കൊച്ചി:പ്രതിപക്ഷ നേതാവ് വിഡി സതീശന് അഹങ്കാരത്തിന് കയ്യും കാലും വെച്ചിരിക്കുന്നുവെന്നും മുഖ്യമന്ത്രിയാകുമെന്ന് കരുതിയാണ് അഹങ്കാരമെന്നും എസ് എന്‍ ഡി പി യോഗം ജനറല്‍ സെക്രട്ടറി വെള്ളാപ്പള്ളി നടേശന്‍. ഈഴവന്റെ ബുദ്ധിയെയാണ് ചോദ്യം ചെയ്യുന്നത്. ഈഴവനായ കെ സുധാകരനെ കെ പി സി സി അധ്യക്ഷ സ്ഥാനത്ത് നിന്നും പുറത്ത് ചാടിച്ചു. മതേതരവാദിയാണെങ്കില്‍ ഈഴവര്‍ക്ക് എന്താണ് നല്‍കിയത് എന്ന് സതീശന് പറയട്ടെ. ഏതെങ്കിലും ഈഴവന് എന്തെങ്കിലും നല്‍കിയോ എന്നും വെള്ളാപ്പള്ളി ചോദിച്ചു. പറവൂരിലെ പരിപാടിയിലാണ് വെള്ളാപ്പള്ളി രൂക്ഷ വിമര്‍ശനം നടത്തിയത്.
സതീശന്റെ മണ്ഡലത്തില്‍ എത്തി കാര്യങ്ങള്‍ പറയാതെ പോകുന്നത് സമുദായത്തിന്റെ അന്തസിന് ചേരില്ല. തന്റെ പൗരുഷത്തിനും ചേരുന്നതല്ലെന്നും വെള്ളാപ്പള്ളി പറഞ്ഞു. ഞങ്ങളുടെ സമുദായത്തെ അധിക്ഷേപിച്ച ആളാണ് സതീശന്. താന്‍ ശ്രീനാരായണ ധര്‍മ്മം പഠിക്കണമെന്നാണ് സതീശന് പറയുന്നത്.എന്നാല്‍ താന്‍ പറയുന്നത് അല്ലെ ശരിയെന്ന് വെളളാപ്പളളി ചോദിച്ചു. ഈഴവന് വേണ്ടി സതീശന് എന്ത് ചെയ്തു? സതീശന് മണ്ഡലത്തില്‍ എന്താണ് ചെയ്തത്? നാളെ തോല്‍ക്കാന്‍ വേണ്ടിയിട്ടാണ് സതീശന് പറയുന്നതെല്ലാം.
100 പേരെ ജയിപ്പിക്കുമെന്നാണ് സതീശന് പറഞ്ഞത്.എന്നാല്‍ ഇയാളെക്കൊണ്ട് ഒന്നും ചെയ്യാനാകില്ല. ഒരു ഡിസിസി അധ്യക്ഷന്‍ തന്നെ ഭരണം കിട്ടില്ലെന്ന് പറയുന്നുണ്ട്.അതില്‍ കൂടുതല്‍ താന്‍ എന്ത് പറയണമെന്ന് ചോദിച്ച വെളളാപ്പളളി ഈഴവര്‍ വോട്ടുകുത്തുന്ന യന്ത്രമല്ലാതെ അധികാരം കിട്ടുന്നില്ലെന്നും ചൂണ്ടിക്കാട്ടി. മുസ്ലിം വിരോധിയായി തന്നെ ഒതുക്കാന്‍ ശ്രമിച്ചാല്‍ അങ്ങനെ ഒതുങ്ങുന്നവനല്ല താന്‍. പറവൂരില്‍ 52% വോട്ട് ഉണ്ടെന്ന് പറഞ്ഞ സതീശന് പറഞ്ഞിട്ടും തോറ്റത് ഓര്‍മയില്ലേ എന്ന് വെള്ളാപ്പള്ളി പ്രതികരിച്ചു.
