ജനറല്‍ നഴ്‌സിങ് ആന്‍ഡ് മിഡ്‌വൈഫറി, ഓക്‌സിലറി നഴ്‌സിങ് കോഴ്‌സുകളില്‍ പ്രവേശനം

വിശദവിവരങ്ങള്‍ www.lbscentre.kerala.gov.in ല്‍
അപേക്ഷ ഓണ്‍ലൈനില്‍ ജൂലൈ 23 വരെ

സംസ്ഥാന ആരോഗ്യ വകുപ്പ്/മെഡിക്കല്‍ വിദ്യാഭ്യാസ ഡയറക്ടറുടെ കീഴില്‍ പ്രവര്‍ത്തിക്കുന്ന സ്ഥാപനങ്ങളില്‍ 2026-27 വര്‍ഷത്തെ ജനറല്‍ നഴ്‌സിങ് ആന്റ് മിഡ്‌വൈഫറി (ജിഎന്‍എം) ഓക്‌സിലറി നഴ്‌സിങ് ആന്റ് മിഡ്‌വൈഫറി (എഎന്‍എം) കോഴ്‌സുകളില്‍ പ്രവേശനത്തിന് ഓണ്‍ലൈനില്‍ ജൂലൈ 23 വരെ അപേക്ഷിക്കാം. രണ്ട് കോഴ്‌സുകള്‍ക്കുകൂടി ഒറ്റ അപേക്ഷ നല്‍കിയാല്‍ മതി. താല്‍പര്യമുള്ള കോഴ്‌സ് അപേക്ഷകര്‍ക്ക് തെരഞ്ഞെടുക്കാം. വിശദവിവരങ്ങള്‍ www.lbscentre.kerala.gov.in- ല്‍ ലഭിക്കും.

അപേക്ഷാ ഫീസ്: ജിഎന്‍എം കോഴ്‌സിന് 400 രൂപയും ജിഎന്‍എമ്മിനും എഎന്‍എമ്മിനും കൂടി 600 രൂപയുമാണ്. എഎന്‍എമ്മിന് മാത്രം 300 രൂപ. പട്ടികജാതി/വര്‍ഗ്ഗ വിഭാഗത്തിന് ജിഎന്‍എം കോഴ്‌സിന് 200 രൂപയും രണ്ട് കോഴ്‌സുകള്‍ക്കുംകൂടി 300 രൂപയും എഎന്‍എമ്മിന് മാത്രം 150 രൂപയുമാണ് അടയ്‌ക്കേണ്ടത്. ഓണ്‍ലൈന്‍ മുഖേനയോ വെബ്‌സൈറ്റില്‍നിന്നും ഡൗണ്‍ലോഡ് ചെയ്ത ചെല്ലാന്‍ ഉപയോഗിച്ച് ഫെഡറല്‍ ബാങ്ക് ശാഖ വഴിയോ ഫീസ് അടയ്‌ക്കാം.

പ്രവേശന യോഗ്യത: ജിഎന്‍എം കോഴ്‌സിന് ഫിസിക്‌സ്, കെമിസ്ട്രി, ബയോളജി, ഇംഗ്ലീഷ് വിഷയങ്ങളോടെ ഹയര്‍ സെക്കന്ററി/പ്ലസ്ടു/തത്തുല്യ ബോര്‍ഡ് പരീക്ഷ 40 ശതമാനം മാര്‍ക്കോടെ വിജയിച്ചിരിക്കണം. ഇവരുടെ അഭാവത്തില്‍ മറ്റ് സ്ട്രീമുകളില്‍ ഹയര്‍ സെക്കന്ററി/പ്ലസ്ടു പാസായവരെയും പരിഗണിക്കും.

എഎന്‍എം കോഴ്‌സിന് ഹയര്‍ സെക്കന്ററി/പ്ലസ്ടു/തത്തുല്യ പരീക്ഷ പാസായിരുന്നാല്‍ മതി. മലയാളം വായിക്കുവാനും എഴുതാനും കഴിയണം.

അപേക്ഷാ സമര്‍പ്പണത്തിനുള്ള മാര്‍ഗ്ഗനിര്‍ദ്ദേശങ്ങളും പ്രവേശന നടപടിക്രമങ്ങളും സ്ഥാപനങ്ങളും കോഴ്‌സുകളും സീറ്റുകളും സംവരണവും ഫീസ് ഘടനയുമെല്ലാം അടങ്ങിയ പ്രോസ്‌പെക്ടസ് വെബ്‌സൈറ്റിലുണ്ട്.

