തിരുവനന്തപുരം: സ്കോള്-കേരള മുഖേനെയുള്ള ഹയര് സെക്കണ്ടറി കോഴ്സുകളില് 2025-27 ബാച്ചിലേക്ക് ഓപ്പണ് റെഗുലര്, പ്രൈവറ്റ് രജിസ്ട്രേഷന്, സ്പെഷ്യല് കാറ്റഗറി (പാര്ട്ട് III) എന്നീ വിഭാഗങ്ങളിലേക്കുള്ള ഒന്നാം വര്ഷ പ്രവേശനത്തിന് അപേക്ഷ ക്ഷണിച്ചു. എസ്.എസ്.എല്.സിയില് ഉപരിപഠന യോഗ്യതയോ അല്ലെങ്കില് സര്ക്കാര് അംഗീകൃത തത്തുല്യ കോഴ്സില് ഉപരിപഠന യോഗ്യതയോ നേടിയവര്ക്ക് അപേക്ഷിക്കാം. ഉയര്ന്ന പ്രായപരിധി ഇല്ല.
ജൂലൈ 25 മുതല് ഓണ്ലൈന് രജിസ്ട്രേഷന് ആരംഭിക്കും. പിഴ കൂടാതെ ആഗസ്റ്റ് 16 വരെയും 60 രൂപ പിഴയോടെ ആഗസ്റ്റ് 25 വരെയും ഫീസടച്ച് www.scolekerala.org വെബ്സൈറ്റ് മുഖേന ഓണ്ലൈനായി രജിസ്റ്റര് ചെയ്യാം. ഫീസ് വിവരങ്ങള്ക്കും രജിസ്ട്രേഷനുള്ള മാര്ഗ്ഗ നിര്ദ്ദേശങ്ങള്ക്കും പ്രോസ്പെക്ടസിനും സ്കോള്-കേരളയുടെ വെബ്സൈറ്റ് സന്ദര്ശിക്കുക.
ഓണ്ലൈന് രജിസ്ട്രേഷന് പൂര്ത്തിയാക്കി രണ്ട് ദിവസത്തിനകം നിര്ദ്ദിഷ്ട രേഖകള് സഹിതമുള്ള അപേക്ഷ അതത് ജില്ലാകേന്ദ്രങ്ങളില് നേരിട്ടോ, സ്പീഡ്/രജിസ്റ്റേര്ഡ് തപാല് മാര്ഗ്ഗമോ അയയ്ക്കണം. ജില്ലാകേന്ദ്രങ്ങളുടെ മേല് വിലാസം സ്കോള്-കേരള വെബ്സൈറ്റില് ലഭ്യമാണ്. സംസ്ഥാന ഓഫീസില് അപേക്ഷകള് സ്വീകരിക്കുന്നതല്ല. കൂടുതല് വിവരങ്ങള്ക്ക്: 2342950, 2342271, 2342369.
