കൊച്ചി :പ്രൊഡ്യുസേഴ്സ് അസോസിയേഷന് ഭാരവാഹി തിരഞ്ഞെടുപ്പില് സാന്ദ്രാ തോമസിന്റെ പത്രിക തള്ളി. പ്രസിഡന്റ്, എക്സിക്യൂട്ടീവ് കമ്മിറ്റി, ട്രഷറര് സ്ഥാനത്തേക്കുള്ള പത്രികയാണ് തള്ളിയത്. ട്രഷറര് സ്ഥാനത്തേക്കുള്ള പത്രിക പരിഗണിക്കവെ സാന്ദ്രാ തോമസും വരണാധികാരിയുമായി വാക്ക് തര്ക്കം ഉണ്ടായി.
ബൈലാ പ്രകാരം മൂന്ന് സിനിമകള് നിര്മ്മിച്ചവര്ക്കേ മത്സരിക്കാനാകൂ എന്ന് വരണാധികാരി പറഞ്ഞു. സാന്ദ്രാ തോമസ് പ്രൊഡക്ഷന്സിന്റെ പേരില് രണ്ട് സിനിമകള് മാത്രമേ നിര്മ്മിച്ചിട്ടുളളൂ എന്ന നിലപാടിലായിരുന്നു വരണാധികാരി.എന്നാല് താന് നിരവധി സിനിമകള് നിര്മ്മിച്ചിട്ടുണ്ടെന്ന് സാന്ദ്ര തോമസ് വാദിച്ചു.
പത്രിക തളളിയതിനെതിരെ നിയമനടപടി സ്വീകരിക്കുമെന്ന് സാന്ദ്ര തോമസ് പറഞ്ഞു.
പ്രൊഡ്യൂസേഴ്സ് അസോസിയേഷന് തെരഞ്ഞെടുപ്പില് മത്സരിക്കാനായി പത്രിക നല്കാന് സാന്ദ്രാ തോമസ് പര്ദ്ദ ധരിച്ച് വന്നത് ശ്രദ്ധ നേടിയിരുന്നു.നിര്മ്മാതാക്കളുടെ തുറിച്ചുനോട്ടം ഒഴിവാക്കാനാണ് പര്ദ്ദയിട്ട് വന്നതെന്നും സാന്ദ്ര തോമസ് പറഞ്ഞു.
ഇവിടെ വരാന് എന്തുകൊണ്ടും ഇതാണ് യോജിച്ച വസ്ത്രം പര്ദ്ദയാണ്. നിര്മാതാക്കളുടെ സംഘടന പുരുഷന്മാരുടെ കുത്തകയാണ്. തനിക്ക് മാറ്റം കൊണ്ടുവരാനാകുമെന്നും അവര് പറഞ്ഞിരുന്നു.
