തിരുവനന്തപുരം: സംസ്ഥാന സാക്ഷരതാ മിഷന്‍ അതോറിറ്റിയുടെ ഹയര്‍ സെക്കന്‍ഡറി തുല്യതാ പരീക്ഷ വിജയിച്ചവര്‍ക്ക് സാക്ഷരതാ മിഷന്‍ മുഖേന ശ്രീനാരായണഗുരു ഓപ്പണ്‍ യൂണിവേഴ്‌സിറ്റിയില്‍ ബിരുദ കോഴ്‌സ് പഠിക്കുന്നതിന് തിരുവനന്തപുരം ജില്ലാ പഞ്ചായത്ത് പദ്ധതിപ്രകാരം അപേക്ഷ ക്ഷണിച്ചു.
പരമാവധി 473 പഠിതാക്കള്‍ക്കാണ് ആനുകൂല്യം. 2026-27 സാമ്പത്തിക വര്‍ഷത്തിലെ ഒന്നാം വര്‍ഷത്തെ രണ്ട് സെമസ്റ്ററുകളുടെ കോഴ്‌സ് ഫീസും രജിസ്‌ട്രേഷന്‍ ഫീസും ഉള്‍പ്പെടെ ഒരു പഠിതാവിന് 7,390 രൂപ വീതം ജില്ലാ പഞ്ചായത്ത് വഹിക്കും. പരീക്ഷാ ഫീസ് പരീക്ഷാസമയത്ത് പഠിതാക്കള്‍ നേരിട്ട് സര്‍വകലാശാലയില്‍ അടയ്‌ക്കേണ്ടതാണ്.
ഇംഗ്ലീഷ്, മലയാളം, ഹിസ്റ്ററി, സോഷ്യോളജി, ബി.കോം എന്നീ ബിരുദ കോഴ്‌സുകളിലേക്കാണ് പ്രവേശനം. ജില്ലയിലെ ശ്രീനാരായണഗുരു ഓപ്പണ്‍ യൂണിവേഴ്‌സിറ്റിയുടെ പഠനകേന്ദ്രങ്ങളിലായിരിക്കും സമ്പര്‍ക്ക പഠന ക്ലാസുകള്‍ നടക്കുക. കൂടാതെ, ഓണ്‍ലൈന്‍ ക്ലാസുകളും ഉണ്ടാകും. പദ്ധതിപ്രകാരം അപേക്ഷിക്കുന്നവര്‍ കോഴ്‌സുമായി ബന്ധപ്പെട്ട് ആഗസ്റ്റ് 3ന് രാവിലെ 11ന് ജില്ലാപഞ്ചായത്ത് ഇ.എം.എസ് ഹാളില്‍ നടക്കുന്ന ഏകദിന ഓറിയന്റേഷന്‍ ക്ലാസില്‍ പങ്കെടുക്കണം.
തെരഞ്ഞെടുക്കപ്പെടുന്നവര്‍ക്ക് ശ്രീനാരായണഗുരു ഓപ്പണ്‍ യൂണിവേഴ്‌സിറ്റിയുടെ 2026 ജൂലൈ സെഷനില്‍ സാക്ഷരതാ മിഷന്‍ മുഖേന രജിസ്റ്റര്‍ ചെയ്യാം. സംസ്ഥാന സാക്ഷരതാ മിഷന്‍ അതോറിറ്റിയുടെ ഹയര്‍ സെക്കന്‍ഡറി തുല്യതാ കോഴ്‌സ് വിജയിച്ചവരും ജില്ലയിലെ ഗ്രാമപഞ്ചായത്ത് പരിധിയില്‍ സ്ഥിരതാമസക്കാരുമായ പഠിതാക്കള്‍ക്കാണ് അപേക്ഷിക്കാന്‍ അര്‍ഹതയുള്ളത്.
നിര്‍ദിഷ്ട അപേക്ഷാ ഫോം പൂരിപ്പിച്ച് എസ്.എസ്.എല്‍.സി, ഹയര്‍ സെക്കന്‍ഡറി തുല്യതാ കോഴ്‌സ് സര്‍ട്ടിഫിക്കറ്റ്, ആധാര്‍ കാര്‍ഡ്, റേഷന്‍ കാര്‍ഡ്, പാസ്‌പോര്‍ട്ട് സൈസ് ഫോട്ടോ എന്നിവ സഹിതം ജില്ലാ പഞ്ചായത്ത് ജില്ലാ സാക്ഷരതാ മിഷന്‍ ഓഫീസില്‍ സമര്‍പ്പിക്കണം. ജൂലൈ 31വരെ അപേക്ഷകള്‍ സ്വീകരിക്കും.
എസ്‌സി, എസ്ടി, ഒഇസി വിഭാഗങ്ങളില്‍പ്പെട്ട പഠിതാക്കള്‍ക്ക് ഇഗ്രാന്റ്‌സ് ഫീസ് ആനുകൂല്യം ലഭിക്കുന്നതിനാല്‍ അവര്‍ ഈ പദ്ധതിപ്രകാരം അപേക്ഷിക്കേണ്ടതില്ല. കൂടുതല്‍ വിവരങ്ങള്‍ക്ക് ഗ്രാമപഞ്ചായത്തുകളിലെ പ്രേരക്മാരുമായോ ജില്ലാ സാക്ഷരതാ മിഷന്‍ ഓഫീസുമായോ ബന്ധപ്പെടണം. ഫോണ്‍: 9495408198, 8075368795, 9048874849.
