് നിയമ വിദ്യാര്ത്ഥിക്കെതിരെ ആരംഭിച്ച ക്രിമിനല് നടപടികള് ഹൈക്കോടതി റദ്ദാക്കി.
ആരോപിക്കപ്പെട്ട പ്രവൃത്തി നിസംശയമായും അധാര്മികമാണെങ്കിലും, അത്തരം പെരുമാറ്റത്തെ നിരോധിക്കുകയോ ശിക്ഷ നിര്ദേശിക്കുകയോ ചെയ്യുന്ന ഒരു നിയമത്തിന്റെയും അഭാവത്തില് ഇത് നിയമവിരുദ്ധമാണെന്ന് പറയാനാവില്ലെന്ന് ജസ്റ്റിസ് വി.ജി അരുണ് നിരീക്ഷിച്ചു. ആലുവയിലെ ചൂണ്ടിയിലുള്ള ഭാരത് മാതാ സ്കൂള് ഓഫ് ലീഗല് സ്റ്റഡീസിലെ നിയമ വിദ്യാര്ത്ഥിയാണ് ഹര്ജിക്കാരന്.
2023 ഡിസംബറില് ക്രിസ്മസ് ആഘോഷങ്ങള്ക്കുള്ള ഒരുക്കങ്ങള്ക്കിടെ കോളജ് കാമ്പസില് സ്ഥാപിച്ച ഗാന്ധി പ്രതിമയുടെ മൂക്കില് ഒരു ജോഡി സണ്ഗ്ലാസുകള് വയ്ക്കുകയും കഴുത്തില് മാലയിട്ട് അലങ്കരിക്കുകയും ചെയ്തുവെന്ന് പ്രോസിക്യൂഷന് പറയുന്നു. മഹാത്മാഗാന്ധിയുടെ പ്രതിമ അശുദ്ധമാക്കുന്നതിന് ശിക്ഷ നല്കാന് കേന്ദ്ര നിയമനിര്മാണമോ സംസ്ഥാനം നടപ്പിലാക്കിയ നിയമമോ നിര്ദേശിക്കുന്നില്ലെന്ന് വിദ്യാര്ത്ഥി തന്റെ ഹര്ജിയില് വാദിച്ചു.
