കൊച്ചി : താര സംഘടന അമ്മ തിരഞ്ഞെടുപ്പില്‍ മത്സരിക്കാന്‍ കുക്കു പരമേശ്വരന് യോഗ്യതയില്ലെന്ന് നടി പൊന്നമ്മ ബാബു.ഹേമ കമ്മിറ്റിക്ക് മുമ്പ് അമ്മയിലെ വനിതാ അംഗങ്ങള്‍ ഒരുമിച്ചു കൂടുകയുണ്ടായി.ഇതിന് നേതൃത്വം നല്‍കിയത് കുക്കു പരമേശ്വരന് ആണ്. സിനിമാ മേഖലയില്‍ നിന്ന് തങ്ങള്‍ നേരിട്ട ദുരനുഭവങ്ങള്‍ പങ്കുവച്ചിരുന്നുവെന്നും ആ യോഗം വീഡിയോയില്‍ പകര്‍ത്തിയതിന്റെ മെമ്മറി കാര്‍ഡ് കുക്കു പരമേശ്വരനാണ് കൈവശം വച്ചതെന്നും പൊന്നമ്മ ബാബു പറഞ്ഞു.
ഈ മെമ്മറി കാര്‍ഡ് ഇപ്പോള്‍ കൈവശമില്ലെന്നാണ് കുക്കു പരമേശ്വരന് പറയുന്നത്. എന്നാല്‍ അത് പിന്നീട് ദുരുപയോഗം ചെയ്യുമോ എന്ന് ആശങ്കയുണ്ടെന്നും പൊന്നമ്മ ബാബു പറഞ്ഞു. അമ്മയിലെ സ്ത്രീകള്‍ ദുരനുഭവങ്ങള്‍ വെളിപ്പെടുത്തിയ മെമ്മറി കാര്‍ഡ് ആണ് കാണാതായത്. ഇടവേള ബാബുവും കുക്കൂപരമേശ്വരനും ചേര്‍ന്നാണ് ഈ മെമ്മറി കാര്‍ഡ് സൂക്ഷിച്ചിരിക്കുന്നതെന്നും അവര്‍ വ്യക്തമാക്കി.
കുക്കു പരമേശ്വരന് ജനറല്‍ സെക്രട്ടറിയായാല്‍ ഈ മെമ്മറി കാര്‍ഡ് വച്ച് അംഗങ്ങളെ ഭീഷണിപ്പെടുത്താന്‍ സാധ്യതയുണ്ട്.മെമ്മറി കാര്‍ഡ് തിരികെ വേണമെന്നും കുക്കു പരമേശ്വരന് തെരഞ്ഞെടുപ്പില്‍ മത്സരിക്കരുതെന്നും പൊന്നമ്മ ബാബു ആവശ്യപ്പെട്ടു.
അമ്മ തെരഞ്ഞെടുപ്പില്‍ പത്രിക സമര്‍പ്പിക്കാനും പിന്‍വലിക്കാനുമുള്ള അവസാന ദിവസം ഇന്നലെ ആയിരുന്നു. ജനറല്‍ സെക്രട്ടറി സ്ഥാനത്ത് കുക്കു പരമേശ്വരനും രവീന്ദ്രനും ആണ് മത്സരിക്കുന്നത്. പ്രസിഡന്റ് സ്ഥാനത്തേക്ക് മത്സരം ശ്വേതാ മേനോനും ദേവനും തമ്മിലാണ്.