കോഴ്‌സ് കാലാവധി: ജിഎന്‍എം കോഴ്‌സ്- ആറു മാസത്തെ ഇന്റേണ്‍ഷിപ്പ് ഉള്‍പ്പെടെ 3 വര്‍ഷം. എഎന്‍എം- 2 വര്‍ഷം.
ജിഎന്‍എം സീറ്റുകള്‍: മെഡിക്കല്‍ വിദ്യാഭ്യാസ ഡയറക്ടറുടെ കീഴില്‍ തിരുവനന്തപുരം, കോഴിക്കോട് ഗവണ്‍മെന്റ് നഴ്‌സിങ് കോളേജുകളില്‍ ജിഎന്‍എം കോഴ്‌സില്‍ പട്ടികജാതി വിദ്യാര്‍ത്ഥികള്‍ക്ക് മാത്രം (30 സീറ്റുകള്‍ വീതം) ആകെ 60 സീറ്റുകള്‍ ലഭ്യമാണ്. കോട്ടയം ഗവണ്‍മെന്റ് നഴ്‌സിങ് കോളേജില്‍ പട്ടികവര്‍ഗ്ഗ വിദ്യാര്‍ത്ഥികള്‍ക്ക് 30 സീറ്റുകളുണ്ട്.

ആരോഗ്യ വകുപ്പ് ഡയറക്ടറുടെ കീഴില്‍ 14 ജില്ലകളിലും ഓരോ സര്‍ക്കാര്‍ നഴ്‌സിങ് സ്‌കൂളുകളുണ്ട്. ജിഎന്‍എം കോഴ്‌സില്‍ ലഭ്യമായ സീറ്റുകള്‍- തിരുവനന്തപുരം 33, കൊല്ലം 30, പത്തനംതിട്ട 27, ആലപ്പുഴ 30, ഇടുക്കി 25, കോട്ടയം 26, എറണാകുളം 38, തൃശൂര്‍ 37, പാലക്കാട് 30, മലപ്പുറം 30, കോഴിക്കോട് 73, വയനാട് 25, കണ്ണൂര്‍ 36, കാസര്‍ഗോഡ് 25. ഇതിനു പുറമെ കൊല്ലം ആശ്രാമത്തുള്ള ഗവണ്‍മെന്റ് നഴ്‌സിങ് സ്‌കൂളില്‍ പട്ടികജാതി/വര്‍ഗ്ഗ വിദ്യാര്‍ത്ഥികള്‍ക്കായി 20 സീറ്റുകള്‍ ലഭ്യമാണ്.

എഎന്‍എം സീറ്റുകള്‍: ആരോഗ്യവകുപ്പിന്‍ കീഴില്‍ നാല് ഗവണ്‍മെന്റ് ജെപിഎച്ച്എന്‍ ട്രെയിനിങ് സെന്ററുകളിലാണ് എഎന്‍എം കോഴ്‌സുകളുള്ളത്. തിരുവനന്തപുരം (തൈക്കാട്) സീറ്റുകള്‍ 30 (പട്ടികജാതി/വര്‍ഗ്ഗക്കാര്‍ക്ക് മാത്രം); കോട്ടയം (തലയോലപ്പറമ്പ്) 25, പാലക്കാട് (പെരിങ്ങോട്ട് കുറിശ്ശി) 50, കാസര്‍ഗോഡ് 25.

സ്‌റ്റൈപ്പന്റ്: ജിഎന്‍എം കോഴ്‌സില്‍ അഡ്മിഷന്‍ ലഭിക്കുന്നവര്‍ക്ക് പ്രതിമാസം 700 രൂപയും ഇന്റേണ്‍ഷിപ്പ് കാലയളവില്‍ പ്രതിമാസം 2000 രൂപയും സ്‌റ്റൈപ്പന്റ് ലഭിക്കും. പെണ്‍കുട്ടികള്‍ക്ക് ഹോസ്റ്റല്‍ സൗകര്യമുണ്ടാകും.

എഎന്‍എം കോഴ്‌സില്‍ പ്രവേശനം ലഭിക്കുന്നവര്‍ക്ക് പ്രതിമാസം 500 രൂപയാണ് സ്‌റ്റൈപ്പന്റ്. കൂടുതല്‍ വിവരങ്ങള്‍ പ്രോസ്‌പെക്ടസിലുണ്ട്.