ദുബായ്: സ്വര്ണ്ണത്തിന് തീവിലയായതോടെ ഗള്ഫ് രാജ്യങ്ങളില് നിന്നുള്ള സ്വര്ണ്ണക്കള്ളക്കടത്തുകാര് ലഹരിമരുന്ന് കടത്തിലേക്ക് തിരിഞ്ഞതായി റിപ്പോര്ട്ട്. ഒമാന് കേന്ദ്രീകരിച്ച് വന്തോതില് രാസലഹരി മരുന്ന് കേരളത്തിലേക്ക് കടത്തുന്ന സംഭവങ്ങള് അടിക്കടി വര്ധിച്ചുവരികയാണ്.
അഫ്ഗാനിസ്ഥാന്, ഇറാന് എന്നിവിടങ്ങളില് നിന്നാണ് രാസലഹരിമരുന്ന് വന്തോതില് കേരളത്തിലേക്ക് കടത്തുന്നത്. ഒമാന് കേന്ദ്രീകരിച്ച് വന് അന്താരാഷ്ട്ര റാക്കറ്റുകള് ആണ് പ്രവര്ത്തിക്കുന്നത്. ഇതുമായി ബന്ധപ്പെട്ട് ചില മലയാളികളും പ്രവര്ത്തിക്കുന്നുണ്ട്. ഈയിടെ ഒമാനില് നിന്നുള്ള ഇത്തരത്തിലുള്ള രണ്ട് കള്ളക്കടത്തുകള് പിടികൂടിയിരുന്നു. ഒന്ന് മലപ്പുറം ജില്ലയിലെ ഒരു വീട്ടില് നിന്നാണെങ്കില് രണ്ടാമത്തേത് കോഴിക്കോട് വിമാനത്താവളത്തില് നിന്നായിരുന്നു. ഈ രണ്ട് കടത്തുകളുടെയും പ്രഭവകേന്ദ്രം ഒമാനാണ്.
കഴിഞ്ഞ ദിവസം രാസലഹരിമരുന്ന് കടത്താന് ശ്രമിച്ച പത്തനംതിട്ട സ്വദേശിനിയെ കോഴിക്കോട് വിമാനത്താവളത്തില് നിന്നും പിടികൂടിയിരുന്നു. ഏകദേശം ഒരു കിലോഗ്രാം തൂക്കം വരുന്ന രാസലഹരി മരുന്ന് കടത്താനാണ് ഈ യുവതി ശ്രമിച്ചത്. ഈ കേസില് കൂടുതല് പേര് വൈകാതെ അറസ്റ്റിലാകുമെന്ന് പൊലീസ് പറഞ്ഞു. ആരാണ് ഇതിന് പിന്നില് പ്രവര്ത്തിച്ചതെന്നത് സംബന്ധിച്ച് വ്യക്തമായ സൂചന ലഭിച്ചിട്ടുണ്ട്.
സൂര്യ എന്ന യുവതി പത്തനംതിട്ടയില് നിന്നും ഈയിടെ ഒമാനിലേക്ക് പോയത് തന്നെ എംഡിഎംഎ കൊണ്ടുവരാനായിരുന്നു. മിഠായി പാക്കറ്റില് ഒളിപ്പിച്ചാണ് ഇവര് മയക്കമരുന്ന് കടത്താന് ശ്രമിച്ചത്.
ഇതിനു മുന്പ് 2025 മാര്ച്ചില് മലപ്പുറം കൊണ്ടോട്ടിയിലെ ഒരു വീട്ടില് നടത്തിയ റെയ്ഡില് ഏകദേശം ഒന്നരക്കിലോ രാസലഹരി മരുന്ന് പിടിച്ചിരുന്നു. ഇതിന്റെ അടിവേര് തേടിയപ്പോള് ഈ എംഡിഎംഎ വന്നത് ഒമാനില് നിന്നാണെന്ന് കണ്ടെത്തിയിരുന്നു.
