കൊച്ചി: സൗമ്യ വധക്കേസ് കുറ്റവാളി ഗോവിന്ദച്ചാമി ജയില് ചാടിയ സംഭവത്തില് ദുരൂഹത ഉണ്ടെന്നും അധികൃതരുടെ വീഴ്ച്ച ചൂണ്ടിക്കാട്ടിയും ബിജെപി മുന് സംസ്ഥാന അധ്യക്ഷന് കെ സുരേന്ദ്രന്. ഗോവിന്ദച്ചാമി ജയില് ചാടിയതില് സര്വ്വത്ര ദുരൂഹതയുണ്ടെന്നും ജയില് ചാടിയതാണോ അതോ ചാടിച്ചതാണോ എന്ന് സംശയമുണ്ടെന്നും കെ സുരേന്ദ്രന് ആരോപിച്ചു.
ഗോവിന്ദച്ചാമി ജയിൽ ചാടിയ സമയം, പൊലീസിൽ വിവരം അറിയിക്കുന്ന സമയം, ഫെൻസിംഗിലെ വെെദ്യുതി ഓഫ് ചെയ്തതതിലെ ദുരൂഹത എന്നിവ ചൂണ്ടിക്കാട്ടിയാണ് സുരേന്ദ്രൻ രംഗത്തെത്തിയത്. ഇന്ന് പുലർച്ചെ 1.15 നാണ് സൗമ്യാ വധക്കേസ് പ്രതി ഗോവിന്ദച്ചാമി കണ്ണൂര് സെന്ട്രല് ജയിലില് നിന്നും ചാടിയത്. അതീവ സുരക്ഷാ ജയിലിന്റെ സെല്ലിന്റെ കമ്പികള് മുറിച്ചുമാറ്റിയാണ് പുറത്തേക്ക് കടന്നത്.
കെ സുരേന്ദ്രന്റെ ഫേസ്ബുക്ക് പോസ്റ്റിന്റെ പൂർണ്ണരൂപം:
കൊടും ക്രിമിനല് ഗോവിന്ദച്ചാമി ജയില് ചാടിയത് രാത്രി ഒന്നേ കാലിന്. ജയില് അധികൃതര് അതറിയുന്നത് പുലര്ച്ചെ അഞ്ചേ കാലിന്. പൊലീസില് വിവരം അറിയിക്കുന്നത് കാലത്ത് ഏഴേ കാലിന്. മതിലില് വൈദ്യുതി ഫെന്സിംഗ്. ജയില് ചാടുമ്പോള് വൈദ്യുതി ഓഫ് ചെയ്യപ്പെട്ടിരുന്നു. സര്വ്വത്ര ദുരൂഹത. ജയില് ചാടിയതോ ചാടിച്ചതോ? ജയില് ഉപദേശക സമിതിയില് പി. ജയരാജനും തൃക്കരിപ്പൂര് എംഎല്എയും.’
